ZORAM HARH RAWH, SALTANG CHHUAHNA DAR A RI E

Ka zing thingpui in pahin Aizawl Post leh Vanglaini chanchinbu ka bih a. P.L. Liandinga ziak “THALAI IN POLITICS NGAIHVEN ANGAI” tih kan chhiar chuan, ka zan mut dawna muhil thei lawk loa ka ngaihtuah, kan ram ṭhalai leh mipuite hian ngaihtuahna fim taka Political Party ṭan lam kan neih ngheh lutukna te hi phelh dul deuhin, ram roreltu tur mi ṭha kan thlan chhuah hi tun hunah hian ava ṭul tak em tih ka ngaihtuahna te chu min chawk nung a. Ro an rel laia ram, khua leh tui an hmangaih ṭhin zia te kha zirchian ava ṭul em!

Politics boruakin Mizoram alo lut a, dan rual lohin mipui thlan sawrkar kan siam a. Ram roreltu thar mipuiin kan thlan tirh aṭanga vawiin ni thlenga kan ram dinhmun hi thlir chungin, hmalakna tur tam tak kan hmu ang. District Council hunlaia kan hotu taima leh huaisen Pu C.Pahlira hmalakna Aizawl chhuahlam leh tlak lama C.P Road vawiin thlenga kawngpui ṭangkai tak hi a hlu khawp mai.

Pu Laldenga hun chhung reilote a Chanmari leh Bawngkawn inkar kawngpui zauh te, Brig. T.Sailoa’n Aizawl khawpui laili lai tak Assam Rifle hmun leh Treasury Square, D.C Office kawt kawngpui zauh te leh Bawngkawn leh Durtlang inkar kawngpui Pu Zoramthanga zauh te hi a ṭha. Lengpui Airport Brig. T.Sailo hun tawp lama Pu Lalhmingthanga nena Central sawrkara an nawr hlawhtlin, Pu Hawla huna siam puitlin takte hi a lawmawm. Bairabi Hydel Project leh Aizawl khawpui zauh bulṭan tawh te kha han chhunzawm phei se Pu Hawla hi kan fak khawp ang.

Kan sawrkar hrawn mek MNF sawrkar hi chu, Zoram mipui tam zawk hi chuan 2023 inthlanpuiah hi chuan hahchawlhtir tawh mai a ṭha ang a tih hi nitin an pung mek ni te hian a hriat. Term hnih ro an rel chhung hian, sulhnu ropui an neih hmel loh bawk nen. Tun hnaia hma an lak ṭhenkhata sum sen tur an chhawp chhuah tam hu ang aiin a phuailuai lam deuh zel ni te hian a hriat. Kan in sak leh lei dawh chim ta mai te leh a foundation luite lian in a hnawl thluk tak mai bakah, kum tluana Zoram kiltin aṭanga motor kawngpui chhiatzia thu report awm ta zut mai te pawh hi a ninawm lulai ta deuh lo maw!

Kan hotupa berin 'Flagship programme' hiala 'mau chin' ala buaipui reng mai hi chu, Zoram mipui leh mirethei tan thil dang buaipui zawk tur a tam dawn tehreng nen. I.A.S leh Officer lian hna bansan a mau chin tum deuh tan pawh, Superanuation Pension hma in kan mau chin pawh a puitling hman dawn hleinem le! Kan Mizoram mau chi hrang hrang te hi enkawl loh leh a chi tur manto tak tak a lei buai ngai loin kum khatah a puitling thei mai si a. Sawrkar hian Bairabi/ Hortoki ah te khuan 'paper mill' te hi din ta se kan ram mau ring ringawt deuh thaw a, Badarpur Cachar District a Paper mill te ai khuan kan hlawk zawk ang a. Kum tina kan ram mau an tawlh thlak te a tawp ang a, mi rethei leh mithiam tan hna a tam bawk ang.

Kan kuhva thar te hralh theih loh phah a, ram dang kuhva ro dan phal loha tawlh ruk, tuna khawi lai lai emaw a godown siam chawpa chheh khawm la awm nia an sawi te hi smugling bungrua eng eng emaw te nena zawi zawi a tawlh ruk zawh hram hi an tum emaw ni chu aw a tih theih rum rum mai.

Kan kuhva thar lah hralh theih la ni bawk lo nen sawrkar hmasa Congress lah kha term hnih min hruai a, min thlen thuipui teh chiamin a lang lo.

An hun tawp dawn lama sum tam tak senga an buaipui Sakawrhmuituai tlang SKYWALK te kha, Zawlbuk a e tang ve ve tih ang maiin MNF nen an inpuh tawn vel ta mai mai nge? Central aṭanga pawisa sawi chhuah leh pawisa puk leh indaih tih awm chuanglo, leiba neih tawp theih loh thu te leh kan in hausak hleih lulai lutuk te hi sawi a mak mang e.

Zoram mipui an harh mek a, nakum 2023 inthlanpui awm tura kalphung thar, mipui sawrkar siam turin an rawn pen chhuak zel e. Tuna MNF kaihhruai sorkarah hian ṭhalai MLA mithiam leh sakhaw mi tak tak leh Party worker te Zoram hi tun aia ṭha leh hmasawn tura kaihhruai duh leh tum tak tak mithahnem tak in awm tih kan hria. Kan MLA te phei kha chu in thinlung lairil chhia leh ṭha pawhin in pawm leh in amen pui chiah lem loh nia ngaih theih, thawhpuite hek thla tura hmel hlim lo tak chunga speaker hnena in han inzui lut han hmuh te kha, mitthla ah cham reng mai.

Kalphung tharah chuan ngaidama theihnghilh vek a ni. Huaisen takin lo penchhuak u la, in thiamna nen Zoram thar lo thleng turah hian hma rawn hruai u la, kan lo lawm ang che u. Zoram harh rawh, saltang chhuahna dar a ri e.

- Lalhmangaiha Sailo, Holy Cross Bakery