Hriselna atan nunphung hrisel

Mizoram Health Systems Strengthening Project huaihawtin Mizorama khaw ṭhahnem takah February 15, 2025 aṭangin Walk for Health Walkathon buatsaih ṭhin a ni a, March 21 khan Lammualah khâr a ni.

Walk for Health Walkathon hi inkai chhâwn theih loh natna chi hrang hrang dona leh chung natnate chu miin an neih lohna tura inzirtirna atana tih a ni. Thla khat chuang kalpui a nih chhunga khaw hrang hranga walkathon buatsaihah khaw 510 aṭangin mi 70,000 vel an tela sawi a ni.

Mizoram mipuiin hriselna ṭha zawk an neih theih nan leh nunphung hrisel neih pawimawhzia an hriat theihna tura kea kal hun buatsaih a ni leh chumi paha kea kal pawimawhzia inzirtir a ni hi a lawmawm tak zet a; Mizoram mipuiin kan mamawh em em a ni a, mi tam takin an hlâwkpuiin a rinawm.

Nun dan fimkhur loh vang te, awm âwl vang leh taksa chêt tam loh vanga natna a tam sâwt hle. Mi dang aṭanga kan kai ni lo, keimahni nun dan avanga kan neih liau liau natna nei kan tam ta; chungte chu natna benvawn ang chi, tihdam mai theih loh a ni duh hle bawk.

Nunphung vanga natna kan neih tam tak hi nun dan hrisel hmanga inven theih a ni a; invenna pawh thil harsa a ni lo. A pawimawh ber pakhat chu tak taksa tihchêt tam leh sâwizawi ṭhat a ni.

Mizoram mipui khawsak a ziaawm tial tial a, nuamsa taka khawsa an tam tulh tulh. Lirthei a tam tawh hle a, khawpuiah phei chuan chhungkaw tinin lirthei an nei vek tawh emaw tih mai tur a ni. Mahni veng chhunga inkhawm tur leh hmun tawitê kal tur pawhin lirthei kan chelek thlazen tawh a; hei hi thil ṭul lo leh mahni tana ṭha lo, sum sên titamtu leh hriselna nghawng thei a ni a, insûm a ṭha.

Hmasawnna nasa tak avangin mahnia inawm tleina tur a tam tawh a; a bikin ṭhalaite inawm tleiin zanah rei tak tak an meng a, zingah tlai tak takah an tho leh a, chhuah hlekin lirthei an hmang zel bawk. Hetiang hi nunphung hrisel lo a ni a, hriselnain a tuar lo thei lo.

Kan thil neihte hi inthununtir loin, keimahni'n kan thunun tur a ni a, mahni inthunun theih a ṭul tak zet. Kan hriselna hi keimahni kutah thui tak a innghat a, hriselna tichhe thei nunphung ṭha lo kan chìn ṭhin titlem tur leh mahni inthunun turin ṭan lak a ngai hle a ni.