Sorkar puipunnaah zu a zalen II

March 10, 2023 Vanglaini chan­chinbu article rawn chhuak 'Sorkar puipunnaah zu a zalen' tih kha ka rawn tui hnih duh a, a part II ka rawn ziak ve dawn a ni.

Mizoram hi dry state ni si sorkar milian inhmuh khawmnaa zu an in theihna state a ni a, Assembly House-ah Congress MLA Pu Zodintluanga phei chuan Chief Minister fapa restaurant-ah zu a lam theih thu a sawi chhuak ngam a, Pu Zodintluanga hi an khing ngam miah lo a ni.

Ziaktu hmasa Maremmawia tih khan Aizawl Day lawmna lammualah khan zufang an zawrh thu te, B20 Meeting zawha mi pawimawh Dinner na lamah zu changkang an chhawp thute kha mi sawi a sawi chhawng a. Kei chuan ka hriat chian angin ka rawn ziak ve thung dawn a ni.

Kan ṭhiante hi Aizawla catering titu langsar pawl tak niin sorkar officer pawl hrang hrang General Conference leh Annual Meeting ah te hian an kal fo a, "Officer pawl 50% aia tam hian chaw ei dawnah zu inna bik siamin an in ṭhin a. Zu ṭha chi hi an chhawp a, zu hi a zalen a lo nih hi," a ti a ni.

Kan sorkar hian zu hi a khap zel anga Mizo tlangvalte hian zu chhia an in zel ang a, mi thiltithei fa te chuan zu changkang an la lut thei tho si ang a, a lalut ve thei loin local zu siam, quality chhe tak tak an in reng thung ang a, kan thi phuk phuk dawn a nih hi. Zu khap ngam sorkar hian zu a tirêm leh ngam si lova zu chhia an zawrh tir tih hi a nihna dik tak chu a ni ta ber mai.

Zu chhe tak tak tamna ramah hian sorkar hian zu do turin a takin hma la ve tawh se, zu hi a tirêm thei a nih loh chuan a lema zu khap hi chu sût a hun tawh a ni. Kan tlangval rual an thih zawh hma hian.

- Lalhmunsiama,

Chanmari West