I & PR Lianchhiari Run

Kum 1890 a din ṭan Aizawl khawpui hlutna laiber chu Borhsap Bangla tuna Raj Bhavan leh Sipai Lammual, Bahrik tlang tuna Canteen kual, Zodin Square kan tih tak inkar tlang dung hi a ni. Helai hmunah hian hmun pawimawh hmasa ber ber Borhsap pisa pui, Dak In pui, Treasury, Quarter Guard, Manding Sap Bangla, Sap thlanmual leh War Memorial te an awm a. Dak Inpui kawt hi Aizawl Zero point a ni a. Heta ṭang hian kawng dung hlat zawng pawh teh ṭan a ni.

Entirnan, chhim lamah Pu Lalbuaia kawt Mission Veng Bazar-ah hian Mel 1 lung a ding ṭhin a, hmar lamah High School step-ah chiah Mel 1 lung a ding ṭhin bawk. Hun kal zelah District Council Office leh Court te, office pawimawh hmasa Education leh Agriculture Office te, mipui punkhawmna hmun Theatre Hall leh Krishna Talkis te a awm zui ta zel a. Tunah phei chuan India hnampa Mahatma Gandhi, pasalṭha Vanapa, ṭhenkhat tana Mizo Hnampa, a ṭhen tana Danmawia Pa - Laldenga te, chutiang zelin Lal Thanhawla hming chawia auditorium te, District Council hunlaia MDC lo ni tawh zawng zawng, an zinga pali lai la dam te hriat­rengna lungphun a ni ta zel.

I&PR department hma­lakna in sorkar leh mipui mamawh ngawih ngawih Multi Facility Centre hleitling tak Lianchhiari hmingchawia sak tum a ni ta hi thil lawm­awm tak a ni a. Helai bial vela mi ropui tak tak hmingchawi a hmunhma kan nei ta zel pawh hi a lawmawm. Amaherawhchu, sum sen tur hmuh fel diam a ni tawh chungin duhthusam anga chakin he Centre sak hna hi kalpui theih a ni lovang tih a hlauhawm.

A chhan chu I&PR aṭanga in dang fel tawh Printing & Stationary sawn chhuah chungchang thu inmun mek awm hi a ni a. Hei hi chinfel ran a ṭul avangin Cabinet pawh hian a rang thei ang bera an ngaihtuah a ngai dawn a ni.

Zofate zinga Information, Publicity, Public Relations huang luh chilh hmasa ber dawttu leh I&PR hmun hma leh an ṭobul a chin chhuaka hretu amah Pu Denghnuna IAS (Rtd.) chuan Lianchhiari hming chawitir hi a ril rem pui lutuk loh thu min hrilh tlat mai. A sawi dan chuan he Multi Facility Centre nihna leh hman ṭangkai dan tur leh Lianchhiari hming hmehbela remchanna lai a hmuh loh thu min hrilh a ni. A nih leh Vanapa Hall pawh hi kan ti maithei, a ni lah taka, hming phhuah chungchang hi fimkhur leh in rawn zau hmasak ṭhin a ṭul reng a ni. Saikuti Hall an peih fel dawn tepah pawh khan Lunglei chhul chhuak Lalzova hming chawi tir rawtna chak tak a piang leh hnuhnawh a nih kha. Hming phuah thiam inti ve takin MINECCO a phuah te kha kan hmang zui ta lem lo.

He Centre hi a puitlin hun­ah ram chhung leh ram pawn aṭanga khualzin mi pawimawh tak tak, mi thil chik mi leh hriatna zau tak takten an rawn tlawh hunah Lianchhiari chanchin lo hrilh dawn ila sawi thui tur a tam vak lo nia. Lengzem hlaphuah thiam hmasaa kan neih Lianchhiari chanchin langsar ber chu Lal fanu lerh tak, H deuhreuh, hmangaihna la na tak, a bialpa tana in phalrai tak kha a ni mai awm e. A ngaihzawng Chawngfianga thing zar thlak zo rawn zuangthla tur, rilru nei taka a lo dip dal luih tlat dan te, puak a ngen, hmathlak bakah fual deuhin tih te, thingtuluang hnuaia luhpui kher kher tih ang vel te kha kan hriat lar chu a ni mai. A pa khuangchawi zana fianrial leh hmun biru zawk pawh zawng hman lova thingkhawn chunga lo khawsa ta mai kha a ni bawk.

Heti taka a bialpa a chetpui avang pawh hi a ni ang, a nu leh pa te pawhin hrethiamin veng daikil kara hmeithai fapa chu neihtir an phalsak ta a. Vanduaithlak takin an palai thikthu chhiat avangin an innei thei ta lo zawk a ni.

Lianchhiari lunglen tlang leh a puantahna hmun ṭha tak mai Dungtlang khuaah humhalh ala ni reng hi a lawmawm. Amah hriatreng nan pawh hei hi a tawk viau rih a ni. Mizo hmeichhe dinhmun chawisang a humhalh a, an zahawmna veng him tlat tura ding MHIP te hian eng nge an ngaihdan tur ka hre lo. MHIP General Head­quarters Office si riala Lian­chhiari Run ding luah tur phei chu an lawm phianin ka ring.

- Zothankunga