Mipui Aw

Mizoram State Public Grievance Redressal & Monitoring System thar 'Mipui Aw' tih chu tun hnai khan chief minister Lalduhoma'n CMO conference hall-ah a tlangzarh a, a kaihhruai sorkar chu mipuite aw ngaithla tura an inpeih reng thu a sawi, hei hian ngaihven a hlawh hle.

Mipui Aw hi khua leh tuite'n an harsatna, an vuivaina leh an chanvo te an zawhfiah theihna tur hmun a ni a; a address chu www mipuiaw.mizoram.gov.in a ni. Tun laiah mi tam zawkin smart phone kan hum tawh a, internet kan hmang thei deuh vek tawh - kan hmanrawn neih sa hmangin kan duhzawng kan sawi thei dawn tihna a ni. Mipui banphak thil chhawp chhuaktu sorkar hian hemi kawngah hian fak a phu viau a ni.

Mizoram sorkar kan hrawn lai hi mipui sorkar, kalphung thar min zawrh tute kha an ni a, tuna an hmalak dan thlir chuan sorkar kan lo hrawn tawhten tih nachang an hriat loh leh ṭul an tih lem loh kha an ti chho mek a ni a, a rah chhuah chu nakin lawkah kan hmu thuai dawn.

Tuna Mipui Aw an buatsaih pawh hi mipuiin sorkar kan fin chhuah theihna kawng hnai leh awlsam a ni dawn a, a kal dik tawk lohna lai khalh ngil theihna hmaraw ṭha leh pawimawh a ni tel nghal dawn bawk a ni.

Mihring hian fakna thu dawnsawn nuam kan ti tlangpui, sorkar ngei pawhin Mipui Aw aṭanga fakna a dawng a nih chuan lawmna tur a ni. Chutihrualin, fakna chauh ni loin awmze nei taka sawiselna leh fuihna pawh a dawnsawn thiam a pawimawh dawn a, chumi a dawngsawng thiam a nih ngawt chuan a kalsual theihna tur tam tak venpuitu a ni ngei ang.

Mipui lam pawhin tih tur kan nei, rem leh rem mang loa sorkar thil tih sawisel chiam chiam mai loin, awmze nei leh thu belhchian dawlin khalh ngil tum ila, thu tling hmanga kan deng fo a nih chuan thuneitu lam pawhin an ṭhatpui ngei ang.