Vanlalsailova thusawi kha
Mizo zaithiam daih rei tak mai leh lar zo tak Vanlalsailova hi kei chuan a hranpaa hriatna ka nei ve lem lo a, vantlanga kan hmuh chin bâk hi belhchianna pakhatmah ka nei lo chungin hman nia ZPM Office-a a thusawi ka ngaihthlak khan ka ngaihdan ka thlan dawrh a ni.
Sailova khan ZPM a ṭan thu a sawi lo a, MNF leh Congress a party angin a bei ve lo. Sailova khan Mizoram siam ṭhat a duhna kawngah sorkar hnathawk hausa leh eiru a bei mai a, Political party aṭanga kan ram rawk tute a bei a, Mizo ṭhalai thusawi ka ngaihthlak tawha a ṭha ber pawl a ni.
Kan sawi tak tak hmain amah Sailova sawi ang khan a sawina hmun kha ZPM Office a nih vang khan ZPM kha lo in dah fihlim lo ula. Mihring mizia hriatna chu lalna leh thuneihna an chanin a hriat ṭhin tih ang khan a ZPM teh reng pawh hi lal loh vanga sawi kai lo mai mai pawh in lo ni thei reng bawk. Zoram pum thlirin Sailova thusawi kha a va ṭha em.
Sailova hi lehkha thiam säng tak a nih hre lo mah ila a tawn hriat a tam tawh viau. Ram changkangah a khawsa nasa a, Mizoram tana rualawhna a neih hi a pawmawm a ni. Sailova sawi angin sorkar hnathawk dik taka khawsa chu a hausak theih lova, Officer senior pawh hian kum khata an hlawh hi hmang miah lo se in hmun ṭha pangngai leina daih pawh an hlawh lo.
An fate zirna leh an nupui fanau incheinaah ringawt thlà khatah an hlawh aia tam hmang thei Officer kan neihte hi Sailovan 'Eiru ṭhang laklawh chu an tim miah lo' a tih kha in nih avangin he ka thu ziak hi in chhiar chuan lo zak ve deuh tawh ula, ṭhenawm te pawhin an hlawh zat in hriat in ṭhenawma Officer hausa pui kha lo zah lo lui ang che u.
Politician hausa a sawi mawlh mai kha a ni ngaihtuah ngai ni. Eiruk ngaia nei tawh, an hlawh zat kan chian em em chunga hausa thur thur mai hian ram an hmangaih kan ti thei em le?
MLA hlawh zat kan hriat avang hian contract leh supply lama ei nei ve duh zel MLA te hian Pathian an ṭih loh piah lamah Mizoram hi an hmangaih loh avangin i hnawt bo hmiah mai ang u. Sailova khan Chief Minister hlawh zat aṭanga a chhut khan ram hruaitute eiruk leh eiruk loh a lang reng mai si a.
MLA nih hnua hausa, AMC lama tlin hnua khawsa thei sawt politician hi chu kan chhawk hmiah a ngai a ni, eng party pawh ni raw sek sek. Zoram ṭang fan fan.
- Malsawmkima (Ms-a)