Rem Lal piang chuan thinlai hnem rawh

Leng zawng thinlai dam ten lawm kim tak ang maw,

Rualduh kalta suihlung rualpuite zawng kha ,

Ngai mah ila, kohkir leh theih awm si lo,

Rem Lal piang chuan thinlai hnem rawh.

Tiin hla siamtute chuan zan tlai tawh tak khawthiang karah chuan chu hun ropui leh lungleng mite tan hun lunglen-thlak tak mai Krismas lo thleng tur chu an lo hmuak ṭhin a lo ni a, chung kan mi ril tak takte rilru leh ngaihtuahna zungzam te chu ṭawmpui pha kher lo mah ila, he Kristian te lawmna hunpui lo thleng tur zan boruak vawt vin tuk kara hun khawhar-thlak tak mai hian nun khawhar a rum mek te pawh min fan kum tin ve miau si a nih hi.

Ni e, kan chhandamtu piancham hapta a lo thlen dawn meuh hi chuan chhung leh khat, u leh nau khaw lam hla tak tak, chhim tawp leh hmar tawp, chhak leh thlang a awm te pawhin mahni in leh lo panin hun harsa tak pawh an lo paltlang hram hram ṭhin reng a. He hun hi keini Mizo Kristian te tan ngat phei chuan hun pawimawh ber a ni awm e. He kan hunpui hmanpui tura kan thlakhlelh ngawih ngawih te he khawvelah hian hmuh tur an awm ve tawh lo a ni tih kan hriat reng, mah se, kan mitthla-a cham reng si te chuan mi lungleng ngawih ngawih ṭhin te a va vel leh nasa dawn em.

He khawvel hi chu sual leh a hnathawh thil tih theihna ram a nih miau avangin sualna chi hrang hrang avang a ruihhlo ngai leh mahni chhia leh ṭha hriatna pawh hum zo lova nun khawlohna-in a hruai mek, mahni inchhung lum pawh bel ngam tawh lo, nu leh pa ang chhung muanna pawh thlahlel hlei thei lova kumtluana lu nghahna mumal nei tawh lo te, keini ang tan te hian heng kan hunpui lo thleng turah hian kan nun hi a ruakin a khawhar ve ngawih ngawih a, kan lung te hi a leng ve vawng vawng

ṭhin asin” tia mittui parawl ṭeuh chunga rawn sawi chhuak thei turte dinhmun hi ka ngaihtuah fo ṭhin.

‘Ngai mah ila, kohkir leh theih awm si lo, Rem Lal piang chuan thinlai hnem rawh” tiin rih-sang mual liam hnu ngaia nun beidawng leh khawhar ngawih ngawih a awm, keimahni ang bawka chu lunglenna tlang khawhara tang ve mek te dinhmun tur chu dawnpui chang hian he kan thinlung ram natna a zual fo ṭhin a nih hi. Chhungtin lawm lai par ang vulni leh hun te, Eng tin hmang maw, kar hlaa lengrual duhten, Thinlai damte’n hmang la, he hun lawmawm hi, Hlimin lawm la, Lal lo piang chu, tiin nghakhlel taka lo hmuaktute hi kan zaipui ve thei dawn em?

Lei mihringten khawvelah hian duhthlan kan nei fo ṭhin. Chhung tinte’n he kan hlimna ni ropui lo thleng tur kan hmuahna kawngah pawh hian kan hun kal liam ta zawng zawngte chu theihnghilhin “Keini pawhin lawmna zai hla i rem ang, Tumah thinna leh lunglen pawh sawi lovin, Bethlehem-a nau lo piang Immanuela chibai bukin i kal ang u’ tichung zela lunglenga kun mek te kai harhtu ni zawk turin he kan hunpui rangkachak lo thleng tur hi Mizo Kristiante hian lo hmuak tlang dial dial thei ila a va nuam dawn em.

Lal chungnung hmun chungnung ber a cheng hnu Lal isua,

Lei lalten amah do mah se sela,

Kei ka tan erawh Lal duhawm ber a ni si,

Riangvai kan lawmna tur reng a Lal lo piang hi.

Khawvel mihring te in tehna anga min teh ve ngai lo, I tan leh ka tana hmun tlawm bera lo piang hian kan tlawm lai nun leh ropuina lai hlimthla reng reng a thliarhrang ve ngai lo. Mite endawng leh hmuhsit ber te zinga mi pawh lo ni ṭhin mah ila, kan hlim ni-ah pawh min lawmpuitu tawng lo leh kan lungngaih min ṭawmpuitu tawng lo mah ila riangvai kan lawmna tur renga lo piang, Lal ropui ber neitu kan ni asin.

- Lawta Khiangte