Sorkar puipunaah Zu a zalen!!!!????

Zu khap burna state-ah sor­kar hriatpui prog­ramme pathumah tun hnai khan zu a zalen hle tih in lo hre ve ang a. Aizawl Day, Lam­mualah khan Zufang an zuara an hralh chur chur mai.

G20 hnuaia B20 meeting-ah khan Zufang hi a lar leh hle a, Chapchar Kutah pawh hralh tla ber a ni tho. Zu khap hi hlip law law ila zu ṭha hi kan ṭhalaite hian in ve tawh zawk rawh se.

Kawra hmanga vote duh vanga zu khaptute an sorkar mek a, zu lah chu tihrem tak tak tum hian an bawhzui duh si lova, a khapna dan khauh chiah an siam a an ti rêm thei chuang bawk si lo. Zu chhe tak tak duh zat zat lak tur a awm reng a, kan thi ta phawk phawk mai a nih hi.

Zufang hi kan Mizo zu a ni a siam leh zawrh hi phal law law se, function hrang hrang ah an zuar ṭhin tho sia. Zufang an phal ang chiah hian Mizo zu pangngai Zupui pawh zawrh phal tal bawk se, Asenchi zawrh an phal lo a nih pawhin, tichuan Mizoram tan sum hnar ṭha tak a ni ang.

Tunah chuan Rangvamual, Phunchawng, Tuikhurhlu etc lama sorkar dan awmze nei lo bawhchhe huai huaitute an hausa thur thur a. Sorkarin chhiah pakhat mah dawng loin zu zuar an lian tawlh tawlh a, kan tlangvalte an chawrche tawlh tawlha, tun hnaia mipa thih tam chhan hi zu zawrh vang ni loin zu khap vang a ni zawk a ni.

Mitin kan zuk hmu ve loa G20 Dinner-ah pawh zu chu an chhawp reih ruih an ti a, a taka kal ngei min hrilh a ni. Chuti a nih a hnu mi pawi­mawh tana zu a awm chuan Mizo tlangval tan hian zu ṭha hi a awm ve a hun tawh viau a ni.

Zu zawrh ang kha kan ngam loh pawhin Mizo zu zawrh ngam a hun tawha lemchanga zu khapa tihrêm tuma bawhzui leh si loh hi chu vote zawnna mah mah a lo nih hi.

- Maremmawia