COMPUTER PROFICIENCY IN LDC POST

Tunhnaia Law & Judicial Department, Environment Forest & Climate Change Department bakah Health & Family Welfare Department in LDC hnaruak advertisement an tihchhuahah te khan Computer thiamna ngaiah, Mizoram State Council of Technical Education pawmpui zirna In aṭanga Diploma in Computer Application/ Certificate in Computer Application zir chhuak te chauh pawm an nih thu ziahlan a ni a. Hemi awmzia chu B.Tech, Computer Engineer, BCA, MCA, BE, ME, NIELIT hnuaia CCC, CCE+ bakah MSCTE din a nih hmaa computer zir chhuakte leh phailam aṭanga computer zir chhuakte pawh hnawlin MSCTE hnuaia zir chhuakte chauh khan LDC post an dil thei dawn tihna a ni.

DP&AR in Notification a tihchhuah Post service/ recruitment rules (amendment), 2016 notified vide No.A.11013/1/2013/-P&AR in a tarlan danin, Group A, B & C hna lâkna reng rengah NIELIT hnuaia CCC+, Expert Computer Course (ECC) or Bachelor's degree in Computer Science/ Computer Application/ Information Technology/ Electronics degree from a recognised from University te hi pawm la ni a. Nimahsela, 'The Mizoram Ministerial Service Rules, 2021 siam thar a nih tâk hnuah MSCTE hnuaia zir chhuak kher tih a ni ta a ni.

MSCTE lo pawh India ramah computer zirna tam tak a awm, Mizoramah ngei pawh NIELIT, MZU etc kan nei. Heng aṭanga zir chhuakte hnawla pvt institution aṭanga zir chhuak kher an duhsak tlat hi a dik lo hulhual a ni. A bikin computer lama degree sang tak nei, LDC hna lâkna atana an pawm (i.e DCA/CCA) degree nei tura zirtir thiamtute tan rilru nat ngawih ngawihna tham a tling. Mahni zirlaiten LDC an dil theih laia a zirtirtute zawkin an dil ve thei miau si lo a.

Aspirant zingah sorkar hian eng vanga certificate pakhat chauh pawma, a dang zawng chu hnâwl tlat nge a nih tih zawhna a tam hle a. Keimah ngei pawn RTI kaltlangin Law & Judicial Department leh Environment Forest & Climate Change Department te chu ka lo zawt tawh nghe nghe a, ka zawhna leh chhanna chu a hnuaia mi ang hian:

1. Law & Judicial Department-in 6th December, 2022 a LDC & Group D lâkna tur advertisement a tihchhuahah khan BCA, B.Tech etc degree holder hnâwl/ reject an nih thu ka lo hria a. Reject/ hnâwl an nih chhan hi eng vang nge ni ang?

Chhanna : Group ‘D’ atan overage leh Class- VIII certificate nei lo te chauh hnawl/ reject an ni. LDC post te hi Mizoram Ministerial Service huam chhunga awm an ni a. He post hnawhkhahna tur atan Service Rules hman lai ‘The Mizoram Ministerial Service Rules, 2021 in a phut angin heng a hnuaia qualification nei te hi pawm a ni.

i) Higher Secondary School Leaving Certificate from recognised institution.

ii) Diploma in Computer Application/ Certificate in Computer Application from institutions recognised by Mizoram State Council of Technical Education (MSCTE).

iii) Working knowledge of Mizo language atleast upto Middle School standard.

Hemi avang hian BCA, B.Tech, etc degree holder te hi an degree lakna/ zirna institution te MSCTE recognition an neih loh vanga hnawl an ni.

2. DP&AR letter Post service/recruitment rules (amendment), 2016 notified vide No.A.11013/1/2013/- P&AR in a tarlan danin, Group A, B & C hna lâkna reng reng ah, NIELIT hnuaia aCCC+, Expert Computer Course (ECC) or Bachelor's degree in Computer Science/ Computer Application/ Information Technology/ Electronics degree from a recognised University te hi a pawm niin ka lo hria a. Heti chung hian department hian LDC hna lâknaah hian eng vanga BCA, CCC (NIELIT) etc te hi pawm lo nge a nih?

Chhanna : DP & AR Notification No.A. 11013/1/2013-P&AR (GSW) dt 29.09.2016 ‘The Mizoram Group ‘A’, 'B’ and ‘C’ Posts Service/ Recruitment (Amendment) Rules, 2016’ a rule 2 ah computer proficiency certificate hrang hrang a sawiah hian Driver Grade-III, Conductor Grade - III leh post engpawh an Service/ Recruitment Rules-in computer proficiency qualification dang phut a neih sa tawh sa chuan post te chu a huam lovang tih a ni. Mizoram Ministerial Service Rules, 2021 hian ‘DCA/ CCA from institutes recognized by MSCTE’ hi a phut sa avangin 2016 rules hian a huam lo a ni. Tin, advertisement-ah pawh hei hi chiang taka tarlan a ni.

Heta ṭanga lang chiang em em chu, department lam hian thupêk an zâwm mai a nih hmel a. Zawhna pakhatna chhanna angin, BCA, MCA, BE, ME etc te pawhin Group C hna an dil duh a nih chuan MSCTE recognised Institution aṭangin DCA/CCA an zir leh phawt a ngai dawn tihna a ni. A awmzia berah chuan an lo zir bêl hrep tawh hnu kha, dân siamtute ngaihtuah kim tâwk loh vang in zir ṭhat leh an ngai dawn tihna a nih ber e.

A tawp berah chuan, LDC selection process a typing test dah reng chunga sorkarin duhsak bîk nei niawm fahrana pvt institution certificate chauh an pawm tlatna dan, The Ministerial Services Rules, 2021, DP&AR notification No.A.12018/31/2020-P&AR (GSW), in a tarlan, 'education and other qualification including age limit for direct recruitment', hi a ranglama siam ṭha turin Mizo ṭhalaite chuan kan phût tlat a ni.

- Eleazer Tetea Hmar