NE Olympic Games Thlirletna - I ; Pariat zinga parukna Mizoram

Hmarchhak infiammite khawm­pui lian, North East India Olympic Games 2022 chu November 16, Nilaini zan khan neih zawh a lo ni ta a, Mizoram pawhin state pariat inel zinga parukna dinhmun luah chungin, hawi sang lo tak chungin kan mangṭha ve ta a nih kha.

Meghalaya khawpui Shillong chuan he inelna hi hneh takin a thleng a, Mizoram Olympic Association leh Mizoram Journalist Association hotute duhsakna changin, kei pawhin kar khat chhung zet chu he inelna hi ka zuk chhim ve a, a ṭan zan aṭanga a tawp zan thleng cham chilh ka ni bawk a, tawnhriat hlawk thlak tak tak sawi tur a awm nual.

A thlengtu Megha­laya inpekna leh inbuatsaihna chu fak tlak a ni a, hmar chhak infiammiten nasa takin hma kan sawn tih hmuh turin a awm bawk - chutihrual chuan Mizoram dinhmun erawh sawi fe tham a awm.

Sorkarin kan infiammite tana hna a thawh ṭhat tawk lohna te, sports asso­ciation hruaitu ṭhenkhat la inpek tawk lohnate hi ziak vek dawn ila, ziah vek sen a ni lo - tunah chuan Part I-a kan tih theih chin kan thlir phawt ang!

A thlengtu lam
National Games thlen tum Meghalaya hian May thla khan an state kum 50 tlin lawmna ni pah fawmin Meghalaya Games an lo nei tawh a, North East Olympic Games hi an state kum 50 tlin lawmna kal zela an thlen a ni.

March thlaa Sports & Youth Affairs Department (2022-23) budget atana vaibelchhe 208 pawmtu state hian NEOG atan hian vaibelchhe 10 vel an ruahman zet a, mahse, official ṭhenkhatin an sawi duh lo viau nain ṭhenkhat sawi danah erawh vaibelchhe 18 an seng tling.

Meghalaya hian inelna thleng tur hian khawi aṭang mahin sum a hranpain an hmu lo a, anmahni state sum liau liau hmangin inelna hi an thleng - heti chung hian an thleng hneh takzet a, hmun hma an neih ṭhat sa avangin an tan a awlsam bawk.

An khelmual pui ber Jawaharlal Nehru Stadium chu National Games thleng tura an inpuahchahna avangin hman theih a ni rih lo a, heti chung hian inelna thleng turin buaina an tawk lo.

Hmun hma a ṭha
Tun ṭum NE Olympic Games hi Shillong khawpuiah vek neih niin, hmun hrang hrangah inelna hi neih a ni a, Archery, Athletics, Badminton, Basketball, Boxing, Football, Judo, Karate, Shooting, Swimming, Table Tennis, Taekwondo, Tennis, Wushu, Cycling, Golf, Weightlifting leh Wrestling-ah te inelna neih a ni chungin heng zawng zawng thlenna tur hmun hma hi an nei vek.

Shillong Club, MFA Turf - Polo Ground, NEIGRIHMS Basketball Court, JN Sports Complex - Indoor Hall, SAI Centre - NEHU Campus, Crinoline Swimming Pool Complex, Indoor Hall - NEHU, Malki Forest, Shillong Golf Club, Laban Indoor Hall, Basketball Court - NEHU Campus leh Assam Rifle Indoor Hall-ah tel inelna hi neih ṭhin a ni a, hmun ṭhenkhatah hian in sa chawpin, chu chu inelna hmun atan an hmang.

Hmun tinah media tan harsatna awm loa hnathawh theihna turin media room an dah vek a, internet nena thlun zawm vek a nih avangin result zawh ruala report siam nghal duh pawhin, journalist tan chuan a awlsam hle.

VIP, media leh infiammite tan ei tur chhawp reng a ni a, infiammite thlenna pawh hmarchhakah chuan hei aia ṭha a awm thei lo ang, tih tur khawpin an buatsaih ṭha a, ei leh in lam an hnianghnar hle bawk - heng zawng zawng thlir hian, Mizoram tan chuan inelna thlen a la hautak deuh mai thei!

Parukna Mizoram
Kum 2018 khan NEOG hi a vawi khat nan neih a ni. Manipur chu pakhatna an ni a, hemi ṭum hian inelna hrang hrang 12-ah intih­siakna neih niin a thlengtu Mani­pur chuan medal 159 (80 gold, 48 silver leh 31 bronze) lain pakhat­na an ni a, Mizoram chuan medal 52 (8 gold, 15 silver leh 29 bronze) lain palina kan ni.

Kuminah infiamna 18-ah intih­siakna neih a ni ta a, Mizoram hian medal 106 zet la mah ila, parukna kan ni phak hram a, gold medal 16 chiah lain, silver 30, bronze 60 kan la bawk.

A medal ang zawnga chhut chuan Mizoram hian kum 2018 aiin kan ti ṭha a, mahse, tun ṭumah hian 2018 aiin inelna a tam zawk tih hriat a ṭha - Assam leh Manipur hi kan tan el rual la ni lo mah se Arunachal Pradesh, Meghalaya leh Nagaland hnuaia awm hi zahna chang hre tan chuan zahna tur a ni.

Meghalaya leh Nagaland hi National Games 2022 neih zawh taka medal pakhat pawh hawn lote kha an ni a, NE Olympic Games 2018-ah khan kan hnuaiah an awm ve ve bawk - state dangin hma an sawn laiin keini erawh hnung tawlh zawngin kan kal tihna a ni.

Tu nge inenfiah tur?
Kan sorkar hian infiamnaah kan chet ṭhat a duh tak tak a nih chuan, an sum senna lam an enfiah a ṭul - Mizo nawlpuiin a game kalphung leh awmzia pawh kan hriat loh, Golf Course ropui tak kan nei a, he hmun atan hian nuai 6448.08 sen a nih laiin NEOG-ah golf aṭangin Mizoramin medal hawn a nei lo.

Phul lem kan uar a, volleyball court thlengin kan phah. Hetihlai hian infiamna ṭhenkhat erawh kan ngaihthah viau niin a lang a, a bik takin medal lak tam theihna combat sport lamah kan insawr bing lehzual a ngai.

Combat sport ṭhenkhatin inter­national level-a medal an lak thu kan hriat ṭhin laiin, hmarchhak inelnaah pawh kan che hleithei lo lawi si - hei pawh hi enfiah ngai tak pakhat chu a ni phawt mai. Mizorama indoor stadium kan neih ṭhenkhat chu puipun nikhua atan sorkar lamah pawisa chawia hawh theih an ni a, hei hian combat sport-te practice-na tam tak a tibuai bawk - mi ṭhenkhat birthday lawm vangin infiammi ṭha tak khan a practice-na a thlak chhen a ngai ve thei tlat! Hei hi sorkar tan ngaihtuah ṭul tak a ni.

Mizoten kan khelh nasat em em badminton-ah medal pahnih chiah kan hawn bawk - hei pawh hi infiamnaa 'future' nei tawh miah lo, dul tih thep tum hrim hrima badminton court luah ṭhinten kan infiammite hmun hma an luah sak nasat vang a ni thei em, tih pawh hi zawhna lian tak a ni.

Infiammi leh association
Ram tan kan feh chhuak a, sorkar sum (mipui sum) leh chhungte sum ti hekin kan pen chhuak a, mahse, kan chhuah chhan ber ngaihtuah hauh lo a, 'excursion' a kal emaw inti mai, infiam­mi, association hruaitu leh coaching staff zingah kan la awm niin a lang.

Infiammi tam takin ram tana thah thawh ve châk a, medal hlawhchhuah ngei tuma an beih laiin, ṭhenkhat erawh thunun ngai fe fe hmuh tur an la awm a, NEOG meuha feh chhuakin, "Kan in fit tawk lo," han tih maite pawh thil fuh lo a ni a, association hruaitu leh coaching staff zingah pawh zu khap lohna hmun nuam ti tlat an la awm.

Mi tlemtê tihsual avangin ram tana ṭhahnem ngai, hlawhtlin ngei châka tuihal tam tak hmai a bal thei tih hriat a ṭha a, keimahni hmakhua kan ngai lo a nih pawhin midang kawng dal zawnga awm loh dan ngaihtuah a ngai.

Hetihrual hian infiamna tam zawk erawh, hruaitu, coaching staff aṭanga infiammi thlenga sawisel tur reng reng awm lo, theihtawp tak meuh chhuah an awm a, ka chenchilh leh ka biak phak mai zingah football, boxing, wrestling, table tennis leh tennis te chu fak tlak an ni - an vaiin kan ziak vek seng lo ang.

- John Zothansanga