HRINGNUN KAWNG (Han dáwn ve teh)

Engkim tána hun ruat a awm ang hian, hringnunah lei mite tán hun ruat a awm ṭhìn. Mihringte nunna leh thihna inkár chu pên khat leka hla a ni a; nimahsela, Síamtu'n chu pên khat lek chhúng chuan hun chi tinréng mai min zawhtírin min pal tlangtír ṭhìn.

“Thil hluite chu a ral ta a; ngai teh u, a lo thar ta,” tia Bible-a kan hmuh ang khán, hnah hluite chu ṭìl zovin hnah tharin a rawn thlák a; nimahsela, a kung erawh a ngai reng ṭhin. Nunhlui a lìam a, nun tharin a rawn thlák a; nimahsela, kan mihring taksa erawh a danglam chuang lo. Hruaitu hluite chu hruaitu tharin an rawn thlák a; nimahsela, an páwl hming erawh a ngai reng ṭhìn. Khawvêl thil zawng zawng a inthlâk danglam reng a, Síamtu erawh a ngai reng a, a danglam ve ngai lo. Síamtu ropuizia leh hringfate nun nêpzia hi hringnun hlimthlá hmu thiam tán chuan hmuh hmaih chî rual a ni lo!

Mi tinte hi ka lo pian chhuahna a inang lo va, ṭhenkhat chu mi hausa chhúngkua aṭanga lo piangin, ṭhenkhat erawh mi rethei tak chhungkua aṭangin. Mi rethei tak chhungkua aṭanga piang a, nu pum chhung ata sualsaa piang bawk tan chuan Job-a anga làwmthu sawi reng a harsa hle ngèi ang. Mi ṭhenkhat nu leh pate kawng sialsaa awlsam taka nun kawng an zawh laiin, ṭhenkhatte erawh a kawng an sial chawp a lo ngai a. Bul ṭanna a inan loh miau avangin kawng engkimah kan thlen chin a inang lo fo. Chu chu hringnun kalphung a ni miau si a! Mahse, thlen chin aṭanga hmasâwn zel tura Siamtu siam kan nih avàngin beiseina nèn hma lam kan pan a ṭûl ṭhin.

Mi tin mai hian kan sulhnu leh nunhlui ngaiin ni kan hman ral a; mahse, hma lam hun atan kan inbuatsaih lâwk ṭhin. Chu chu khuanu'n hringmi léng, dam chhung khawsak ngaihtuah reng renga ni tin hun hmang turte tana a duan a ni. Kan dinhmun azirin hringfate hi khawvel pakhata cheng siin kan khawvêl hi lei vàn a danglam tluk zetin a danglam a, a inthlau hle. He khawvêl hi mi hausate khawvel a ni a, sum leh paiin ro a rèl miau avangin dikna chungah meuh pawh roréltu a ni. 'Sum ngah hi hlimna ber a ni lo' mîte'n ti ṭhin mah se, sum ngah apiang an hlim ṭhin si a nih hi! Chu chu hringnun khuarèl a ni miau si a!

Chul tùra dùan hringfate hringnun kalkawngah hian - nu pum chhunga kan awm lai hunte, nausen nih hunte, naupang nih hunte, tleirawl leh rawlthar nih hunte, puitling nia nula tlangval nih hunte, nu leh pa nia pitar putar nih hunte a awm ṭhin. Chû'ng hun zawng zawngah chuan thihnain thlah a zár reng a, ni tinin mual kan liam ṭhin. Thihna hi râpthlak hle mah se, hringfate ṭhatna tura Siamtu remruat a ni. Thihna hi awm lo se, kum upa tawh mi tam tak, mahnia engmah ti thei tawh si lo, ei lo va awm thei bawk si lo enkawlin mi zawng zawng kan buai ang a. Ei leh barah kawngah leh thil dang tam takah harsatna kan tâwk ngei ang. Thihna hi hringfate tana Siamtu malsawmna ropui tak a ni.

Mihringte hian vànglái hun bik kan nei ṭheuh va; nimahsela, chu hun chu chapona tláng chhîpa Siamtu fiahna harsa ber kan hmachhawn hun a ni. Chu kawng zawhtute tam zawk chuan fiahna an paltlang zo lo fo. Chu kawng zawh thleng theitu chu mi ropui tak an ni a, fiahna paltlang thei ngat phei chu an ropui lehzual. Fiahna pal tlang zo lo mi tam takte hi an demawm loh. Siamtu'n mi zawng zawng hriata min chawimawi hian, 'mahni theihna leh thiamna avanga chu dinhmuna ding thei chu kan ni' tia rilru chapona neih hi thil harsa a ni lo rêng a ni. Eng anga hmél ṭha, pian nalh, hausa, lar leh ropui pawh ni ila, chapo thei kan awm lo. Nu pum chhung ata saruaka piang leh kut ruaka kan zalhna tur thlàn thim pan leh mai tur kan ni tih hi hriat reng tur a ni. Hringnun kawng kan zawh ṭan dan leh kan zawh tàwp dan hi mumang lama kan thil hmuh ṭhín nèn a danglamna a awm meuh lo a ni.

Hringnun khawvêl, hmàn lái mîte tana khawvêl hlui tawh tak kha, naute piang hlim tan chuan khawvêl thar a ni. Kan nun kawng zawh tawp hun tur hre lovin mi tam takin nun kawng zawh ṭanin mi ṭhenkhatin kan hun tawp lam kan pan a, thi mai tura inngai lah chûng zingah chuan pakhat mah an awm si lo. Chuvangin, kan dam chhung nite chhiar dan tur kan thiam theih nan kan 'HRINGNUN KAWNG' hruaitu atan hruaitu 'ARSI (ISUA)' hi thlang ila. Zan thim hnuaiah pawh kawng dik kan zawh thei ngei ang.

- Centenary C. Lalzahawma