MNF SORKAR HI KUM 2 LEH A CHANVE VEL CHAUH SORKAR ANG A NI

Pu Zoramthanga kaihhruai MNF sorkar hi kum 2018 kum tawp khan bul a inṭan a. Krismas leh kumthar vuakvet avangin hun eng emaw chen chawlh a ni a. Kum 2019 kum tir lamah Lok Sabha MP kan inthlang leh a, ram pumah model code of conduct hman a ni.

Chumi hnuah, SHDC, MADC, CADC, LADC, AMC, V/C, L/C, LMC, MLA by-election a hrang ṭheuhvin ṭum thum, VC/LC by-election hrang hrang kan inthlang leh a. Heng inthlante hi puan a nih aṭanga inthlan result chhuah hma chu, a ram pum leh an area huam chhungah sorkar khan hna thawk thei lovin model code of conduct-in a phuar bawk. Heng inthlan hrang hrangahte hian LMC leh Zemabawk LC By-election tih loah chuan sorkar lai MNF an chak vek a ni.

Kum khat awrh MNF a sorkar khan Chief Minister leh Minister hrang hrangten theihtawp chhuahin Mizoram Budget pangngai piah lamah Mizoram hmasawnna turin theih tawp an chhuah a, Central lamah an feh chhuak sang sang a. Hma an la ṭan dawn chauh a, khawvel tibuaitu Covid-19 a lo lang ta hlawl mai. India ram leh Mizoram thlengin min tibuai a, covid khan khawvelah mi nuai hlir nuai 69 vel nunna a suat a, a rapthlak takzet a ni.

Mizote chuan thil hi kan theihnghilh hma khawp a, Covid hun laia Zoram pumah hmai tuamin Task Force hrangte hmun tin kawi tinah an duty a, inneih leh mitthi Inah pawh mi 30 bak kal an phal lo a, Pathian biakin leh sorkar office thlengin kan khar a. Biate Pu Saiman'an 'Intentawnna a thleng' a tih ang deuhin ṭhian ṭha, thawhpui leh ṭhenawm khawveng thlengin kan inhlau tawn vek a, kut lawnga inchibai tak ngial pawh kan ngam lo a. Bazarah chawhmeh lei tur a awm lo a, thingtlang/zokhua leh khawpuiah pawh mi thil phalte kal tlangin chaw leh chawhmeh kan inpe tawn ṭhin a nih kha.

Covid avang khan kum hnih leh thla 3 vel engmah ti thei lovin sorkar a kal a. Mahse, hun a lo kal deuh a, covid awm lo ang maiin political party ṭhenkhat chuan sorkar chu 'hna a thawk lo, engmah a ti lo' tiin an deuhsawh mek a nih hi. Covid avanga Mizoramin a sum hmuh tur a hmuh loh kha cheng nuai hlir nuai 23000/- lai a ni a. Covid hi chhuanlam a tling lo titute hian eng tarmit tak vuah ang maw?

Khawvel, India ram State leh UT-te, MNF sorkar hmasa lam te, Brig.T.Sailo sorkar leh Pu Hawla sorkarten an hmachhawn ve miah loh kum 2019-2023 MLA term-ah hian Pu Zoramthanga sorkar hian hun khirh tak a tawng bik a, a vanduai bik hle a ni.

Chung hun harsa bikte chu Mizoram khaw chhak lamah Lir a nghing reng a, ṭhenkhat phei chu mahni in chhung lum pawh luah ngam lovin Field ah te, Hall leh tual zawlahte buk zar sain Silpauline hnuaiah an awm a. Minister/MLA leh sorkar department-ten sum tam tak sengin a hmunah an kal chilh áwl lo a. Chhim lamah ram a kàng a, Mizo History-a dài tawh ngai lo tur Indian Airforce helicopter meuh chah chhuakin Tuipui 'D'-a mi tui chawi hialin cheng tam tak sengin kàng an ṭhelh a ni.

Khawpui leh thingtlangah a maka maka tam kan vawk vulh a thi a, sorkarin sum tam tak sengin chhawmdawlna a pe a ni. Sorkar kal tawh zawng zawnga thil thleng ngai lo, Assam nen ramri buaiah inkahna a thleng a. Pathian khawngaihna avangin keini lamah nunna chan kan awm lo hlauh. Vai hovin hun eng emaw chen kan eibar chawkluhna kawngpui min dan chahsak a. Manipur, Tripura leh Bangladesh aṭangin buhfai chawkluh a ngai hial a. Ramri buai avanga kha chen kan buai kha tunah chuan kan theihnghilh leh ta mai emaw tih tur a ni.

Myanmar politics buai avangin khawchhak lama kan unau raltlante lo dawnsawn a ngai a, Bangladesh leh Manipur lam aṭangin kan thisen zawmpui mi ṭhahnem tak kan khualchhawn mek a. Central sorkarin Refugee-te tuamhlawm a phal loh laiin, sum leh pai tam tak sengin sorkarin an eitur a pe mek bawk a ni. Mizoram sorkar hian a hriat lawk miah loh, budget-a a dah si loh sum kal ralna hi a turu asin.

Dik tak chuan, kan hrawn mek Pu Zoramthanga kaihruai sorkarah hian heng harsatna thuah tam tak karah hian, ni tin mipui mamawh – ei leh bar, tui leh gas, kawlphetha, health department, education lam thlengin, duhthusam em em chu ni lo mah se, mualpho lovin a kal mar reng a. A pek hun chu tlai chang awm zeuh ṭhin mah se, sorkar hnathawk hlawh pek theih loh a awm hek lo. Tute sorkar emaw kan hrawn lai ang te, sum harsat avanga sum tuak nana zu zawrh ngawt te, MLA by-election-ah thutiam ropui tak nei, nuihzatthlak khawpa hlen leh thei si lote khan min hruai ta se, chakai nufa kal inzirtir, hma lamah nge, hnung lamah nge, a saisirin kan kal ang tih ngaihtuah tham a awm a ni.

Heng zawng zawng hi uluk taka thlir chiangin zir ngun ang u. Hun harsa, hun khirh nasa tak tawktu MNF sorkar kan hrawn mek hi a lainatawm a, sorkar anga Zoram tana hna a thawh hun chhung hi a rei lo lulai em mai.

MLA term khat hun chhung hi kum 5 lai a ni a, kawng tam takah development kal tho mah se, Pu Zoramthanga kaihhruai sorkar hian kum 5 term-ah a hnathawh theih hun chhung hi kum 2 leh a chanve bak a ni lo tih kan hrechiang awm e.

Sorkar cháka tuihalten hun khirh leh harsa kan tawh zawng zawngte mipui theihnghilhtir tum a, chhe lailet der anga sorkar an puh hi chu siamtu Pathian meuh pawhin 'em em a na!' a ti mai lo maw?

Hun harsa leh hun khirhah he ram kaihruai tura a ruat, kan Pathian hian hun ralmuang kan tawn mekah hian he sorkar hi a thlauhthla maiin ka ring mawlh lo e. Chutiang tur chuan mipui pawhin ngaihtuahna ril tak seng ang u.

- R.Lalhmangaiha, Bethlehem