MIZORAM POLITICIAN-TE'N PU DUHAWMA AN TLUK LOHNA

MNF MLA-te'n Mizoram Assembly Speaker hnena Pu Lalduhawma chungchanga lehkha an thehluh chungchangah sawi tur ka nei ve lo. Tute paw'n zalenna an nei, na tak tak paw'n lo inbeitawn vel ang hmiang! Politician an ni miau a lawm. USA President inthlan campaign neih lai mekte phei khu chu an rapthlak hlawm hle; ringtu nun a lang vak lo khawp mai. Kan ram zim teah phei hi chuan an la indimtawn phian zawk niin a lang. Mahse, a lan dan ang erawh kan ni vek lem lo thung. *Hriatna pawnlang thinlung chhung sual si* kan nih hmel.

April 6, 1946 - Mizo Union a din aṭang khan tun thlengin kum 74 zet Mizo mipuite'n politic kan hmel hriat ve ta. Political Party ding hmasa ber Mizo Union Party-a President hmasa ber chu Pu Pachhunga (L) Aizawl Bara Bazar sumdawng pa hausa kha a ni.  Kum 74 zet kan hman liam mek tawh karah khan Mizo politician fel tak tak leh ṭha tak tak mi eng emaw zat kan hrawn tawh a; chung zingah chuan Pu Lalduhawma ang ve tak nia ngaih theih chu Pu J. Thanghuama (L) ex-Speaker kha a ni a. Pu Denga Ministry-ah March 10.1987 - Jan 29.1989 thleng khan speaker hna a chelh a ni. Pu J. Thanghuama (L) pawh kha  Opposition bench-a a ṭhut chhung zawng khan Ruling party kha a chhaih buai hneh thei ve hle a, thil a hre rei theiin a chhinchhiah ṭha thei hle tih a hriat theih. Ani kher lo pawh kha fel tak tak, fing tak tak, thiamna tha tak tak nei sawi tur tam tak an awm ang, sawi vek sen a ni lo.

Kum 1984 aṭang khan Pu Lalduhawma hi politic field-ah a lo zuang lut ve ṭan a. Kum 36 zet politic-ah tawn hriat a nei mek tihna a ni. Hetih lai hian ani aia politic field-a tawnhriat ngah leh zei tak tak, kum 50-70 lai politic lipuia lo liluh tawhte pawh sawi tur tam tak an awm ang. Mahse, Mizo politician-te hian Pu Lalduhawma tluk lohna lai hotê an nei a, chu chu an tih ve chuan awlsam tea Pu Duha tluk ve theih mai a ni a; chu an tluk lohna lai tak chu tarlan ka tum chu a ni. Heti taka Pu Lalduhawma Ruling party/ministry apiangin an beih vak zelna chhan hi a lanfiah theih nan Pu Lalduhawma nihna tlem tarlang ila.

Pu Lalduhawma S/o  Vaisanga (L) hi Feb. 22, 1947-ah lo piangin a nupui hming chu Liansailovi a ni. Fapa 2 neiin Chawlhhmun Aizawla khawsa an ni. Huan siam hi a tui zãwng niin lehkha a chhiar hnem a, article ziah pawh a peihin a tui hle. Thiamna lamah chuan BA (distn) a ni. kum 1972 aṭanga 1977 chhung khan Principal Assistant to the Chief Minister a chelh a. Kum 1977 khan Indian Police Service a zawm a. Kum 1984 khan Indian National Congress party zawmin Vice Chairman of Mizoram State Planning Board a ni a, hemi kum vek hian INC Party ticket-in MP-a thlan tlin a ni. A hnuah MNU a din a, a hnu lawkah  Mizoram People's Conference nen an inchhunfin a;  chutah chuan working president a ni zui. A hnu lawkah Mizo National Front zawmin Advisor a ni leh a, MNF an keh khan amah zuitute nen ZNP an din a. 2018 MLA General Election-ah party hrang hrang inzawmkhawmin ZPM-ah thawkhovin MLA a ni mek.

India ram baka khawvel hmun dang a fan tawhte chu - Myanmar, Russia, Mongolia, USA, France, UK, Switzerland, Netherland, Jamaica, Estonia-te a ni.

A zuan lawrna anga lang leh IPS; MP; Party Founder, Advisor, Planning Board Vice Chairman etc. a nihna ropui tak tak emaw foreign countries a fan zau lam khi ka tarlan tum a la ni chuang lo.

Mizo politician tam berin Pu Lalduhawma an tluk lohna hote leh amaha awm, quality an lak chhãwn tur ho tê, amah tluka personality ṭha leh effective, efficient  an nih theihna tur  taimakna, dilchhutna, thil chik leh history chhui kawngah leh hriat reng ṭul chi chhinchhiah emaw, relevant document vawn ṭhatah an tluk lo hle niin a ngaih theih.

Kum 2003-a MLA a nih lai leh kumin 2020 8th Assembly Session-a a thusawite leh public platform leh Tv interview, press conference leh press statement, hun tawn lai, hun kal tawh, hun lo la kal tur etc. reng rengah Pu Lalduhawma tluka thil chik peih, dilchhut peih, hrechiang, chhinchhiah peih leh information rintlak fawmkhawm peih kan politician-ho zingah an vang hle niin a lang. Thiamna lamah chuan Pu Lalduhawma hi MA/ Ph.D  a ni lem lo, BA (distn) a ni ve mai. Kan politician-ho zingah amah aia Educational Qualification sang tak tak nei an tam mai thei. Mahse, Pu Lalduhawma an tluk lohna lai point-ah hi chuan an khan lo deuh niin a lang. Ani hian kawng engkim hi a finfiahin a chhût peih a, dan leh hrai (act) hrang hrang a zirin a bêlchiang peih a; hetiang taka a beih thinna leh thil a chîk peih avang hian sorkar fawng vuantute dai pelh leh tihfuh loh te, an hmaih palhte a hmuh chat chat ṭhin avang leh a hun takah a chachhuah chat chat ṭhin avang te, a hun leh hmuna a tuang a tihchhah thiam ṭhin avangin Sorkar chelhtu apiang tan hnawksak leh ngaimawh a hlawh mai mai niin a lang. Amaha awm taimakna, thil chîk peihna, finfiahna, thil chhinchhiah leh document vawn ṭhat peihna quality hi chin ṭhanah nei turin tih tak takna nen kan politician-ho hian bei ve ṭheuh se, Pu Duhawma ang vek hi an ni thei. Mahse, chutiang an ni lem lova, mahni bial mipui dinhmun leh sorkar kalphung pawh hrechiang lo, mahni State budget zat, House-a mahni bill put luh leh GDP pawh hre chiangkuang mang lo hi a tam zawk an nih hmel hle.

Chuvangin, tun tuma Pu Lalduhawma ngaimawhna lo awm nia lang leh Assembly House-ah thu ve tawh rih lo se tih duhna thinlung a rorelpuite aṭanga lo irh chhuak ta nia lang thei pawh hi a thil chhut peih leh chhinchhiah ṭhat peih rah chhuah mai niin a lang. Amah ang tak hian kan roreltute hian rilru sáng tak tak peih ṭheuh se Pu Lalduhawma hi an tluk vek mai dawn a lo ni reng mai.