Lal pian hun pangpar a vul leh ta
‘Lal pian hun pangpar a vul leh ta!
Thinlai muhnu lunglen a kai tho e”
Chhun leh zan ṭhentu, hunbi ruat a, sik leh sa ṭhentu remruatna in, Lal pian hun pangparte vul hun chu a lo thleng leh ta a. Boruak nuam tak leh thlasik khaw vawt hnuaiah, pangpar mawiten kan Zotlang ram nuam rawn bawm lehin, kan ram mawi leh duhawm chu, a duhawmzia an rawn tlangzarh leh ta.
Heng lei mawina lo parvul leh ṭhin hi, hunbi ruattu remruat tihlawhtlingtu an ni. Rah chi te an rah a, par chi te an par hun atan a Lal remruat sa a ni miau a. Leilung siam tirh ata tawh, fur leh ṭhal inban lek a, kum bul kan ṭan theih nana kum tawp sun liam phawt ngai ṭhin hian tawpin tai a nei dawn lo. Hun bi kan chhiar ṭhinna ram zauvah kan cheng miau a, kum bul a awm chuan kum tawp pawh awm tur a ni.
Tlangram nuam leh par tin vulna a cheng zofate tan phei chuan, kan hun pui ber Remna Lal piancham hmatianga kan thlir hun a lo ni leh zel a. A piancham lawmpui ta niawm taka lei pangpar lo vul leh te hi ‘Lal pian hun pangpar’ tih loh phal chi a ni lo.
Hmun nuam leh thawveng, Arizona ni tla eng mawi ram an lo tih ai pawha tlaitla eng mawi zawkna ram, Pu Vankhama ṭawngkam takin ‘Sik leh sa lem lova’ Zofaten vanglai par kan vul tirna ram nuamah kan cheng miau a. Kan vanglai parmawite hunin min khalh chul sak a, vanglai hun duhawm hmang leh tura hun remchang pek kan nih ngai lohna ram a ni bawk a. Upat leh tar a inrual a, tar leh chak loh a inrual leh zel a, he ram mawia zan thla eng thlir ve leh ngai tawh lo turin kan thamral ta ṭhin a.
Hei hi hringnun nihphung tura Lal remruat a ni a, tuman kan dal thei lo. An hun hai reng reng lo lei pangpar mawite an lo vul leh a, Lal pian hun boruak pawh a ngai te in a rawn vawt leh a. Remna Lal pian laia vul ṭhin te lahin an vul hun hai palh tih reng reng an nei hek lo. Kumsul lo thlir liam tam deuh tawh leh kumthar ruai hmachhawn hnem tawhte tan chuan thinlai mu hnu lunglen kaithotu lek an chang lawi si a.
Kumsul liam taah kha chuan chhung kimin he hun nuam hi kan hmachhawn a. Remna Lal lo piang leh lal pian hun pangpar vul leh te nen, hringnunah pangpar angin kan vul za ṭhin tak kha a ni a. Tunah erawh chuan kan vulpui ṭhin kan hmangaihten pialleiah min zalsan a. Kan hlimlai ni, hun leh kumte chuan hnutiang min chhawn a, chung hun ngaia thinlai muhnu lunglen kaitho turin Lal pian hun pangparte chuan vul an ṭhulh chuang der si lo.
Vul hun leh vanglai neia duan, kumsul a vei ruala tar sawt sawt a; lunglen chhan tur nunhlui inchherchhuan ngaia rum a, he hunpui lo thleng leh tur ṭah khum ṭhin zawng zawngte hi, nunhlui ngaih lunglen lamah tal chuan lungrual ila. Kan lungrual dan chu awhawm lo teh mahse, chantawk khuarel a ni e... ti rilru chungin, he hla hi mittui nen sa hluam hluam hlawm mai ang u.
Pu Rokunga pawhin,
“Lengzawng thinlai dam ten lawm kim tak ang maw?
Rualduh kalta suihlungrualpuite zawng kha;
Ngai mah ila kohkir leh theih awm si loh,
Rem Lal piang chuan thinlai hnem rawh” a lo ti tho kha maw.
- RD Lalrammawia