LUNGLEI MUNICIPAL COUNCIL INTHLAN RESULTS THLIRNA

Lunglei Municipal Council (LMC) election results chu ni April 3, zing dar 10:00 am aṭanga chhiar ṭanin, chawhnu dar 1:35pm ah result puan kim a ni a. ZPM chuan seat 11 la vekin LMC term hmasa berah opposition awm lohna council an siam ta. A pumpui a vote tla hi 30117 a ni. Heta ṭang hian state a ruling party MNF-in 8858 (29.41%) hmu in, INC in 6037 (20.04%), BJP in 226 (0.75%), NOTA ah 144 (0.47%) a tla a ni.

ZPM hian sorkarna siam turin vote tla zawng zawng aṭangin 14852 (49.31) an hmu pha a. In hnehna sang ber chu Ward VIII ah thlengin, ZPM candidate chuan amah hnaih bertu MNF candidate chu vote 904 in a hneh. Inhnehna tlem ber chu Ward IV ah niin, ZPM candidate in amah hnaih bertu INC candidate chu vote 109 in a hneh a ni.

LMC election vawikhatnaah hian ZPM candidate parukte chuan an ward ṭheuha vote tla aṭanga chhutin 100 ah 50% an hmu kai vek a, hetih lai hian ruling party MNF candidate zingah 40% hmu kai an awm lo. INC candidate zingah pawh 30% hmu kai pakhat chiah a awm. BJP candidate te erawh a lungthu tikimtu mai an ni rih e.

Tun election ti ngaihnawmtu chu Ballot vote tla 269 aṭangin ruling party in vote 72 (26.76%) chiah an hmu hi a ni. Hetih lai hian ZPM chuan vote 148 (55.01%) an hmu. Heti tak maia sorkar hnathawkte ah ruling party an tlak nat loh chhanah hian regular taka hlawh an lak tlai nghawng pawh a ni thei. Tun LMC inthlana party lian pathum dinhmun tawite in han en thuak dawn i la.

MNF

Headquaters lam aṭanga theihtawp chhuaha an lo insawh phei chung pawha tun LMC inthlana ruling party heti taka an chet chhiat chhan hi ngaihtuah chian ngai tak a ni. LMC Ward 11, veng 24 ah sorkarna an siamna veng 12 a awm a. Kum 2020 VC election a vote tla aṭanga 42.71% an hui theihna leh chiang taka chakna an channa veng pahnih (Ramthar, Farm Veng) LMC Ward VIII, Lunglei East bialtu chenna veng tel bawkah tun municipal inthlanah hian vote tla aṭangin 26.29% chiah MNF in an chang a ni.

Chutiang deuh bawkin Lunglei South bialtu chenna LMC Ward IX, kum 2018 MLA leh 2020 VC election a MNF in vote an hmuh tamnaah pawh tun election-ah vote tla aṭangin 31.68% chauh an chang. Chutiang zelin Ward I, Lunglei North bialtu chenna veng leh Ward III, Lunglei West bialtu chennaah pawh kum 2018 MLA election leh 2020 VC election aiin MNF dinhmun a hniam ve ve a ni.

Kum tawp maia State Assembly election vawi kuana hmachhawn tur kan nihna laiah ruling party tan chuan heng LMC-in a huam chin venghoah ṭan lak thar a ngai nasa tih a hriat a. Lunglei mipuite rilru an hliam tawhna thawi dam thei tur hmalak dan thar ṭha tak an duan chhuah thiam pawh a pawimawh awm e.

INC

Mizorama national party hlun ber leh an dinhmun ṭhatna ṭhinah beiseina sang tak nena party hotu lawkten awmchilh hiala ṭan an lakna in awmzia a nei thui ta lo hi ngaimawh tham a ni. LMC area chhung veng 8 a party mala VC an siam chung pawha an vote bank a kiam hi siam rem vat a ngai a. Kum 2018 Assembly leh 2020 VC election a an dinhmun an phak lohna hi tam tham tak a ni. INC vote bank kiam duak hi ZPM hian an chhawr ber em aw tih theih a ni.

State Assembly term hmasa pahnih kum sawm (2008-2018) chhunga nghet taka an tlinna leh dinna ṭhin aṭanga 20% votes an hmuh kai lohna Ward a awm nual hian an dinhmun dik tak pawm thiam a ṭulna a tilang. Chutih laiin state leh local election a inang lohna changchawia ngaih ṭha taka inkuangkuah san an theih lohzia an hriat tharna ni bawk se. Hruaitu thar hnuaia an phur chhohna hian grassroot level thlengin Lunglei hi al hneh zual se, awmzia thui tak a la nei thei mahna.

ZPM

Party mala LMC area chhung veng pahnih chiaha VC nei ni chunga heti tak maia LMC election a hnehna an chang hian chhan a neiin a lang. Mipui nawlpuiah sorkar tawh leh sorkar lai ninna (anti-incumbency) a nasa tih tun election hian a ti lang.

LMC inthlan atana party hrang hrangte candidate enin ZPM party candidate te kum a naupang hlawm a, a upa lamte pawh politics-ah experience nei lo an ni deuh vek a. Chutih laiin zirna lamah erawh party lian dangte nena khaikhin chuan an sang zawk fu hlawm.

MNF leh INC candidate tam zawk hi chu Mizoin pa/ nu valai kan tih tur ang chi leh VC member nilai leh lo ni fe tawh an ni fur. Tin, an telna party block/ unit hruaitute pawh an ni hlawm awm e. Veng chhunga mi hriat hlawh, khawtlanga kum tam lo inhmang tawhten ZPM candidate naupang takte leh first timer ho an hneh lo hi mipuiten ZPM ah sorkar ṭha pangngai tak siam turin beiseina sang tak an nei tih leh party ngai pet pet thlak duhna rilru mipuiah a awm tawh tih a tichiang.

Hei hi a chianna chu Lunglei mipui nawlpuiin ZPM an support chhan hi zawt ta hlawm ila, an policy leh programme lo chhiar aṭanga lo duh tak hluai avanga vote pe hi an tamin a rinawm lo. Ṭhalai leh upa lam awn star campaigner avang te pawn neutral voters ten an bawh na lai a awm bawk awm e.

Table en hian ZPM vote bank hi neutral voters te an ni a tih theihna chin a awm. Ward V han en hian kum 2018 State Assembly election ah ZPM-in vote tla aṭangin 26.17% an hmu a, kum 2020 VC election-ah phei chuan an tlahniam dawrh a, tun inthlanah erawh neutral voters te vang tih theih khawpin 43% ah an sang ta dawrh a ni. Ward hrang hrang vote tlak dan en pawn neutral voters te pawimawhzia a hmuh theih awm e.

Heng table a kan tarlan inthlanah te hian vote nei zat leh tla zat inang lo zut mahse political party te dinhmun hmuh thiam nan erawh a hman theih na chin a awm awm e.

LMC election results vang hian ZPM hi an phur thar dawn a, chutih laiin Lungei lam Assembly constituencies ah Lunglei khawpui bakin a tuam chin hi a tam tham hle a. Hengah hian block/ unit nghet tak din a pawimawhzia chu an party hruaituten an hre zawkin a rinawm.

Constituency khat meuh enkawl tur thlanna kumin kum tawp maia awm turah hian candidate tur an thlan uluk a ngai dawn hle mai. ZPM enkawl tur LMC hi mipui phur ti rit lutuk lo zawnga kalin, ZPM wave hian Lunglei-ah 2023 State Assembly election thleng daih thei ang maw?

- R. Vanlalhmangaihsanga, Ph.D Scholar, Dept. of Pol.Sc
Mizoram University