PASALTHA

Kan thupui tur hi tunlaiah chuan kan hre ngai tawh lo ang. Tun hma kha chuan pasalṭha ho kha chu mihuaisen, sa leh ral hmaa zam ngai lo, a ṭul huna nunna pawh hlan ngam an ni. Ramin a thlamuanpui a, nunau pawhin an thla­muan pui ṭhin.

Tunah chuan pasalṭha kan han tih ang chi ho kha chu kan nei ta meuh lo, a ṭul tawh vak lo a ni mai thei. Mahse, a chi dangin kan nei; chungte chu chawimawina sang dawngtute, mi hmingṭha doctorate degree an pekte leh award hrang hrang dawngtute hi an ni.

Ngaih­tuah mai chuan award, etc., hi a ho kan ti mai thei, mahse, dawng thei tura an tehna han thlir chuan thil namai a ni lo. Chuvang chuan hmanlaia pasalṭha kan tih thin kha an tluk ve reng a ni.

Kan ram din­hmun – Mizoram dinhmun hi a ṭhen chuan kan hre chiang viau mai thei. Nitin chaw chhum tur chu kan nei a, chawhmeh kanna tur tel kan nei a, gas kan nei bawk a. Mamawh leina tur pawisa kan nei ṭek ṭek a, kan thla a muang ve viau mai. Mahse, Silchar kawng a pin chuan kan buai zel.

Sorkar - Pawisa hi a tam emaw tam lo emaw a hmangtu a zir a ni a. Miin inrenchem taka sum a hman chuan bat ngai lovin a khawsa thei dawn, saving tur hial pawh a nei thei ang. Awle, sawrkar hian sum a hmang thiam kan ti ve em le, leiba te hi a ngah hle mai, eng emaw deuh lai phei kha chuan a hnathawkte pawh hlawh a pe hlei thei lo.

Party – Party tin te kan pawimawh, in kutah Mizoram hi a awm a ni. Zu rui chunga thil in tih chuan kan ram tan a pawi zel dawn. Policy, manifesto, siam leh duan danah te ram tana ṭha lo tur ang chi kha chu, vote hmuh theihna tur pawh nise iti lo ngam ang u.

Kan campaign dan te pawh kan fimkhur thar a ṭha. Min vote tu tur kan zawnnaah pawh Pathian lam ṭang ni ngam ang u.

Mipuite – Eng vangin nge ram ropui leh thil ti thei, Russia hian ram dangte ṭanpuina dil kual mai mai Ukraine a ngam hleih theih loh kan tih chuan, ram hruaitu huaisen, nunna pawh hlan ngam an nei a ni. Chuti ni lo se chuan vawiinah Ukraine ram chu hriat tur a awm mumal tawh lovang.

Pasaltha ni turin mi bik deuh nih a ngai. Awle, kan ram inthlanpui kan hnaih ta hle mai, reiloteah Mizo mipuite mizia alo lang leh dawn.

Vawiinah kan zavaiin pasalṭha kan ni thei ṭheuh a, Mizoram tan pasal­ṭha nih i tum ang u. Pasalṭha chuan mi fak leh chawimawi a hlawh a, hriatreng a hlawh ṭhin a ni. Pasaltha, huaisen i lo nih theih dan awlsam te chu, fair taka vote i thlak mai khan a ni e.

- Lalchhandama Colney