Prosperity Gospel

Kan thupui khi Sap ṭawng ni mah se tunlai khawvela Chanchin Tha kan puandarh dan chi khat, mi tam takin an bawh leh an ngaihven a ni. Mizote'n 'Prosperity Gospel' lam hawia Chanchin Tha hril ṭhin kan hriat lar chu Joel Osteen, Joyce Meyer leh Benny Hinn te hi an ni awm e. Mizoramah ngei pawh hian bu khuar tumin a inlar ve ṭan niin a lang. 'Prosperity Gospel' chu eng nge a nih chiah?

Eng nge a awmzia?

January ni 1, 2014 - a Steve Corbert leh Brian Fikkert te lehkhabu ' When Helping Hurts' ah chuan hetiang hian a inziak- a bulpui berah chuan 'Proeperity Gospel' chu Pathianin rinna thuk zawk leh sang zawk neite chu hausakna leh malsawmna tam zawkin a vur dawn a ni tih a zirtir a ni - tiin an sawi.

Hemi awmzia chu Pathian hi kan rinna thuk zawng mil zelin hriselna, hausakna leh malsawmna te kan dawng tam ang tihna a ni. Pathian hi kan rin vak lo emaw kan ring zo vak lo emaw a nih chuan hriselna, malsawmna leh hausakna hi kan dawng ve lo ang tihna tluk a ni. Pathian kan rinna a thuk poh leh khawvel thilah pawh kan hausa ang tihna a nih chu.

A lo chhuah ṭan dan

Duke University-a Professor hna thawk Kate Bowler, Ph. D chuan June ni 7, 2016 khan 'Blessed' tih lehkhabu a chhuah a. Chutah chuan 'Prosperity Gospel' hi a chhui bing a. 'Kum zabi 19-na tawp lam leh kum zabi 20-na tir lam aṭanga he ngaihdan thar hi vawrh chhuah a ni a. Pathianin ngaihtuahna hmanga khawvel a siam ang bawkin mihringte chuan anmahni khawvel chu an ngaihtuahna hmangin an siam a. Ngaihtuahna ṭha leh dik chuan dinhmun ṭha a chhuah a, ngaihtuahna ṭha lo leh dik lo chuan dinhmun ṭha lo a chhuah bawk a ni' tih ngaihtuahna rilru pu aṭanga lo chhuak a ni tiin a sawi a.

Khawvela ram hausa USA te hi Indopui II-na hnu lama an lo hausak chhan chu Chanchin Tha hriltute'n thilmak, tihdamna, sum leh pai lama hausakna te zawng tura mipui an fuihna vang a ni tiin a sawi. Hlawhchhamna te hi Pathian thiltih mak rin loh vang a ni a, chutiang rinna neih ve loh chu retheihna a ni tiin an zirtir thu a ziak.

A ziarang

Hausakna Chanchin Tha (Prosperity Gospel) hian chi hrang hrangin kan sawifiah thei ang a. Chutih rual chuan hlawm thumin a khaihkawm theih awm e.

1. Rinna: Hausakna Chanchin Tha pawmtute chuan rinna hi an thupui ber a ni a. Rinna chu finfiahna awmsa nena inmil taka Pathian Thu puan chhuah ngawt kha a ni lo a, rinna chu ngaihtuahna ṭha leh Pathian thilpek malsawmna beisei a ni. Thil ṭha ngaihtuahna, rinna nena tih tak zeta kan rin chuan tisa lama malsawmna a thlen ngei ngei tur a ni. Hei hi hausakna chanchin ṭha hriltute rinna ngaihdan a ni.

2. Hausakna: Prosperity Gospel chuan sum leh pai lama malsawmna hi Pathian rinna aṭanga lo chhuak a ni tih hi an pawm dan a ni a. Sum chu mi rinna tehna hmanraw hman tlanglawn leh hmantlak tak a ni.

3. Hriselna: Prosperity Gospel ringtute tan chuan Pathianin mi rinawmte chu inremna siamna atan hriselna ṭhain mal a sawm ṭhin. Prosperity Gospel ringtute chuan hriselna ṭha leh thlarau malsawmna inzawmna an hmu a. Hriselna chu thil tha ngaihtuah emaw, Isua'n a pek tawh hriselna emaw aṭanga lo chhuak a ni. Hrisel lohna hi Setana beihna, hneh loh la awm vang emaw, rinna chak lohna vang emaw a ni thei tiin an zirtir bawk.

A dik em?

David Wayne Jones leh Russell S. Woodbridge-a te chuan Kristiante tan rinna leh hausakna inzawmna hi dik taka hriatthiam a pawimawhzia an sawifiah a. "Hausakna chanchin ṭha hriltute sawi rinna leh hausakna inzawmna hian Kristian rinawmte’n a chang chuan an tuar chhan, emaw, mi fel lote’n a chang chuan an hlawhtlin chhan hriatna atana innghahna tlak thudik a tling lo" an ti a, a dik hle.

Hausakna leh hriselna hi miin rinna a neih dan aṭanga lo chhuak a nih chuan, hei hian mi retheite chu thlarau lama an tlakchham avangin rethei an ni tih thutluknaah a hruai lut a. Pathian thu awih tak tak, mi rethei an tam a, mi sual hausa tam tak an awm bawk.

Pathian thuawih zawng zawng an hausain an hrisel vek lo

Prosperity Gospel chuan mimal chunga tisa lam hausakna pawimawhzia a sawi uar a. Bible-ah hian Pathian thuawih mi hausa Abrahama te entawn tur a awm laiin, mi rethei emaw, damlo emaw, mahse rinawm em em Tirhkoh Paula te pawh entawn tur a ziak. II Korinth 12: 7 - 9 - ah khan a taksaa hling awm kha lo bo turin Paula kha vawi thum a ṭawngṭai a; Pathian chhanna erawh chu khawngaihna hlutzia a ni.

Helaia Paula taksa hling hi chiang taka hriat theih ni lo mah se Bible zirnaah chuan taksa lama harsatna a nih ring an tam ber a. Mit (eye) tha lo emaw, lu na emaw malaria natna ang chi emaw hi Paula hian a vei a ni ang e tiin ESV Global Study Bible chuan a sawi.

Covid - 19 hluar lai khan BCM Pastor Rev Lalhmingchhuanga Jongte chu Hripui vangin a boral a; Mizoram Synod Pastor Rev Vanalngeiha pawh he Hripui vang hian a boral. Pasator leh Kohhran Upa, Pathianin a hman tak takte hi cancer leh natna danga boral leh rethei tak tak hi an tam a, khawvel awm chhungin chutiang chu a ni reng bawk ang.

Chuvangin he 'Prosperity Gospel' hi Bible-a innghat zirtirna dik tak nen chuan thil danglam tak a ni. I retheih avang te, i hrisel loh avang te, tihdamna awm lo natna i vei avang te hian Pathian i rinna a chak lo a ni lo a, mi sual tak i ni tihna a ni hek lo. Engkim famkimna zawk chu he khawvelah ni loin Vanramah a ni.

Eng dinhmunah pawh awm la, Pathian khawngaihna avanga Lal Isua rinnaa chhandam i nihna hi Pathian thu dik kumhlun chu a ni e.

- Rinfela Zadeng