Vote thlak suau suau ang u aw

Kum 2023 kan lo thleng leh ta reng mai. Politics tui chilh mite chuan kum tawpa vote thlak bak rilru ah an nei tawh mang lova, thingtlang khaw ṭhenkhatah chuan inthlan kuma lo nei lo ve ringawt pawh an awm ṭhin an ti em ni kha? Ngaihtuah zui vang vang tham sawi tur hre lo tan pawh inthlana vote thlak taima tura January aṭanga in sawm hi thil pawimawh a ni.

Democracy-ah chuan khua leh tui ṭha chuan vote a thlak ngei tur a ni tih a ni. Mihlim nih avanga vote thlak loh ringawt mai te hi sim tawh tur a ni. Politics tui loh vanga vote thlak loh pawh tih loh tur, Politics ngaihsak lo ve hrim hrim chi tan pawh vote hi chu thlak tur a ni. Kan ram hruaitu tur kum nga chhung atan kan thlang dawn a, kan duh zawng hi thlan ve tur a ni.

Tunah chuan MNF lal nawn leh zel se duh zawngin MNF vote leh tur a ni a. MNF hi kum 2028 thleng lal lehin Pu Zoramthanga bawk hi Chief Minister atan kan la duh chhunzawm zel a ni tih lantirna atan MNF candidate apiang lo vote tur a ni a. MNF ah kan hmeh rualin Pu Zorama kan duh taka Chief Minister ni leh zel turin kan thlang tihna ni dawn a ni.

Congress hi kum nga chhung an lo lal tawh si loa lal ve leh se, Congress bawk hi kum 2023 leh 2028 inkara Mizoram chhunga ro rel leh turin kan duh chuan Congress candidate apiang vote tur a ni. Congress President Pu Lalsawta kaih­hruaina hnuaiah Mizoram hi kum nga chhung awm ve leh se kan duh a, Congress bawk hi Mizorama rorel tura kan it a nih chuan kan biala Congress candidate apiang kha lo vote mai tur a ni.

ZPM hi tling ve tawh se kan duh chuan ZPM can­didate kan vote ang a. ZPM can­didate kan vote chuan Chief Ministerial Candi­date Pu Lalduhoma an neih hi kan vote tihna a ni ang.

MNF leh Cong­ress hian ro an rel ngun tawh bawk a, kum 2023 aṭang chuan Pu Lal­duhoma hoin ZPM hi sorkar ve zawk tawh se a ṭha ang kan tih chuan ZPM candidate apiang vote tur a ni.

Mizo pa leh tlangval, Mizo nu leh nula zawng zawngin kum 2023 kum tawpah kum nga chhunga kan roreltu tur thlang ila. Mi thlan sa hnuaia kun mai loin kan duh ber vote theihna hun a inhawng leh dawn a, kan duh ber thlan tur a ni. Vote i thlak vek ang u.

- C. Lalrinsanga