NATIONAL ELIGIBILTY ENTRANCE TEST (NEET-UG) CHUNGCHANG

NEET-UG hi buatsaih a nih hma chuan State hrang hrangten an quota neihna hmuna Medical course hrang hrang zir tur thlan nan Common Entrance an buatsaih ṭhin. Medical College ṭha bik – AIIMS, JIPMER, CMC etc te chuan an College a lut turte tan a hranpa hlakin Common Entrance an buatsaih ṭhin bawk.

India ram chhunga Sawrkar, Private leh Kohhran enkawl a MBBS, BDS (Dental) and AYUSH (BAMS, BUMS, BHMS) te zir turte thlanna (Common Entrance) hi National Eligibility Entrance Test (NEET-UG) a ni. NEET-UG pass lo tan MBBS/ BDS/ AYUSH a zir theih a ni lo. Mahse, NEET-UG pass ringawt avangin MBBS, BDS etc seat an chang kher lo, Mizoram sawrkarin seat kan neihte chang tur chuan NEET-UG exam-ah a ti ṭha zingah tel a ngai a ni.

NEET-UG hi kum 2012 aṭanga buatsaih tan tura tih a ni laiin, State tam takin an sawisel avangin kum 2016 aṭangin neih ṭan a ni. A tirah chuan Central Board of Secondary Education (CBSE) in a buatsaih a, kum 2019 aṭangin National Testing Agency (NTA) in a conduct ta a ni.

NEET-UG hi kum khatah vawi khat exam ṭhin a ni. Paper leh pen hmangin, Offline a exam a ni. Exam pattern hi tih danglam fo a ni. Kum 2023 ah hian 7th May 2023 (Saturday) ah NEET-UG hi exam tur a ni.

NEET-UG ah hian a vaiin 200 multiple choice questions a awm a, chuta ṭang chuan 180 questions chhan tur a ni. NEET-UG ah hian subject pali – Physics, Chemistry, Botany leh Zoology an awm a, subject pakhat ṭheuh hian 180 marks a keng a, a pumpui total mark hi 720 a ni. Question pakhat chhan dikah 4 marks pek tur a ni a, pakhat chhan dik lohah 1 mark paih thung tur a ni. Exam hun chhung hi 3hrs and 20 minutes a ni ang.

India ram pumah hian NEET-UG exam centre 546 a awm a, India ram pawnah pawh Centre hi 14 lai a awm bawk a ni. India ram ṭawng hrang hrang 13 hmangin a exam hi pek theih a ni a, mahse, exam zinga 80% velin English an hmang.

Mizoramah chuan Aizawlah chauh exam centre a awm ṭhin a. Mahse kum 2022 aṭangin Mamit hi exam centre turah a rawn ti tel a ni. Mamit a rawn tih tel chhan chu aspirational District a nih vang a ni. Aizawlah chuan zirlai exam tam dan a zirin Institution hrang hrang - PUC, HBC, ANC, KV School Thuampui etc ah te exam ṭhin a ni. A tlangpuiin NEET-UG exam hi mi 1500 vel Mizoram aṭangin an awm ṭhin a ni.

India ram pumah NEET-UG exam hi a kum telin an pung thung a, kum 2022 ah khan mi 18 lakhs velin exam hi an pe a ni. Kum 2023 ah phei chuan nuai 19 a tling hial tawh mai thei. India ram pumah Medical College hrang hranga NEET-UG kaltanga seat awm thei zat chu hetiang hi a ni. Hei hi kum tinin a danglam hret hret ṭhin a ni. MBBS – 98,013, BDS – 27,868 & AYUSH – 50,720 te an ni. Chung seat awm te chu mi nuai 18 velin an inchuh dawn ṭhin a ni.

NEET-UG 2021 ah hian India ram puma pakhatna Mrinal Kutteri, Telangana State a mi chuan 720 (full mark) a hmu. Mizoram aṭanga ti ṭha ber chu Kevin Lallianzama, Hualngo Hmun a ni a, ani hian mark 451 a hmu. Schedule Tribe zingah 1697-na niin All India Ranking-ah phei chuan 132828-na a ni pha chauh a ni.

NEET-UG 2022 ah India ram puma pakhatna chu Tanishka, Rajasthan state a mi niin, 715 mark a hmu. Mizoram aṭanga ti ṭha ber chu Siddharth Chhetri a ni a, 499 mark a hmu. Mizo naupang zingah Lalhlimpuii, Khatla in 429 mark hmuin a ti ṭha ber a. Schedule Tribe zingah 1859-na a ni a, All India Ranking-ah chuan 149369- na a ni pha chauh. NEET-UG 2022 ah hian Mizoram aṭangin mi 408 in an pass. Cut of mark hi 93 a ni. MBBS seat hmu zinga NEET score hniam ber chuan 280 mark a score a ni.

Tun dinhmunah Mizoram Sawrkar hian MBBS seat hi NEIGHRIMS, Shillong-ah - 3 seats, RIMS, Imphal-ah – 7 seats, Govt Agartala Medical College ah – 2 seats leh Zoram Medical College ah - 70 seats kan nei a. BDS hi seat 10 kan nei a, AYUSH-ah hian seat 3 kan nei bawk. Mizoramah Medical college kan neih aṭanga hian Central Pool aṭanga MBBS seat kan hmuh ṭhin kha tih tawp a ni tawh. Medical College kan neih hma kha chuan MBBS hi 35 seats vel kan nei ṭhin a, tunah chuan 82 seats kan nei ta. Seat kan neih zat hi a pung a, mahse college ṭha tak tak seat kan neihna ṭhinah khan kan nei ta lo thung a ni.

India rama state lian zawkte khu chu han tluk phak chi an ni lo. Mahse, North East States – Meghalaya, Manipur, Nagaland, Tripura etc a mite nen khaikhinin, Mizo naupangte NEET-UG a an mark hmuh hi a la ṭha tawk lo hle. Govt Medical College and State Medical College zawng zawngte hian an seat neih 15% hi Central Pool (Govt. Of India) ah an chhung lut a. Chuta aṭanga 7.5% hi ST tan hauh sak a ni, chumi seat chu han chang pha Mizo zirlaite zingah kan la tlem hle a ni. Chubakah, NEIGHRIMS, Shillong ah khuan MBBS seat 18, NE state hrang hranga zirlaite in chuh theih a awm a, chu pawh chu Mizo zirlaite hian kan la chang pha ngai lo bawk a ni.

College ṭha zawka MBBS zir thei turin kan zirlaite hi tun aia nasa leh zuala an zir a ngai hle a ni.

- Dr Zirlianngura