Lo neih dan thar

Food & Agriculture Orga-nization (FAO) palai chuan nimin khan Mizoram chief secretary a kâwm. FAO palai chuan, Mizoram chu tlang ram a nih angin fûr ruahtuiin lei ṭha a luan ralpui ṭhin chu uiawm a tih thu sawiin, "Terrace uar zawka siam a ngai. Sloping Agricultural Land Technology (SALT) thiamna hi Mizoramah enchhin ve kan tum a ni," a ti a; chief secretary chuan Mizoram sorkarin Mizo lo neih dan pangngai kalsan tura hma a lak dan tlangpuite a hrilhfiah.

Mizoram hi tlang ram a nih thu te, hmun danga lo neih dan zawm a harsat avangin pi pute hunlai aṭanga kan lo neih dan pangngai bak kalpui a harsat thute kan sawi ṭhin a, thil dik tak pawh a ni. Mizoramah hi chuan kan lo neih dan pangngai thlak tumna hi awm tawh
ṭhin mah se tun thlengin a la hlawhtling lo a, pi pute hunlaia kan lo neih dan kha kan la chhawm a, kan la intodelh lo hle a ni.

Ngun taka kan ngaihtuah ngai chu Mizoram ni lo tlang ram hi a tam hle a, heng tlang rama chengte hian Mizote ang em hi chuan lo an hal nasa lo a, ramngaw tichereu vak vak loin lo an nei thei. Kan lo neih dan hi a ṭha ber lo tih a chianna chu kan intodelh thei lo a, kan loneitute an hausa thei lo hi a ni a, thil thar
ṭha zawk ngaihtuah chhuah a hun tawh khawp mai.

Mizoram sorkar hnuaia Agriculture leh Horticulture department-ah ringawt pawh mithiam ṭhahnem tak an awm a, sorkar-in loneitute tan sum tam tak a ruahman bawk a, chuti chunga pi pute hunlai lo neih dan ringawt kan la chhawm zel hi chu a fel lo khawp mai.

Tlang ram dangah pawh ramngaw ṭhiat kher lo leh hal dur dur kher loa lo an nei thei a nih chuan an tihdan zirin entawn mai ila, kan lo neih dan hi chu ennawn a hun tawh takzet a ni.