MLP Rules - Ka hriatthiam loh chu

Mizoten kan buaipui ber pakhat chu zu hi a ni awm e, a in leh in loin kan buaipui hlawm hle. Zu khap burna dan Mizoram Liquor Total Prohibition (MLTP) Act, 1995 chu February 20, 1997 aṭang khan hman ṭan a ni. MLTP Act hi kum 17 zet hman a nih hnuah khap zu zawrh phalna tur bill tia sawi mai Mizoram Liqour Prohibition & Control (MLPC) Bill chu ni 10.7.2014 khan Assembly House-ah pass a ni. 

MLPC Act hmang hian ni 16.3.2015 aṭangin phalna neite'n zu zuarin, phalna neite'n zu an lei thei ṭan a ni. MLPC Act hmang hian hun engemawchen zu zawrh a nih hnuah kum 2018 kum tawp lama MLA inthlanah sorkarna a inthlak a, MNF chuan he dan hi awm tho mah se, dry day rei tak puangin zu zawrh mumal theih a ni lo. Court-a zualkote an awm avangin zu hi hun engemawchen MLPC Act hnuaiah zawrh leh a ni. Mizoram sorkar chuan zu khapna bill The Mizoram Liquor (Prohibition) Bill, 2019 chu March 20, 2019 khan a pass. MLP Act hmang hian April 1, 2019 aṭangin zu khap tum nimah se, election model code of conduct avangin tum hunah khap theih a ni lo. 

Mizoram sorkar chuan MLP Act hman a nih theihna atan May 28, 2019 khan notification a tichhuak a, hemi hnu aṭang hian vawiin thlengin MLP Act hman a ni ta a ni. 

Dan siam a nih reng rengin rules a awm a ngai ṭhin a, a peihfel hun bituk a ni chiah em chu ka hre lo. MLP Bill chu March 20, 2019 ah pass a ni a, MLP Act a lo ni ta a ni. MLP Act atan hian hun engemaw chen rules a awm lo a, sorkar chuan a duanfel hnuah MLP Rules chu December 19, 2019 khan notification hmangin a tichhuak a ni. 

MLP Rules chungchangah hian Excise & Narcotics dept. thuchhuah chuan, "He rules hi The Mizoram Liquor (Prohibition) Act-a hmalak dan tur kaihhruaina a ni," a ti nghe nghe a ni. 

Rules-a tarlan ṭhenkhatte chu chanchinbu lamah tarlan a ni a, khawlai titi leh social media lamah sawi zui a hlawh hle. Chanchinbua a chhuah ni hian Excise & Narcotics Secretary chuan MLP Rules hi sawifiahin, "Chanchinbua inziak kha a dik lo kan ti lo a, a dik pawh kan ti chuang lo," a ti hial a nih kha. 

December 19, 2019-a MLP Rules tihchhuahah ang chuan Mizoramah beer leh wine siam leh zawrh a phal a, hun bikah chuan phalna nei tan country made liquor (zufang, zupui etc. nia sawi) pawh siam theih a ni dawn. Tin, zu lei phalna bik nei thei an awm dawn a, chungmite chuan sorkarin kudam a siamah an lei thei ang.

Chief Minister Pu Zoramthanga chuan, zu khap ṭha an tih avangin zu khapna dan an siam tih sawiin, "Zu kan khap tlat dawn. A zuar chi chuan kan kal dawn lo hrim hrim. Zu khapna dan hi a ṭul angin kohhran leh mi dang dangte nen inráwn tawnin a ṭul ang zela kalpui a ni ang," a ti. 

Pu Zoramthanga chuan, zu khapna dan duan mekah rawtna hrang hrang a awm tih sawiin, "Dan hmasa lama lo awm tawh, zupui leh zufáng ang chite kût nía entira pholante a ṭha em, tihte rawtna a awm. Inrâwn tawnna kalpui mek a nih laiin zu zuar leh tur ang lek leka sawina a awm," a ti a; Mizoram Liquor Prohibition (MLP) Rules tur chu Cabinet-in a ngaihtuah tur thu a sawi. 

Cabinet-in a la ngaihtuah chauh tur ni si ngatinge notification hmanga MLP Rules hi tihchhuah a nih le tih hi a ni. Hman chuan loh tur, a chhunga tarlan turte pawh la ngaihtuah chauh tur rules hi ngatinge tihchhuah a ni tak mai le? 

Ka ngaihtuah chian pauh leh ka hrethiam lo tulh tulh a ni. Eng vanga hman chuan loh tur rules hi sorkarin notification hmang meuha a tih chhuah le tih hi ka inzawt nawn awn awn a ni. Tun hmain rules hman loh tur hi notification hmanga tihchhuah a ni tawh em tih ka hre hauh lo. Kha rules tih chhuah tak kha hman ngei tum niin kei chuan ka lo ngai a, a chhan chu END thuchhuah khan "He rules hi The Mizoram Liquor (Prohibition) Act-a hmalak dan tur kaihhruaina a ni," a ti tlat a ni.

Mi thiam zawkte kan be kual a, notification hmanga rules tihchhuah a nih tawh chuan sorkarin a pawm tawh tihna a nih thu min hrilh a, "Draft a ni thei lo notification a chhuah tawh chuan. Sorkarah an thawn anga an lo pawm a tih danglam duh an neihho an tih danglam hnuah notification-ah an tichhuak ang," tiin min chhang. 

Mah se, thil chiang ta chu kan ram hruaitu lu ber Chief Minister-in MLP Rules chu Cabinet-ah ngaihtuah tur thu a sawi avangin, notification hmanga tihchhuah MLP Rules hi hman a ni dawn lo tih hi a ni. Tin, Mizoramah zu khap tlat a la ni hrih dawn tih pawh a chiang a, sorkarna inthlak hun a la awm thei a, chung hunah erawh sawilawk theih a ni lo. 

- Malsawmdawngzela Hrahsel