R. VANLAWMA HRIATRENGNA LUNGPHUN, MAUBUANG KHUAAH

Zoram khawvêl leh zofate awm chhûnga hming dai ngai tawh lo tur leh ṭhangthar lo la awm zêl turte'n an hril fak la ni zel tur, R. Vanlawma hriatrengna lungphun chu, ni 11. November, 2022 (Zirtawpni) khan amah R. Vanlawma pianna khua Maubuangah, Maubuang Br. YMA bultumin neih a ni. He hun hlu tak hi chhimtu an tam hle.

Keini pawh Pi Zohmingi (Nu Zohmingi, R. Vanlawma fanu) hnên aṭanga sawmna kan dawn angin Aizawl aṭangin Prof. J.V. Hluna leh Mahmuaka Chhakchhuak (Lunglei aṭanga rawn zin) nen kan pathumin phur takin kan kal a. Prof. J.V. Hluna'n a motor thawh chhuah puiin, min phur phei a, a mah avangin he hun hlu tak hi ka hmang ve thei a, ka lawm takmeuh a ni. Motor khalh a lo thiam ngang mai a, a speed pawh a la sâng veh vawh viau!

Maubuang pana kan tlan laite chuan R. Vanlawma chanchin leh kan ram tana a hmathlir leh a hnathawhte chu titi tui berah kan neih a, keimahni tui tuiin kan tui ve hle a ni.

Tichuan, dar 11:14 AM ah tluang takin Maubuang khua chu kan lût a. Lungphun buaipuitute'n min lo dawngsawng a, hmun danga pêng khawtlai lovin, keini pathum chuan thlanmual lam kan pan nghal chawt a, chutah chuan Pu R. Vanlawma lungphun programme han hman kan tum ve ngawt a ni. Mahse, kan kal sual nasa mai, kan programme hmanna tur chu R. Vanlawmate inhmun hlui (Biak In) hnungah daih a lo ni . Kan chhuk leh a, kan zuk thlen meuh chuan school naupang leh mipui an lo pungkhawm nasa tawh mai. Prof. J.V. Hluna ho chuan, programme ṭan hmain lungphun bulah thla kan la sawk sawk a.

Reilote hnuah, kan khuallian Deputy Chief Minister Pu Tawnluia leh khual zahawm Prof. F. Lalnunmawia (Bialtu MLA) an rawn thleng a. Lungphun hawn programme hi Pu C. Laldingngheta, VCP, Maubuang chuan kaihruaiin, Deputy CM chuan R. Vanlawma hriatrengna lungphun chu hawngin, thlalak honate kan nei a. Gov't Middle School, Maubuang naupangte chuan cheraw thiam takin an kân a, kan mit a tlai tlâng ngei mai.

Chumi hnuin Awithangpa hall ah lût khawmin, 'Lenkhawm' programme kan hmang chhunzawm leh a. Pu Ramfangzauva Chairman, organising committee-in min kaihruai a. Deputy CM leh bialtu MLA hnen aṭangin thusawi ṭha tak kan ngaithla a. Chhungkaw lam leh pawl hrang hrang aiawha thusawi ngaihnawm tak tak kan ngaithla leh a, zaithiam Marina V. Varte leh Lalrempuiate'n a khat tawkin mipui min awi bawk. Tin, Pu C. Dinthanga'n R. Vanlawma lungphun puala a hla phuah, ruah ṭham loh chu a ṭhiante nen thiam takin an sa bawk.

Tichuan, tlaiah R. Vanlawma hriatrengna lungphun ruai chu, hlim tak leh tlai takin kan kilhova, keini pawh tlai lam dar 4:30 ah Maubuang khaw nuam tak chu, chhuahsanin Aizawl panin kan tlan leh ta a. Pathian hruaina changin Prof. J.V. Hluna'n tluang takin Aizawl min phur thleng leh ta.

Maubuang khawtlang hi, ka hmuh tum loh dan deuhvin ka va hmu a, an khaw panna kawng leh an khawchhûng a fai nuam em em a, a chhunga chêng mipuite an lungrual hle bawk niin ka hria. Hetiang hun hlu, an khaw Pa hriatrengna lung an phun hi, an fakawmin an entawn tlak ka ti a. Maubuang khuain R. Vanlawma an nei hi vannei ka tiin, ka lawmpui takmeuh a ni.

R. Vanlawma. Zikpuii Pa. L. Keivom. Prof. Siamkima. Lala Khobung. VL Zaikima leh ka Pa MC Lalrinthanga te kha, ṭhen hran theih loh khawpa inkungkaihna ṭha tak nei an ni. An taksa chu hmun khatah cheng lo mahsela an rilru, an thinlung kha nghet taka thlunzawmin an awm a, "Dam leh tlang khatah, thih leh ruam khatah" tih rilru an pu takmeuh meuh a ni.

R. Vanlawma leh kan Pa, MC Lalrinthanga kha, vawi khat chu kumhlui thlah tlaiah Zikpuii Pa leh Prof. Siamkima thlan tlawhin an kal a. An khua a har em em a, an haw lamah chuan inbe tur pawh awm lo khawpin, an lung a leng a ni. Zoram dung leh vang fanga hun tam tak lo hmangho tawh an ni a, tun hunah hian lung an ti lêngin, an ngaihawm ṭhin ngawt a ni.

Vawi khat chu Minister P. Siamliana khan R. Vanlawma kha, in leh lo a dinna tur leh a bul ṭanna tur atan tiin, contract hna sing hnih khat hlêpna tur a pe a, R. Vanlawma chu a lawm thiam hle a, a dam chhunga a la tawn ngai loh a nih thute a sawi hial a ni. A tuk thumna velah kan Inah lo kalin ka Pa hnenah chuan "MC, ka thawk lo mai ang e, a chhan chu Pu Siama hi sawisel ngaiin lo awm ta sela, he hna ka thawh chuan, ka tan sawisel a mawi lovang" tiin work order chu a dah ta hial mai a ni. Heta ṭang mai pawh hiam R.Vanlawma kha, eng mi nge a nih tih chu sawi tam ngai lovin kan hre nghal mai âwm e.

R. Vanlawma ram veinate, kan ram leh hnam tana a sulhnute leh a chanchinte hi kan ziakin, kan sawi seng rih lo ang. Ni dangah kimchang zawkin pho lan kan la tum zêl ang chu.

"Mizoram hi ka phur ṭang ṭang a, a kal sual tur hi kawihsapirin ka kuai fan fan a, ka kuai hneh lo lek lek a ni " - R. Vanlawma

- MC. Lalthianghlima