Mizo Society leh Cyber Bullying

Mizote hi hnam tlemte kan ni a. Kan tlem ang ai hian khawvel ram changkang zawk chauhva awm tur anga kan ngaih hi a awm kim ve viau mai. Celebrities pawh kan intodelh a, chu mi parallel chiah chuan heng kan milar neihte tana ngeiawm taka che ṭhin online libel leh slander pawh kan intodelh tak zet a ni.

Fiamthu phenah...

Fiamthu duh tak kan ni a, he mi phena sapṭawng thu rawn lar tak chu TROLL kan tih hi a ni a. Mahse, he thumal hi Mizote kan inkah fiamthu nen a kal hrang nasa ta hle a, a Mizo ta lo tial tial mai. Kan hriat miah loh karin inla troll tak chungin cyber bullying lamah a inher chho ta fo mai.

Troll vs Cyber Bullying

Troll kan tih hian a tum ber chu mite attention an lak theih nana comment ngeiawm tak leh mei nei tak siam hi a ni. Troll hian mimal a focus lo tlang pui a, cyber bullying erawh chuan mimal chhiatna tur lam a hawi thung. Chuti a lo nih takah chuan troll satliah emaw kan tih hi cyber bullying lam hawi daih a lo ni fo tihna a ni.

India ramah hian trolling hremna direct tak dan hi a awm lem lo. IT Act 2008 behchhanin mi tam tak hian zalenna an nei ta emaw an inti fo a, amaherawh chu, mi duh lo chung online lama biak luih tlat (cyber stalker) te hi section 354D IPC hmangin hrem theih an ni a. Kum 3 -5 an tan theih bakah sum chawi theih a ni. Tin, IPC Section 499 hmangin hmeichhiate online hmanga tih hmingchhiat hian (defamation) hremna na tak kan hmachhawn thei. Mipat hmeichhiatna lam hawia fiam thui mah mah phei chu IT Act hmangin a hremna nep lo viau. Mizorama troll uar tak takte hian a chunga hremna dan kan sawite hi an bawh chhia a ni.

Cyber bullying kan tih hi midangte chunga hleilenna chi khat a ni. Midangte taksa leh rilru kan tih nat sak hrim hrim hi bully a ni a. Chu chu online kaltlanga kan tih khan cyber bully chu a ni ta mai a. Hengte hi a entirna atan chuan a ṭha awm e:-

1) Dawt thu theh darh emaw, mi ten thup an duh ngawih ngawih thlalak leh video lo theh darh sak.

2) Mi dangte tina thei leh hmuhsitna lam hawi thlalak leh video thawn darh.

3) Midang lemchanga mite hnena thu thawn chhuah te, fake account hmanga midangte chanchin ṭha lo lai lo theh darh sak.

4) Mi chanchin dik tawk loa theh darh sak a, an rilru hliam sak.

5) Mi privacy zah sak loa an chanchin lo theh darh.

Cyber Bullying chi hrang hrangte:-

Flaming: Midangte rilru tina thei ṭawngkam hmanga emails, text messages emaw chat room-a internet kaltlanga thu ziak a post.

Harassment: Midangte rilru leh taksa tana natna awm thei tura chet leh vauna message thawn chhuah

Cyber stalking: Mi hlauh tur emaw, an huat tur emaw anmahni tina zawnga biak luih tlat.

Exclusion: Mi tu emaw nat ngawih ngawihna tura comment pek a, group a an awm ve emaw vantlanga zinga hrehawm an tihna tura thu post.

Impersonation/ masquerading: Fake Account hmanga midangte tih hming chhiat emaw, an chanchin dik tak a ni emaw, dik tawk lo a ni emaw mi hmingchhiatna tur mitin (public) hmuh theih tura post.

Trolling: Troll pawh hi kan hman dan azirin Cyber Bulying tho a ni.

Fraping: Mi tu emaw social network account (Facebook, Instagram etc) hmanga account neitu a hmingchhiat theihna tur lam hawi lo post

Cyber Bullying hi India ramah a mikhual lo hle a, khawvelah Cyber bullying hluarna ram pathum zinga mi a ni. Mizoram pawh hi social media kan hman dan en hian a nasat na state kan ni lo ang tih a sawi theih loh. Hei hian nasa takin pawi a khawih a, Cyber bullying tawkte hian:-

1) Mahni ingaihsanna a ti chhia a.

2) Thiante zinga awm nuam an ti lo.

3) Hmuhsit leh endawng niin an inhria.

4) Mahni intihnat duhna a siam a, mahni intihlum thlengin nghawng a nei thei.

5) Zirna, sport etc. lama an theihna a tla hniam nasa thei a.

6) Mental health a khawih - thinchhiat, anxiety, depression a thlen fo.

Dan hmanga cyber bullying

kan do let theihna turte:-

1) Milem duk dak tawk lo (obscene) theh darh - Sec. 67 of IT Act

2) Mipat hmeichhiatna lam hawi theh darh- Sec. 67A, IT Act 2000

3) Chet zia leh ṭawngkam a hmeichhiate zahawmna ti chhe thei hman - Sec. 509, IT Act 2000

4) Midangte ti hmingchhe thei thawn darh Sec. 499 IPC

5) Midangte blackmail na lam hawi print emaw, zawrh chuah emaw - Sec. 292A

6) Hmeichhe duh lo chung biak luih - Sec. 354D

7) Mipat hmeichhiatna lam hawi a tawng emaw comment pek - Sec 354 A

8) Mi privacy tih chhiat sak - Sec. 66E

Mizorama kan hun tawn mek

Engkim fiamthu a la ṭhin Mizote hian kan fiamthu phenah mi natna tur kan uar ta hle mai. Heng mite zingah hian mimir te hi a tuartu an nih rualin kan milar neihte (celebrities) te hian an tuar na zual. Mak deuh chu, Mizo zinga changkang ve tawk tak tura ka ngaih zingah hian midangte troll nuam ti em em an awm tlat zel hi a ni. Fiamthu duh angin an in lantir a, an fiamthu phenah mi dangte zak takin an sen ṭan ṭan fo. Kohhran ṭhalai hruaitu midangte troll nuam ti tlat pawh hi zuk awm a! A Pathian thu lo lutuk.

Mei nei tak tak leh a tuartu tana ngeiawm tak takin kan fiam fo a. An chhan let ve hlekin a aia nasain kan han troll leh a, chin tawk neih a ṭha hle a ni.

Engtin nge

kan hmachhawn ang?

Thil ṭha ber ni fo chu midangte min kahna tam tak hi ngawihsan a ni. Kan chhan let hian chance dang ṭha zawk kan siam belh a ni duh viau. Mahse, rilru dam si lo a ngawih ral hian rah chhe zawk a chhuah ve thei tih hriat tel a ṭha. A bikin milar kan nih chuan thu serious tak a nih loh chuan chhan let loh hi kan zir a ṭha.

Thil tam tak kan hmingchhiat theihna ang chi ah hi chuan dan lam leh thuneitute nena hmalak ngam a ṭha khawp mai. Kan fimkhur phah deuh bawk ang. Cyber bullying chingte hi social media lamah kan block daih hi a ṭha fo. Heng mite avanga kan rilru a hah chang hian mithiam leh rawngbawltute pan a ṭha.

Heng lam hawi thuneitute hnena thlen a nih chang hian an va thlenna ten an lo ngaih hoh sak chuan nidang zelah anmahni kan rinna a tla hniam thei. Heng case hi a serious a ni.

Inzirtirna

Nu leh paten kan tu leh kan fate social media lama an ṭawngkam hman hi kan chik fo a, hawihhawm inzirtir a ṭha. Mipa social media a phunchiar em em maite hi makpa atan an itawm lo a, mi puitling anga hmuh an har bawk. Kohhran ṭhalai leh YMA thlengin he lama hawihhawm inzirtirna hi kan mamawh a ni.

Kan Pathian hian eng sual nge a huat ber ang ti ta ila kan chhana tur chu - ‘Midangte rilru hliam sak’ hi a ni tiin ka chhang ngei ang. Chuvang chuan Mizo fa Kristiante he lamah hian kan ṭhanharh a ṭha khawp mai.

- Lalmuansanga Khiangte