Ka Pa Kutchuk

Ka pa khan a kut vei lamah khan kutchuk a nei a, mi tan chuan thil ho mai mai phei zawng a ni ang; tin, mi dang tana han awhawm tur thil pawh a ni lo ang; mahse ka mitthlaah hian a cham tlat a.

A kutbawr hnung lamah khan chu kutchuk chu a awm a, a len lem loh bakah a lang chiang teh kulh lo ve hrim hrim bawk. Kum a'n vei khan kha a kutchuk kha a reh telh telh a ni ang, kum 50 te a'n chuan hnu phei kha chuan a hre sa tan pawh zawn ngial a ngai ang tih tur khawp a ni tawh. Mahse camera ṭha chi kutchhuak thlalak ang mai hian keia mitah hi chuan a fiah ta reng a.

Min chul mut ṭhinna kuta mi a nih vang nge, min kuah laia a lan chian ṭhin vang nge, a eng vang ber nge ka hre lo; ka mitthlaah hian a chiang tlat a ni.

Ka dam loh changa ka pang a lum nge lum lo tih hriat tuma ka chal a rawn deh ṭhinna kutah khan chu kutchuk chu a awm a, ka pang a dai tawh em tih hriat tuma ka chal a rawn deh ṭhinna kutphah hnung lamah khan a ni chu kutchuk chu a awm ni.

Lehkha min zirtir changa a kutzungchala ka zirlaibua thu inziak a kawh lai te khan chu a kutchuk chu ka hmu ṭhin a, ka hmaa ṭhu tung chunga ka pheikhawk hrui min suihsak lai te paw'n ka hmu ṭhin. Ka nu vawksa chhum kan chaw ei dawna a chan lai te pawhin.

Vawi khat chu, ka la hre reng mai, kum hlui thlah zanah ṭhenawmte inah kan daklut a, kan daklut han ti hluai ila, thil eng emaw ti tura a kal kha ka zui a ni ta awm e. Dar 12 la hla mah se halpuah ri hriat tur a awm tawh a, halmawi leh halvir rim te pawh a nam chum chum tawh. Kan lut lam nge kan haw lam ka hre ta lo, kan lenna te sumhmuna (verandah) kan awm laiin tute 'rocket' hal emawni kha kan lamah chuan a rawn thlawk ta thut mai. 

Kan lennate halpuah chi hrang hrang dahkhawmnaah tak chuan chu 'rocket' chu a rawn ṭum leh ta zel a, kan awmna vel chu a sen ta zuai zuai mai a nih kha. Beng bulah rangva chhia an vaw ri ta emaw tih tur khawpin a bengchheng a, zan thim a lo ni bawk nen, bula mite pawh inhmu hlei thei lo khawpin zen khuin min bawh ta a ni. Ka pa khan hmanhmawh phelengin bang kilah min kuah phei a, bang lam hawia min dintirin, ka hnung lam aṭangin a kut vei lamin min kuah a, a kut ding lamin ka hnar leh ka ka min hupsak - ka la hre reng. Maimichhing turin min ti a, ka beng hup turin min ti bawk. A dawih chi tih takah ka mangang ngang mai a, ka thinphu te pawh sana pui inkhawng ri ang fawk fawk a ni! Chumi ṭuma min kuahna chu kutchuk awmna a kut vei lam kha a ni.

A kut lehlama min kuah bakah a kut ding lama ka hnar leh ka ka te a hup avangin, kut dang a nei tawh si lo a, ka pa khan kha halpuah zen khu leh mei alh zuai zuaite kha a sepui ruah tuar ta ringawt mai lo thei lo a ni tih kha tun hnu, kum tam liam hnu hian ka hrethiam ve chauh! Kut dang pawh la nei se ka mit hup nan te, ka beng hup nan te a hmang ang a, mahni inven lam a ngaihtuah chuang lo ang tih pawh a hnu feah a ni ka hriatthiam ni.

Lehkhachaih min siamsak lai pawh khan a kutchuk chu ka hmu. Lehkhachaih siam kha a lo thiam lua lo tih leh thiam lo chungin min lo siamsak a ni tih te pawh tlaikhawhnuah ka hrethiam chauh!

Chumi ṭum chuan kan kawt kawngpuiah ka lehkhachaih chu min chaihpui a, sang theihpatawpa sang kan chaih hnua kan han hlum let leh chuan, "E! Van rim a nam. Han hnim ve chhin teh," min ti ta pek! Ka'n hnim chhin a:

"A nam em?"

"Aw."

Kha kha van rim ka vawi khat hriatna a ni ang. A hnua ka hriat leh pawh ka hre lo - ka pa'n "van rim a nam" tia min kawhhmuh a nei ta lo miau a.

Ka pa kutchuk mawlh kha - Kum thar tuka, "Lalpan malsawm che rawh se," tih paha a kut khing hniha min chibai chunga min han hmer vang vang te pawh khan a kutchuk chu ka hmu ṭhin - kum tin vawi khat.

Ka lehkhabu tlawm te mai "Aizawlah Aizawler" tih a tlangzarh lai pawh khan ka hmu tak asin.

Ka pa kutchuk kha!

- Lalhruaitluanga Chawngte