EDEN PAR BETHLEHEMAH

Hla siamtu chuan Eden huana siamtu leh a thil siamte inkara hmangaihna luang chhuak chu pangpar mawi tak vul chuk mai nen a tehkhin a. Bawh­chhiatna a vangin thilsiamte hnena Lalpa hmangaihna par vul chu thliah a lo ni a, a lo vuai a, a chul zo ta a ni.

Eden parmawi chul hnu ti vul leh turin, a hma aia parmawi tur leh vul nasa zawk turin, chungnung bera chuan Vohbik Mari hnenah a lo chawr chhuah tir leh ta a. Chu thil ropui chu Vantirhkoh Gabriela chuan, “Chungnung bera fapa an ti ang a, Lal Pathianin a thlahtu Davida ṭhut­phah chu a pe ang a, Jacob-a thlahte chungah chatuanin ro a rel ang a, a ramin kinni a nei lovang a rawn ti a.

Tunah hian Bethlehem mualpui lam chu pan ila. Kan tana nau lo piang chu chibai buk turin kal thuai thuai ila, Berampute kalna kawng chu kan zawh zel ang a, arsi eng mawi dinna hmunah chuan kan hmalam kan thlir hunin kan tana lo kal kan Lalber chu kan va hmu ang.

A hnenah kan thil neih te, kan thinlungte kan hlan hnuin, chuta ṭang chuan kan kir leh hunin hengte hi ngaihtuah ila, kan tana lo kala chuan kan nunah thil tih tur tam tak min hnutchhiah a ni tih hi.

Eden parmawi chul hnu Bethlehema lo par chhuak leh ta avang chuan nang leh kei inkara hmangaihna chuai tawh chu din thar lehin parchuah tir leh ila, a va duhawm em! Lungduh kal ta te avanga kan thinlung na te chu tuam dam leh turin a mah chu sawm ila.

A mah chu remna lal a nih avangin mite nena kan inrem theih lohna te chu amah avangin ngaihdam in dil tawn ila. Tlawmna nun neitu a nih avangin kan chapona avanga kan nunah thil ṭha lo lo thleng te, chumi avanga mi rilru kan tih nat ṭhin te chu amah avangin sim tum ila.

Amah chu lung­awina kim neitu a ni avangin kan duhamna te, mahni hma kan sialna te avanga mi rilru kan tih natna te amah avangin sim tum ila. Ngaidam tura lo kal a nih avangin amah avangin kan ngaihdam theih lohte nen inngaidam tawn ila.

Eden huanah khan Lalpa hma­ngaihna dawngtute chuan siamtu an tlanbo san a. Bethle­hemah Lapa hmangaihna lo lang nausen lo piang hlim taka kan lawmna te chu kawvel tan lawm lo ila. Tlanbosan tawh lovin Lalpa tan lawm ila, a mah bawk i pe let leh ang u.

- H. Neihchungnunga Durtlang North