RUIHHLO ADDICT ZINKAWNG

Ngaihtuahnain a ngainat zawng tih atan a duhte chu kan han ti a, chu thil chu nitin zan tin kan tih chhunzawm zel chuan chin dan ṭhanah neiin, kan taksa tana ṭha lo tur kan hriat rengte pawh kan lo addict ta mai ṭhin.

Eden huan aṭanga kan neih ngaihtuahna chi hnih kan taksa leh nunna atana ṭha tur leh ṭha lo tur a awm tlat a, heng pahnihte hi englai pawhin an inmil ngai lova, ngaihtuahna ṭha lo zawk hian rilru fim a neih loh avangin kan taksa tana ṭha tur leh ṭha lo tur pawh a thliar thiam lova, a duhzawngte chu a va um zel a. Ngaihtuahna fim chu a fimkhur hle a, thil a tih hmain ngun takin a thlithlai phawt ṭhin.

Mi zawng zawng hian addict kan nei a, kan taksa tana ṭha tur leh ṭha lo tur te an ni. Tunlaiah addict kan tih hian rilru in a tin zawn ber chu ruihtheih thil addict-na hi a ni.

Ruihtheih thil kan lo addict ve a nih chuan hetiang hi ka khawvel hman dan chu a lo ni. Ka thin­lungah chuan hengte hi a awm tlat a, zawngchhangna te, tih leh chakna te, duhna te, beisei tlatna te, a tel lova khawhar riauva inhriatna avang te hian kan duhthlanna sual chuan, kan taksa pengte chu inthurual ang maiin ka addict thilte chu a khawih tir zung zung a, sim turin rilru fim ka hman ngai loh avangin sual chuan ka rilru leh taksa a bual a zo tawh a. Tun hma angin Lalpa thilsiam mawina leh a hriatna te chu ka taksa chuan a chhim pha tawh lova, nun zalen tak nia ka inhriat laiin sualin min lo awp bet reng mai a ni.

Ka hmel leh taksa a lo chhe zo a, thahrui kan nei lo, miten min endan a hniam a, mumang chhia ang maiin ka nun chu a harhfim lova, a nuam emaw ka tih thinte chu a ka rilru mai a lo ni. Thil ṭha tih ka duh laiin ka taksa chuan thil ṭha lo a khawih zel a, ka rilru chhungril a rum tlawk tlawk a, thil ṭha tih thawm ri te chu hla taka awm ang a ni.

Tuman min awp bet lova, keimaha awm ka duh thlanna sual vang vek a lo ni. Ka balin ka rimchhia a, ruk ka lo ru a, mite leh chhungte tan hnawksak mai ka lo ni ta, ka thaw a ipik a, thih mai ka duh a. Mahse, chutih lai chuan Setana’n hremhmunah min sawisak tumin mi a lo chang reng a. Ka hriatna fim tak awm chu phum beh ang maiin, che chhuak thei lovin a awm a ni.

Ka thinlung chhung­­ril chu ka han inbih chiang a, min dintu ka LALPA chuan ka taksa tluchhe ṭep tawh chu a lo la chelh ding reng a, ka thinlung kawngka bulah dingin ka koh hun nghakin min lo chang reng a.

Zing varṭianah chuan ka mutna khum aṭang chuan ka harh hlawl a, tukverh ka hawng a, hmai ka phih fai a, rilru fim ka hmang ṭan ta. Hrehawm tihna leh inchhirna nen nun thar neih duhna ka lo nei ta. Kut phar meuhin chunglam ka thlir a, thawk ka la a, LALPA hnenah ngaihdam ka dil rualin, ka nun chu din thar leh ka dil a. Chu veleh min nghak rengtu chuan min lo pawm thlap mai a, nun thar min chantir ta bawk a.

Ka taksa in a chhiat hlen phah hmaa ka sim thei hlauh chu ka tan van­neihna a ni. He ka nun thar inṭan lehna hi ka theih­nghilh ngai tawh lovang.

“Zoram pasalṭhate tha thlah lovin thawk ru” Ruihhlo bawiha tangte chhanchhuak zel ila, Chutin Zoram nuam i din thar leh ang u.”

- Neihchungnunga, Durtlang North