Hnam pum mamawh rilru hrisel
Light for Comprehensive Development (LiFCoDe) chuan tun hnai khan MJA member-te tan mental health training an buatsaih a; journalist-te chu mipuite ngaihdan siamtir theitu an nih avangin news an ziah danah fimkhur a ngai tih sawi chhuah a ni a, rilru hrisel put a pawimawh thu tarlan a ni bawk.
Tun hnaiah Mizo zingah rilru hrisel put pawimawhzia inzirtirna a awm ta zauh zauh a, hei hi rilru hrisel lo kan awm avanga harsatna kan tawh hrin chhuah a ni thei ngei ang. Mizo ṭhalai zingah rilru lama harsatna tawk eng emaw zat an awm a, inawkhlum hialte pawh an awm ṭhin a, a pawi takzet a ni. Kan ram dinhmun en hian, kan rilru put hmang thlak ngai tam tak a awm a, mithiamte pawhin zirtirna zau zawk an pek a ngai hle a ni.
'Kan ram hian eng harsatna nge kan tawh bik?' tia inngaihtuah palh mai awl khawpin Mizo zingah inawkhlum an tam a, Mizo ṭhalai anga a nawlpuia ruihhlo ti nasa pawh hi an tam lo mai thei. Hetianga kawng dik lo zawh tura kan kal chhan hi kan rilru put hmang dik loh vang a ni ngei a, chhungkaw inenkawlna fuh lo piah lamah kan khawtlang inrelbawlnate thleng hian kan ennawn ngam chu a hun tawh khawp mai.
A pawimawh ber erawh chu mimal ṭheuhin thil a êng zawng leh a ṭha zawnga kan thlir thiam hi a ni a, eng dinhmunah pawh ding ila a harsatna lam ringawt en lo a, a chinfel dan tur kan hmuh thiam a pawimawh. Journalist-te leh vantlang hmaa thusawi ṭhinte pawhin midangte hnena kan thu puan chhuah kan fimkhur tlan a ngai a, a chhe lai ringawt en loa a ṭha lamte pawh tun aia uara kan pho chhuah thiam a hun tawh hle a ni.
He hnam hian rilru hrisel put a mamawh a, chhungkua, khaw-tlang, sorkar leh koh-hran thlengin a kal danah inthlak ngai a awm a nih chuan inen lêt hreh lo se; tuna kan kal dan pangngai ringawtah hi chuan kan ṭhalaite hi an himin an hlim tawk lo niin a lang a, kan rilru put hmang hi a êng zawnga kan sawi danglam hret a hun tawh hle. Rilru hrisel lo kan put ṭhin avanga kan harsatna tawhte hre rengin, rilru hrisel pu turin ṭan la thar ila, mithiamte pawhin tun aia uar leh zau zawkin zirtirna hi thehdarh zel rawh se.