Sikul zirlaibu peih kim vat a ngai

Samagra Shiksha hnuaiah sorkar primary school leh middle school-a zirlaite hnenah sorkarin a thlâwnin zirlaibu a sem ṭhin a; mahse, academic session kal mekah hian sikul 1,270-in zirlaite daih zirlaibu an la dawng lo. Zirlaibu chhut tura pek (order) zat aṭangin 63.95% chiah Samagra-in an la dawng nia sawi a ni.

Samagra Shiksha SPIO tarlan danin, zirlaibu la dawng kim lote chu primary school 581 leh upper primary/middle school 689 an ni. Zirlaibu chhutu chu Mizoram Government Press a ni a, lehkhabu chhu tura order petu chu SCERT niin, 2024-25 academic session atan zirlaibu 4,05,000 vel chhu turin an order a ni.

Academic session 2024-25 ah zirlaite'n sikul luh ṭan aṭanga thla thum chuangah pawh sikul leh zirlai tam takin zirlaibu an la dawng kim thei lo hi a zialo tak zet; zirlaite'n an zirnaah an tawrh ngei a rinawm. Zirlaibu la dawn loh zingah science leh mathamatics a tam ber a, hengte hi zirlaite'n zirlaibu an mamawh ber berna a ni àwm e.

Zirlaibu neih loh miau chuan naupangte'n an tawrhna chen a awm lo thei lo. Sikulah zirtirtute'n an zirtir aṭangin thil tam tak chu an hre ngei ang a, mahse, in lama en zui tur, zir zui tur an neih loh chuan an thiam tur ang leh an hriat tur ang an hre lo ang tih a rinawm. Chu avang chuan in lamah zirlai zir chhunzawm ṭhin a ni rêng bawk.

Sorkar lama thuneitute leh mawhphurhna nei zawng zawngin nasa lehzuala ṭan an lâk a ngai. Sorkara mawhphurtu hrang hrangte insawi thiama mi dang mawhpuh mai loin, mahni zawn ṭheuha tih tur ṭheuh a hun taka hlen chhuak tura an ṭan lehzual a ngai. Tunah hian tlai tawh tho mah se, zirlaite'n a hma thei ang bera zirlaibu an dawn kim theih nan theihtawp chhuah a ngai e.

Kum lo la lak leh zel turah chuan thuneitute inbuatsaih hma tawh rawh se. Zirlaibu order-tuin order hma se la, a chhutute'n theihtawp chhuahin ṭan lo la bawk rawh se. Kum 2025-25 session-ah chuan sikul luh ṭan hmain zirlai daih zirlaibu awm hman ngei turin inpeih se; an inpeih hman lo leh tho a nih chuan mawhphurtute chunga action lakna chi a ni hial thei ang.