LUNG HNAWH KAWNG RINGAWT EM NI MIN RIN TIR LEH DAWN?
Formula chhe ber chiin kawng kan repair a, minor repair em pawh ni lo, temporary repair hmangin, kawng bumboh leh suarah min kaltir leh dawn em ni?
Lunglei to Thenzawl road bawk hi: Fur laia a chhiat ang em em kha chu a ni tawh lo, lung hnawh chungah kan sawt lauh lauh a, motor khan hniamin vawi 2 vel chauh lei a hrut tawh. Fur lai ai chuan darkar khat velin kan thleng hma, hmasawnna ropui tak a va ni em han tih tur chu a ni lem lo.
Luhchilh zel ang: Kawng bumboh chu kan zawh zel a, kawng sirah Aizawl district tih a lo intar a, chuta ṭang chuan kan duk ta pur pur mai. Insawh nghawng nghawng lova kan tlan par par theihna thuruk chu hei hi a ni.
Kawng khawk chu a awm ve ngei a, mahse ruah tui tlak hmain, rawra leh alkatra chawhpawlh hmanga an hnawh zung zung vang a ni.
Hei hi alawm kan sawi kan sawi ṭhin. Kawng khawk hi thleng tiat a nih tawh chuan, rawra leh alkatra chawhpawlhin hnawh nghal zung zung ila, ruah tui a lut hman lo a, a mam ṭha reng mai a ni. Thlangra tiat a nih hnuah kan che chhuak ṭan chauh a, rawra leh alkatra chawhpawlh hmanga hnawh sen a lo ni tawh lo a, lungtum kan vawm lut leh tawp a, ruah tuiin a luhchilh zui a, a khawk zau tulh tulh ta mai a ni.
He formula hi: Aizawl district lam formula hi hman ve mai a rem lohna lian tak a awm em ni? Tunah pawh he formula hi Lunglei leh Thenzawl inkarah hian hman theihna 80% vel a la awm. Ramlaitui leh Haulawng dai leh, Tlawng aṭanga Pukpui inkar tih loh chu, he formula hmang hian hnawh mam theih vek a la ni.
Engineer thiamna hmanga kawng sample lak kual vel pawh a ngai lo. He formula hmang hian KM 60 vel a hnawh mam theih a, chawh rualin, truck trip khat zelin KM 1 a hnawh theih ang, sum ngai tam em em tur a ni lo mawle....
Nge lung hnawh formula hi hmang zel ila, furah a rawn thuah zau zel ang a, major repair hmangin estimate bill pawh a lo tam tawh ang a, man ṭang ei tur awm zawngin a hlawk deuh kan nghak zawkte a ni em? Sorkar hna a nih hian ei tur melh pahin kan thawkte hi a ang ṭhin! Kohhran lama thawkte hi chuan, hna thawh tam hi kan tum a, sum tam lem lo pawhin kan thawk ṭeuh thei asin mawle.
Mipui zahlohna hi...: State kan nihna kum 30 chuangah pawh vaivut khu kara mipui kan la chettir laih laih mai hi chu, kan hna thawh dan system fuh loh vang hi a ni thui khawp mai mawle. Kan kawng tam ber hi vaivut khu bawh luih luih a la ni reng a, foreign lam lam thlir lo pawhin, kan chhehvel state te chet velna kan hmu ve vek a, chilthli tla purin kan thlir vawng vawng mai chu a nih hi.
Lunglei khawpui pawh kawng ṭha min siamsak mek a, mipui hi tih kan nuam khawp a, chhun khaw engah, mipui chetvel lai takin an thawk miah miah mai a, an hnathawhna min heltir zak zak mai, han phun ila phunchiar nih kan hlawh a. Mite chuan mipui chet velna laia hna an thawh chuan, mipui chet tam loh lai chuhin, zan hunah an thawk thin tihte kan hre ve kur si a. Keini zawng mipui mitmei ven hi ngai kan ti ve lem lo chu a nih hi.
Lung hnawh formula hi bansan tum ang u: Lung hnawh kawng formula hi hmang an tam tawh lo khawp asin, Formula chhe ber hmanga kan ram kawng enkawl hi bansan a hun tawh. A hun taka hna kan thawh chuan he formula hi a bansan theih tih a chiang khawp mai.
Switzerland of the East tihte kan sawi fo a. Hmanah Switzerland pitar mikhual kan nei a, “Switzerland-ah chuan kawng kan siam zo tawh. PWD in tihte hi kan nei tawh lo, kan kawng repair-tu company tlemte an la awm ve” a ti. System dika miin hna an thawh chuan, kawng pawh an siam zo tawh bik a nih chu.
Keini zawng kan chan bik hi kan vannei hle, tiin kan zai zo chiah a, thlarau lam tih loh, taksa thila kan chan chu kan la vannei ve lo a nih hi.
- Lalrinliana Colney