KHAWVEL LAWM NAN A LO KAL A...

Khawvel lawm nan a lo kal a, a lo kal lawm nan kan hehêu thung a, kan tana nau piang hi atana nau piantir ve kher tumin kan hmanhlel a; a ni, nun tam kan neih theih nan nunna meuh chânin min rawn tlan a, thawmhnaw man tamin kan lo chhang let thung a. A chhan let danah chuan kan buai lo, kan chhan let danah erawh pian cham neitu hi kan tibuai viau mai thei a ni.

Mizote hunpui kumpui lingleta kan nghahhlelh Krismas zung zâm chuan kan vel a rawn chhun eng kulh tawh mai a, ṭhenkhat phei chu a hman dan tûr suangtuah chungin kan khat liam viau tawhin a rinawm. A nei fate chuan he hunpui hi lirthei chi tinreng nen mawng er tâwnin eng helh nei miah lovin an chen leh emaw a ni ang a, ṭhenkhat phei chu oxygen an phur ta emaw tih mai tur khawpa chakin an tlan leh fua fua ngei ang; keini an duh loh hnuah pawh chuang phak ve lote chuan mit tla dawnin kan thlir liam emaw a ni ang a; chuta ṭang ngawt pawh chuan Krismas kan hman tum dan leh inpuahchah dan chu a inthlau hle tih Zawlnei puansak kher loh pawhin a chiang thawkhat viau awm e. Aw, he ni tak hi chu darkar 25 tal te hi han awm bik se ti vawng vawng tawk hi kan kat nuk mai thei.

Thla tin ni 25 bawr chho chu awlsam taka pal tlang thei siin; he ni 25 bâwr chhova lu hai tum tlat maite, chhia leh

ṭha hriatna thei ei nawn leh châk thut mai te, hmangaihna kawnga a chhe lama pen duhna rilru pu tlat te, sual tinrêng a zalen hun lai a ni tlat mai te aṭang hian pian cham neitu lung hi awi tak ang maw? Zu haw tak chung sia beer sawi mawi tura hmui ui lo viautute zingah hian Kristian ṭhalai member tam zawkte hi kan lo inphûm ru ve reng ang em? Camping-a kan hlim thawm a reh fel hmaa ar khuan hmaa vawi 3 phat an ngai ta tlat mai ṭhin te hi min siam ṭhatu ni hlauh zawk sela.

Leiin a lal a lawm laia lawm dan uchuak taka lawmtute hi em ni lawm bik riauva kan hriat? Lawm dan thianghlim leh mawi zirtir hi beramin a pu hnen

aṭanga a zir loh chuan chinghniain a seh hun nghah mai loh chu hmabak a awm lo. Khual buk vengtu ang maia sualin min bawm thu kan pumin a han tlangaupui leh ngawt ṭhin aṭang te hian kan thinlung hi Kaisara lam hawitir kan tum sa reng tawh a ni zawk lo maw? Ṭhiante pian cham-a party dan lal pian chama chhawm luh zel kan tum ta mai te hi a chhangchhiatthlak lulai deuh em? Chhun-a hmun thianghlim tak pawh zan lama Eden huana chantir phet tum pawh kan kat leh nuk ngei ang.

Kohhran ṭhalaia member hlunte pawh hian inbih chian nan hmang teh ang u; sual haw viau anga lang chung si hian a pawm zam dan sawi mâwituah kan lo ṭang ṭhin zawk em? Ka ti chhunzawm dawn pawh ni hlei lo tia mahni inthiam chawpna dan fahrah tak hmang chungin hnehna tumkau chawi te hi kan lo tum vei ngawt ang e. Mitdelin mitdel vek a hruai chuan khuarkhurumah a luhpui ṭhin kha maw, member nau zawkte kaihruai tura ngaih hian kan arkhawthimdaipui mai zawk ang tih a va hlauhawm em. Lehkhabu kâwm mawi tak chhunga a thu chhiar tlak awm hauh si lo nun hi mite’n min lo hmehbel reng ang e. Kan chhang eitute dorala an chan lohna tur chuan nang leh keiin mawh kan phur a ni. Aw Kristian ṭhalai member duh tak, he hun tawi te hi âm taka i chên a nih pawhin khuareia hming chhiat phah nan hmang lo hram ang che tiin kan inngen a ni.

A baptisma certificate han bih chiana kohhran ṭhalai chetvelnaah pawh tel rual âwma la ngaih lohte hi ṭhiante nen ar kan ho ṭuma haw tlai ngam nachang hre rual an ni tlat tawh mai te, in leh a vela naupang chhe ena inen reng lai kha pâwn lamah chuan a lo chêt puitlin ngam tawhzia aṭang ngawt pawh hian nu leh pate tan he damdawi khâ hmang hian kan tlangau lâwk a ni.

Krismas ruaiṭheh tura sawm chhuah zawh loh tam tak hi ṭhiante nen ar kan ei tura dan beh ngaiah an ṭang fo, fianrial ṭawngṭai lama hlawhchham takte hian fianrial hmun thim lam hi hlawhtlinna remchanga chuh an tum fo; chuvângin, kan fa duat laite ṭawngkam apiang mai hi a zawng a zaa lo pawm liam mai lo turin kan inngen lawk a, duh loh ruama lutin sualna thang an kam ṭan hun a ni thei tih hi nu leh pate’n kan hriat lawk a ngai. Heroda chibai buk dan an suangtuah lawk hma ngeia khawchhak mi fingte chibai buk dan hmang zawka rim tui lo hal lawk ṭheuh turin chhungkaw tinte kan inngen a ni. Ṭhenkhat chuan ziak na lutuk hetiangin kan fate an awm ngai lo kan khuahkhirh hneh tawk ti kan awm ngei ang; a dik. Nimahse, hling rah phawta a damdawi hnawih ai chuan kal kân nachâng hria a, an zuan hmaa an tlakna tur lo enpui hmasa turin kan inbengvar lawk a ni.

Damdawi khâ hi lem a harsa a nih paw'n chhâk chhuak mai lova chhungkaw tinin dampui nan lo hmang ṭheuh turin kan inngen a ni. Pal ṭha tam tak kara pal chhia hi mi sual luh rukna remchâng a ni fo, chu pal chhia neitu nu leh pa in ni ang tih chu kan hlau a ni. Thir hi a lin lai ngeia inden phawt chuan pum ṭha chhuak fa in nei ngei ang. Fate sualna zep ngai dinhmuna awm ai chuan veng him tura lo inpuahchah lawk mai hi khawchhak mi fingte râwn kher lo pawhin an fing a ni tih a pawm tlak zawk. I fa khawiah nge a awm tih hre reng thei turin nu leh pate’n kan mit leh beng lo tat hriam lawk ang u le.

Kan hun hman dan engkim hmutu, kan chheh vela ringlo mite hian engtin ngai ang maw, chhuna awm anga mawi taka inthuam hi harsa kan ti a nih si chuan kan missionary-te hnathawh thleng hian kan ti ṭhuanawp thei hial lo’ng maw? Ram pawn lama kan unau rawngbawla feh chhuakte hnathawh hah sa tam tak hi kan thawm hre phaktute hian he hun rei lo te chhunga kan khawsak dan avang hian an hmu hmelhem hlauh dah ang e. Hunpui thianghlim takin hmang ila, awlsam takin chanchin ṭha chi kan kuiṭiak a ni mai.

A lawm dan dik leh thianghlim chu eng nge ni ang tih hi mahni zawn ṭheuhvah chhang dawn ta ila; pawm dan dik tlanglawn ber chu biak in, in leh a vela chhungkuaa hun hman tam hi kan inlungrual tlanna ber a ni mai awm e. Chet sualna a thleng lo nge nge bawk.

Kan hun hman dan ṭheuh hi van mipuite hmaah kan la puang dawn tih hre chungin chhiartu zawng zawngte Krismas leh Kum Thar hlim tlang taka hmang ṭheuh turin duhsakna kan inhlan a ni.

- H. Zonunsanga, Venglai, Kolasib