TLAWMNGAIHNA
Kan hmaa tih tur awmte kan tih loh chuan chu chuan hma a sawn tir thei lo a, nih tur ang a nihtheih loh. Tih loh tur kan tih erawh chuan thil ṭha lo a thlen fo. Mihringte hi kan pian chhuah aṭanga kan thih ni thleng hian mifingte chuan ‘inzirnain hun kan hmang ral a ni e’ an ti. Kan dam chhung hunah hian tih tur tam takin min hmuak a. Mi taima chuan nakin atan a dah ṭha ngai lo. Taima taka kan buaipui chuan, chu chuan hlawhtlinna min rawn thlen ṭhin a. Hmingṭhatna te min rawn thlen ṭhin a ni.
Mizote hi hmanlai chuan Zawlbuka inzir seilian kan ni a. Tih tur leh tih loh tur kan hre hrang vek a, tih tur chu ti mai, tih loh tur ti lo mai ṭhin kan ni. Tunah in zirtirna hmunte a tam ta a, mah se, tih loh tur ti lui tlatte an tam ta lutuk hi kan in enfiah a ṭul ta. Hei hian chhungkua, khawtlang leh ram a tichhe zo a, kan rinna pawh a tidal zo ta.
Awle, kan pi leh pu ten, ṭhangthar ten ti ve tura min duh chu ‘Tlawmngaihna’ hi a ni. Tlawmngaihna hi a tichhuak tam apiang rilru leh nun a hlim. Tlawmngaihna lanchhuah tir ve ngai lo nun chu a chul ruih ṭhin.
He Mizo hnam nun ze ropui ber hian Zofate thinlung a luah khat a, zo hnahthlak thinlung a hneh em em a ni. Miin he hnam nun zemawi hi a thinlungah a vawn ṭhat tlat chuan pechhuak lovin a awm hle hle thei lo a, a tul huna midang ṭanpui turin a rilru a inpeih reng ṭhin. Tlawmngaihna nun vawng nung tlattu chuan hengte hi a nunah a vawng reng ṭhin - Tlawmna nun, tuarchhelna, phutlet neih lohna, thawhrimna, rinawmna leh dikna, huaisenna te hi.
Bus chuannaah kum upa leh chak lo zawk te, naupang zawkin ṭhutna an kian ṭhin te hi a ropui. Mi karah va ding mah se, an rilru leh hmel a hlim zawk a, an bula mite rilru a hneh a, entawn tur zonun mawi zia chu an lantir ṭhin.
Mi tana thil ṭha tih avanga thinlung lawmna chu, lawmna a zawngah a ropui ber a, chumi avanga hlimna hmel hmuh tur lo lang chu thil hmuhnawm ber pakhat a tling.
Nang leh kei hi kan dam chhungin tih tur leh tih loh tur tam takin min hmuak reng. Mite tana thil ṭha tih chu kan tih tur pawimawh ber a ni.
Tlawmngaihna hnam nun mawi chuan zofate nun lo chawi vul zel se, zoram thar nuamah chuan kan chenho theih nan.
- H. Neihchungnunga Durtlang North