DELHI SAWRKAR SIKUL-IN HISTORY A SIAM!

Tunhnaia HSSLC board exam result chhuakah Delhi-a sawrkar sikul te chuan record an siam mai ni lo vin history an siam! Pawl 12 exam result chhuakah khan Delhi sawrkar sikul pass percentage chu 98% a ni hem mai! Private sikul te pawh an tichhe chuang lo 92% an kai ve tho! Mizoram nen kan va inang lo nasa mai em! 

Kan ramah chuan private sikul in sawrkar sikul a awpbeh hun chhung hi kum engzat tak ni tawh ang maw? Hetiang ang result ṭha hi Delhi sawrkar sikul-in an la nei ngai lova, history an siam a nih chu!

Delhi sawrkar sikul siamṭhatna runpui chanchin (education reformation) hi ka ziak zauh zauh tawh ṭhin. India ram mai ni lovin khawvel huapa sikul ṭha an din mek a, hman deuha US President Donald Trump-a te nupa an rawn zin pawh khan a nupui Malanie Trump khan Delhi sawrkar sikul hi ralkhatah a lo hriatin a tlawh châk tlat a, a va tlawh nghe nghe a nih kha. 

Delhi sawrkar sikul revolu­tion mi pawimawh berte zinga pakhat chu an CM Arvin Kejriwal-a khu a ni. Hepa hi ngaihsan loh pawh tum ila a ngaihsan loh theih loh, Covid-19 dona kawngah pawh a thawk ṭha ber leh CM zinga active ber a ni mek.

Kejriwal-a chuan he an hlawhtlinna hi sawiin: "Hnam ropui chu zirna ṭha in a din a ni ṭhin. India ram ropuia siam tura kan khualzin kawng chu naupangte, mi rethei leh mi hausate hnena zirna ṭha leh hlawhtlinna dik pêk hmang hian kan zawh mêk a ni. Chumi hmang chuan kan tum ram (dream) chu kan pan mek a ni," a ti. 

Ram khat CM berin mutmawh hnar mawha a neih tlat avangin Delhi chu India ram bâkah khawvela zirna tha awmna hmunah siam a ni mek a. State khat hotu lu berte hi an va pawimawh em! CM berin zirna ṭha a atchilh a, chumi tihlawhtling tur chuan a takin ke a pen chhuak a, Mizorama tih theih loh anga kan ngaih hial tawh, sawrkar sikulte chuan private sikul an lehpel ta zut zut mai. Private sikul aṭangin nu leh pa ten an fate sawrkar sikulah an sawn chum chum mai asin. 

Zoram han thlir ila rualawh a na thin. Kan rama CM kan neih tawhte hian zirna tha hi tihtak zetin an la buaipui lo nge ni vawiin thlengin MBSE hnuaia kan certificate te hi state dangah chapopui tham khawpa lekchhuah ngam a la ni mang lo! Chutih a hnêkin private sikulten sawrkar sikulte an eiral lo chauh a ni ber a. Heti chung hian central service-ah kan rual u te hun a liam a, India ram khawpuiah Mizo officer kan kiam tial tial a, rualawh hi a va na ṭhin em!

India ram pumpui chu zirna lamah hma a sawn zel a, kumina CBSE Class X result chhuakah pawh ram puma pass percentage chu 91.5% a ni vah mai. Zirlai mi 18,73,015 in CBSE hnuaiah Class-X board exam an bei a, chung zinga mi nuai 1.8 chuan 90% chunglam an hmu a, mi 41,804 in 95% an hmu phâk a ni. A pumpuia pakhatna Schaachi Khanna (Delhi Public School, Nerul) leh Soumy Mishra (RN Podar School, Santacruz, Mumbai) te chuan mark 99.6% an hmu hem mai nia! Delhi chu kan sawi tawh a, Maharashtra state pawh hian a pumpui result-ah nikum khumin hma a sawn zel. Hetiang hi mi state than dan leh hmasawn dan a ni a, keini state hi eng dinhmunah nge kan din ve aw? 

Literacy rate-ah sang viau angin lang ve ṭhin mah ila, central serives-ah te, compe­titive-ah te, phaia Mizo officer neih tam lamah te kan ṭhan ve si loh chuan he India ram zau takah hian Mizote hi zawi zawiin kan ral mai palh ang tih a hlauhawm ṭhin. 

Kan state CM te hian NLUP leh Mau te hlamchhiah chuanglo hian Delhi CM ang khuan zirna ṭha hi mut mawh hnâr mawhah han neih ve sela chuan Zoram pawh hi tun ai hi chuan national level-ah pawh kan tawng sang leh zual ang mawle! Kan naupangte hi an smart-in an thluak pawh hi a ṭha lo pawh a ni bik lo, mahse infrustructure leh quality education lamah hian kan la thleng tawi rih em mai a. An thlen tur ang leh nih tur ang an ni pha lo fo em aw? Hei hi a veiawm takzet. 

Zirna ṭha tel lovin ram ropui a din theih si lova.