NLUP A HLAWHTLING TAKZET EM?

May 29, 2017 khan Vanglaini chan­chinbu-ah HC Van­lalruata khan CAG report ang chuan NLUP hlawh­chham dan a rawn tarlang tawh a. Cen­tral sawrkara sum dil chhuah nana plan an siam jhum cultivation tihtawp te, buha intohdelh te, ramngaw 80% siam te, Mizoram pum hman dan tur plan duan chhuahte behchhanin zirchiannaah chuan ‘engmah lo mai a lo ni e’ tiin marginal mark an pe tiin kai tawi mai ila a dik awm e.

Comptroller and Auditor General of India (CAG) hian an duhtui deuh nge kan hre vek lova, MNF-in PMGY kawng an laih a endik pawh khan a chhuah chhe hle a. Sum vaibelchhe 118 chuang hmanna thingtlang khua inkalpawhna tur kawng 71 laihna tur an pekah kawng 66 chauh an lai a, kawng 15 chauh pawm tlakin an lai thei tiin a lo record tawh.

NLUP chung­changah Chief Mi­nister chuan sawrkar chu a hlawhtling tawh, a ti tiin a sawi a - hei tak hi kan sawi zui duh chu a ni. NLUP a hlawhtlin takzetna ber chu Congress an sawrkar theihna tak hi a ni. MNF pawhin hei hi an hrethiam ve ta a ni ngei ang SEDP duang chhuakin tun apangin an zuar ve ta a ni.

A dawngtute lamah NLUP hlawhtlinna sawi tur a tam em em - NLUP dawng tawh ina kan len chuan a hmaa a neih theih loh TV te, washing machine te, Fridge te, furniture ṭha deuh zawk te, thil ṭha dang hmuh ngai lohte a lo awm tawh mai ang!

Heng chang hi a ni lo NLUP sem hlim chuan kohhran thawhlawm chenin a pung! Dawrkaite an hlawk a, ruling tamna khuaah phei chuan hmasawnna hmuh mai theih tur a tam bik a ni.

Hetih karah eizawnna kawnga hlawhtlinpui an awm ve zel bawk a, heng mite hi 10% pawh nise sawrkar chuan chhunzawm zel tlakah a ngaih ngei a rinawm a ni. Sawi tawh angin a hlawhtlinna ber erawh chu an sawrkar hi a ni. NLUP hlawhtlin vanga chenna in lo nei thei ta te, thingtlanga rangva inchung lo tlep tuar ta mai te han hmuh hian NLUP a hlawhtling tih ngaihtuah nachang hria ila kan hahdam mai awm e.

Mipuiin kan hriat hmaih hauh loh tur chu tun sawrkar mekin NLUP a hman ṭantirha Mizoramin chawpui buh a tharchhuah chu kum khatah thla hnih leh a chanve ei vel a nih laiin kum kua vel dawn NLUP kapui a nih hnuah tuna a thar chhuah chu thla khat leh a chanve vel ei a ni ta a, hemi kawngah nasa taka tan lak a ngai a ni. Buh thar chhuah chu pung mahse a eitu lam punna a san avangin a he dinhmun hi a thleng a ni.

- C. Vawra, Kanan Aizawl