MNF hian hna a thawk chhe lo

MNF hi Mizo hnam thinlung dik tak pua din a ni a, Congress leh BJP tih vel te ai chuan Mizote tan party innghahna tlak a ni. Hetia ka sawi avang hian MNF hi sawisel boin an sorkar chhungin hna an thawk ṭha e, ka tihna erawh chu a ni bik lo.

Ka sawi duh chu, tunlai hian MNF party beihna a tam a, mipui lam aṭanga nawrh huaihawt leh kawngpui dan chah tih vel a lo tam ve lai a ni nen, MNF hi sorkarna an chelh chhunga hna thawk ṭha lo leh lak tlak lo anga hmutute pawh an lo awm maithei.

Mahse hetiang hi a nihna tak chu a ni si lo. A nihna takah chuan MNF hi an chhia a ni lo, an vanduai mai zawk a ni. A chhan chu mautam kum khan an lo sorkar tawh a, an sorkar hun lo chhuah hian vanduaina thil eng emaw an tawk thei bik a tin a ni.

Kan hriat ṭheuh angin Covid 19 vangin hripuiin khawvel a tuam. Chu hripui chuan keini pawh min zuah bik lo a, kha chen kha hna pawh thawk ṭha thei loin kan in khung a. Sorkar budget lo kal tur tam tak central aṭanga kan dawn tur ang te pawh kan dawng lo tih kha lo hre nghal bawk ila. Khati taka hripuiin a tihpui sorkar chu sorkar vanduai a ni ta phawt mai.

A chhan chu MNF party sorkar hian a sorkar tirh tuk mai aṭang khan hna a thawk chak nghal em em a. CM-in kawng chhawng siam dan tur leh kawng zauh theih dan tur te pawh a en a, chak takin hma a la nghal mai kha a ni a.

Mahse mihring tih theih chin piah lamah Covid19 in min han nuai ta tak tak mai kha a nia, kum 2 dawn chu hna pawh thawk lo ang vel khan kan awm a nih kha. Khatiang karah sorkar tan pawh duh leh tum anga chet hleih theih a ni bik lo tih pawh kan hre vek ang.

Tunah chuan Covid 19 hrileng a reh ta deuh duak a, hna han thawk turin MNF tan hun a tlem tawh lutuk a, nakkumah mai hian MLA election kan neih a lo ngai ta si a ni. Chuvangin, MNF party hi a duh ang leh mipui tana a dream ang taka kawng chhawng te siam a, cheng nuai thum te sem vel zung zung tur hian sorkarna i pe leh phawt mai teh ang u.

MNF hi an ṭha ber e ka ti hauh lo, mahse an thil tih tum an flagship programe te pawh kha kan hre hlawm ang a, khang te kha tih hlawhhlin tirna hun i pe ang u ka rawn ti mai a ni. Hunṭha hnuaiah sawrkarna pe leh ila, he ta an dinhmun a zirin a dawt leh chu Zoram mipui hian thutlukna eng pawh siam ila ka pawm tawh ang.

- Pekhlua Chawngthu