Kawn chei leh Masi

Tun kum hnih khat chhunga kan Masi chu Kawnchei Masi hi a ni ta ngawt mai le.

Aizawl khawpui han fang kual ila, veng chhunga kawn nei dek dek tawh chuan chei zel tur emaw kan ti niin a lang. Khawpui dangte leh tlema thingtlang deuh te thlengin kan phak ang angin kawn kan chei ve zel a, kan in chei par vul nasa kher mai le.

Kan kawn chei hi a mawina lam chu thuhran nise, kawn chei hian Mizo mipui-te kan duh chuan kan ṭanrual theihzia a lantirin ka hria. Kawn cheina turin kan theih ang angin sum kan tuak a, sum kan khawn a, Mizoram puma kawn cheina atana kan thawhkhawm tling khawm hi cheng vaibelchhe chuang fe zawng a ni ngei ang.

Mi tlawmngaiten hlawh phut miah lovin tlaivar dawn dawnin khaw vawt karah kan tha leh zung tam tak kan seng a, hei hian mipuite kan ṭanrual duh chuan thil kan lo tih theihzia tarlang chiang hle.

Chutih rual chuan kan kawn chei hi eng ber nge kan chei, enge kan thupui tih erawh a chiang lo hlawm hle in ka hria. A lan danah chuan Krismas puala kawn chei ve si hi Krismas rawng kai leh Krismas lama rilru min hruai thei ni lem lo a va tam tehlul em.

Kil khata Isua piang lai lem bak chu a behbawm lamah kan kal ral em aw a tih theih. Kan kawn chei hi sap ho tih dan entawn kan ang deuh ber nain, sap ho tih dan leh vai ho Diwali hi kan hriat pawlh a ang ka ti.

He ti hian ka ngaih-tuah a - kawn chei a piangin sap tih dan la chhawng lo hian kan chei ve thei dawn lo em ni le ka ti. Bible en hian vur leh Masi hian inzawmna a neih awm ka hre lova, sazuk leh masi inzawm tirtu pawh hi sapho an ni.

Engtikah nge Mizoramah ngei Mizo takin kan kawn te hi kan chei ve theih ang?

Kawn ṭhenkhatah chuan pangpar siam chawp hmanga Tlai-zawng par lem an siam te an hmang a, mi dang kawn cheite aiin a mawi zawk lo a nih pawhin kei chuan sap tihdana vur lem leh sazuk lem siam aiin a ropui ka ti zawk viau a ni.

Tun hma lam kha chuan Bawngpu par (Nihawi suak kan ti mai kha) ang te hi Masi dawnah a par a, lunga ti leng viau mai. Heng ang (a lem te pawh siam chawp ve mai ila) hmang hian kawn te hi chei ila, mi tam tak lunglen chu kan kai tho zawk mah lo ang maw?

Kan ṭhalai fing leh fel tak takte hian in ngaihtuahna han seng thar leh deuh ta ula, tun aia Mizo rilru mil leh lung ti leng thei zawk tur hian Masi kawn chei te hi kan ti ve thei dawn lo em ni le?

Masi hi Isua-in kan tan a nun a pekna hun a ni a, kawn kan chei a nih pawhin kan chei chhan ber tarlang thei zawngin mipui rilru in Isua lama hawi theihna tura kawn te kan chei a pawimawh khawp mai.

- Engkima Chawngthu