Mizorama lo neih dan

Agriculture department chhinchhiah danin, kum 2008-2015 chhung khan Mizoramah leilet hmanga buh chînna 50.61%-in a pun belh a, tlangram lo neih zau zawng 50.81%-in a tlakhniam phah thung. Kum khata Mizoramin buhfai a mamawh zat nia chhût chu MT 1,80,000 a ni a; chutih laiin, kum 2015-16 chhunga Mizorama leilet leh tlangram lo aṭanga buh thar zawng zawng chu MT 60,814 a ni.

Mizoram hian kan kham khawp ei tur kan thar chhuak lo a, chaw bera kan neih buh pawh kham khawp kan thar lo. Hei vang hian state pawn aṭanga buhfai lakluh chu innghahna atan kan hmang a, buhfai lakluh a khaihlakin kan mangang a, buhfai lakluh a hnianghnar deuhin kan ngaih a
ṭha deuh mai niin a lang.

Tun hnaiah sorkar lam chhin-chhiah danin Mizoramah tlang ram lo neih bansan an pung zel a, leileta buh chin pawh nasa takin a pung. Sorkar thu leh hla hi a dik a nih ngai chuan, leileta buhfai thar hi a pung nasa hle mai a, hei hian kan buhfai lakluh lamah nghawng neih awm tak a ni a, tun thleng hi chuan kan buhfai thar tam hian buhfai lakluh lamah nghawng a la nei tak tak lo niin a lang a, thil mak tak a ni.

Mizorama lo neih dan hi kan thlak loh chuan ram pum kham khawp thar chhuah ngaihna a awm lo a, tlangram lo neih ang hi chuan intodelh a harsa ang. Tlangram lo neih bansan turin sum tam tak sengin NLUP kalpui mek a ni a, ziaka chhinchhiahna lam-ah tlangram lo neih kalsan an tam a; nimahsela a tak takah chuan eizawnna dang thlangtute pawh hian a remchan anga tlangram lo neih kalpui an la duh zel niin a lang.

Engpawhnise leileta buh chin hi uar deuh deuh ila, buhfai hi kan thar tam tak zet hunah chuan state pawn aṭanga kan buhfai lei zat pawh a tlahniam ang a, tuna kan thlen chinah hi chuan kan lo neih dan inthlak nia ziaka lang hi a taka hmuh thiam a la harsa rih hle.