RALTE TRIBAL KAN NI LO..!

Kum 2019 daih tawh khan IMPERIAL COLLEGE, LONDON aṭangin Prof. Gari Hampson-a hnuaiah Ph.D ti turin offer ka dawng a. Ministry of Tribal Affairs-in kum tin State tina thiam leh tirh tlaka a ngaihte State khatah Tribal zingah mi pakhat emaw lek lek Mi 17 All India aṭangin Ph.D, post doctoral etc ti turin a tir ṭhin tih ka hriat avangin Ministry of Tribal Affairs-ah min sawmna leh thil pawimawh dang (Offer Letter leh Research Synopsis) te nen Full Funded Scholarship ka dil a. Kha mi kum kha Covid-19 vangin kan inter­view ta lo niin ka hria.

A kum leh 2020 ah Interview turin Delhi-ah min ko a, a chawpchilh tawh lutuk avang leh Dubai lamah hna ka neih tho avangin kal loh mai pawh pawi ka ti lova, chhungte Covid avangin DC office lam dawr tur an awm lo nen.

Vanneihthlak takin ka Fb ṭhian Dr Becky Vet Khiangte hian ka Tribal leh Residential Certificate Kolasib DC aṭanga min lo laksak bakah Delhi-ah min lo thawnsak hlauh a, hmanhmawh lutuka Dubai-Delhi air ticket lain Delhi-ah ka interview ta a. Ka document an han check a, thil fel lo a awm thu min hrilh ta a. Ka Tribal Certificate chu an lo pawm lo a lo ni a. Ralte tribe belong to Mizo (Ralte) tih khan alo indah a, Ralte kha Mizoram Tribal List ah kan lo awm lo chu niin... Ministry of Tribal Affairs a Deputy Director HP Jaiswal khan State zawng zawng Tribal list min rawn thawn a, Ralte kha eng Tribe list ah mah kan awm loh avangin sawi fiah (clarify) turin min rawn ti ta. Ralte belong to Mizo (Any Lushai Tribe) tiha dah turin Kolasib DC lam ka ngen a, ka ngen ang chuan min rawn tihsak nghal vat a.

Amaherawh chu, Central Ministry lam hi an fimkhur em avangin Any Lushai Tribe tih hian eng chin nge? Eng hnamte nge a huam, tih zawhna ka dawng leh a, kei atan chhan mai chi a ni ta lo. Kolasib DC office lam pawhin Tribal List siam/tih ṭhat vek a nih loh chuan tih ngaihna vak kha an hre ta bik lo a nih hmel. Ka interview result a chhuak a, hnawl ka ni ta a. Hna ka neih tho avangin Ph.D tih zawm leh kha ka chak vak lo nen ka buaipui zui duh ta bik lo a.

He thil (Ralte) hi Mizoram tribe list a kan awm loh chungchang hi ka ngai serious zui ta vak lo a. Hmanni lawk khan ka Fb ṭhian pakhat, Huna Kawlvawm hian post serious tak a rawn siam takah chuan kum 3 liam ta khan Ralte hi Mizoram Tribal list kan nih loh avangin Central Ministry-in min lo hnawl daih tawh tih hi rawn sawi thar leh hrim hrim hi ṭulin ka hre thar leh a.

Ralte hnam zingah Tribal Category nih loh vanga hnawl hmasak ber ka ni ang em tihte ka ngaihtuah leh hnuhnawh a. Chakma te Mizoram Tribe list-ah a hmasa ber (alphabetical order a ni thei) a an awm laiin Mizoram hnam hlawm lian ber zinga mi RALTE erawh Mizoram tribe kan lo awm ve hauh lo nia.

Keimah anga midang zelin harsatna an tawh lohna turin Mizoram TRIBE LIST hi siam ṭhat hmanhmawh a ngai hle mai.

Mizoram TRIBE LIST hi India ram Indepen­dent hnu maia Constitution duangtu Dr. BR Ambedkar hoa duan a nih lai khan Assam chhunga awm kan ni a. Mizoram tribe list nei tur hian Assam Sorkar khan kan Mizo mithiam hmasate an rawn lo a ni hial ang em, nge an rawn te hian RALTE hnam hi an hmaih lui zawk ang tih zeldin thu mai lo chuan hriat chhuah theih a ni tawh lo.

Eng pawh ni se, Mizo­ram TRIBE LIST ah hian RALTE hnam chauh lo pawh hmaih an awm nual niin a lang. Hualngo, Khiangte, Chawngthu, Renthlei, Pang te hi lang lo langsar te an ni. Mizoram tribe list serial number 13 ah hian "Any Mizo (Lushai Tribe) tih hi awm mahse he" any" huam chin hi a chiang lo.

Lakher (serial no 8) an awm a, Lakher aiah Mara tia thlak a ngai. Hetiang tho hian Pawi (serial no 13) ami hi Lai tia thlak a ngai bawk.

Mizoram TRIBE LIST a awm lo hnam hian Scheduled Tribe tana seat hauh (reserved consti­tuency) an chuh hi a rem ang em? - (Zela Ralte with Huna Kawlvawm)

- Zela Ralte