Mi biru entawntlak
Tlemlai deuh, KṬP-a kan inhman tawp lam deuhah khan KṬP General Conference-a thu zirah hian ‘Mi Biru Entawntlakte’ tih kha kan zir tawh a, a zirtirtu lamin an thiam em bawk avang leh, Bible-a mi ropui tak kan hriat zen zen si loh an lo awm kha kan hriat phah a ni.
Hetiang deuh hian, tun ṭum Mizo Award chuan mi biru entawntlak min chhawp chhuah sak mai ni lovin anmahni ṭawngkam takin Mizo ṭhalaite tana ‘hero’ tur an rawn tarlang niin ka hria.
Ka tan chuan Prof Joy Lalkrawspari Pachuau hi mi thar a ni. Ka hmelhriat lo mai ni lovin a chanchin pawh hi ka lo la hre ngai reng reng lo. Zirna ngai pawimawhtu nia inchhal ve ṭhin siin Mizo fa zinga zirna lama mi ropui ber pakhat ka hre miah lo kha ka insit hial a, chutih ruala ka rilrua a lo thawh dan chu mi hriata inpholan a tum loh avangin kan hre lo niin ka ring ta ber mai.
A lehkhabu ziah zinga an sawi lar ber ‘Being Mizo’ tih hi chu a lehkhabu hming hrim hrim hi chu ka hre tawh a, kei chuan ka la chhiar ve hauh lo. A chanchin Vanglaini lama inziak chin ringawt ka hmuh khan tunlai zirna lama tlahniam mek Mizo ṭhalaite tana entawn tur dik chu a nih hi maw, ka lo ti rilru nghal a.
University of Oxford-a zir phak hi inchhuanna tham a niin ka hria a, chutah Oxford-in an pek zen zen loh MPhil-a distinction hiala pass leh Oxford-a pakhatna a ni thei kha Mizo chhul chhuak zinga zirna lama tawng sang ber pakhat chu a ni ve phawt mai.
Mizo Award hial a lak takah chuan sawi pawh a hlawh chho a, social media lama a chanchin an sawi zauna lama a kalna apianga Mizo tihlar tum a, Mizote chhuanawm taka pho chhuah tuma a sawi ṭhin thu te, Mizo thil hlui awm thei ang apiang khawvel hmun hrang hrang library aṭanga la khawmtu a nih thute kha thil ngaihnawm tak pakhat chu a ni leh bawk.
Mizote hian zirna lamah hma kan san emaw kan tih chhung hian midangte hmasawnna hi kan phak lo em em mai a, chu chuan hnungtawlh ang hialin min lantir thei.
Mizo ṭhalaite’n zirna lama entawn tur dik an neih a, thiamna sang ber an thlen hnuah pawh an kalna apianga Mizo tihmingṭha tura theihtawp chhuah zui nachang an hriat chhoh zelna tura entawn tur lo ni se, Mizo Award buatsaihtu lamin mi biru entawntlak an thlang chhuak hi a lawmawm ka ti hle a ni.
- Lalthanmawia