Kan ram hi kan ram a ni

Pu Lalṭanpuia hla thupui hmang hian thu thiam tak ni lem lo chungin rilrua thu lo awm hi puang chhuak ve turin a turin min tur a. Mizoram hi kan ram neih chhun a nih si chuan engvangin nge kan ram neih chhun hi kan enkawl ṭhat loh le? tih zawhna hi ka inzawt ṭhin.

Patling ka ni a, mahni pualin huan ka nei a, ka huan enkawlna tura sum lo kal hi thil dangah ka hmang duh miah lo ang, ka huan atan k hmang zo vek ang, ka huan chu ka ta a niha ka hmangaih tlat vang a ni. Mizoram tana pawisa lo kal, Mizoram hmasawnna tura sum rawn lut tawh ni si kan han hmang ṭha duh tlat lo leh kan pawt peng a, kan hmang sual a, kan eiru duh hi chu a mak zozai a ni.

Politician ṭha tehna hi Central YMA background nei, MZP hruaitu hlui, mi lar, Kohhran Upa, lehkha thiam tih a nih chhung chu kan ram hian hma a sawn lo ang. Politician ṭha tehna hi mahni kalna kawnga mi dik, ram hmangaih ni se a tawk ang.

YMA hruaitu hlui ram hma­ngaih emaw kan tih hausa chak em em politician kan nei a. MZP hruaitu hlui ram hmangaih tura ngaih an eiru ngei nia an thil neih aṭanga teh theih politician kan nei tawh bawk.

Kohhran Upa ni si an Department enkawlna kawnga rin hlawh miah lo Politician kan nei a. Lehkha thiam em em ni si sorkar lama an thiamna hmuh theih chuang loh Politician kan nei bawk. Kan ram hruaitute qualifica­tion leh an hnathawh duh dan hi a inmil tlat lo a ni.

Kan ram hian a mamawh chu a taka hmangaihtu a ni. Hmangaihtu han tih hian mahni Party hmangaih avanga mipui chhan ngam lo ni lo, mipui dah hmasa ngam Politician dik kan mamawh a ni.

Party hrang hrang hi en ta ila mi ṭha leh fel hi an nei a ni. Heng mite hi tuna Party System ah hi chuan an ṭhatna pawh a hmuh theih loh. Chu Mizoram kal dan chuan kan kal zel a nih chuan kan hmasawn loh dan hi a thui dâwn a ni.

Hmasawn kan duh chuan midik kan mamawh. Hmasawn tur hian lehkha thiam pawh kan mamawh lo, Kohhran Upa leh NGO hruaitu hlui pawh kan mamawh lo, tuna kan neihte hian hma min sawn pui si lo; hmasawn tur hian a taka mi dik kan mamawh ber tih hi ka thinlunga lo lut chu a ni.

Pu C Lalṭanpuia sawi ang hian Kan ram hi kan ram a ni a, Vaiho ram pawh a ni si lova i hmangaih ang u, i enkawl ṭha ang u, kan ram hi kan ram a ni si a.

- C. Lalthansanga