SAPṬAWNG LAM DAN HI
Engtik lai emaw aṭang khan nitin chanchinbu lamah mi ṭhahnemngaiten Sapṭawng chungchang an ziah hi ka lo hmu ve ṭhin a, thil lawmawm tak a ni. Hetiang lam chhiar tur hi tam deuh deuh se a ṭha ngawt ang. Chutih rualin kan thuziah pawh fimkhur taka ngaihtuah a, rilru zau tak pu chunga ziah a ṭul ve bawk ang.
Dik nia kan hriat
ṭhenkhatte pawh hi dik lo zawk a lo ni ve thei a. Amaherawhchu, kan hriat dan leh hman ṭhan dan chauh dik emaw tia ṭan khawh tlat hi a awm ve thei tho mai. Hei hi ṭawng chungchangah phei chuan fimkhur a ngaihna lai tak pawh a ni awm e.
Abikin, thumal lam dan (pronunciation)-ah te hlei hlei hian pianpui ṭawnga hmangtu ngeite pawh hi an inlungrual bik lo. Chumi awmzia chu, lam dan dik lo tih lam aiin thumal lam dan hi chi hrang (variety) a tam thei viau tihna a ni zawk.
Chuvangin, Sapṭawng lam dan chung changah pawh "chu chu lam dan dik a ni," "hetianga lam hi chu a dik lo" tiha lo ral khat sawi ve ngawt hi a fin thlak ber lem lo fo. Thumal lam dan hi dik tlanglawn (standard pronunciation) erawh a awm ngei mai. Chutih rualin lam dan ṭheuh ṭheuh pawh awmna ram a zirin a danglam thei.
American leh British ho thumal lam dan pawh hi danglam thei tak a ni. Entir nan, ‘duty’ tih hi British English-ah chuan /DIUti/ tiha an lam
ṭhin laiin American English-ah chuan /DUti/ tiha lam ṭhin a ni tlangpui. Thumal lar tak ‘secretary’ tih pawh hi British ho chuan a tawp hi /...tri/ tia lamin American hian /...teri/ an ti tlangpui thung. Thumal ‘di-’ hmanga inṭan, heng - ‘direct’, ‘direction’, ‘director’, ‘directory’, etc. te pawh hi /DAI.../ emaw, /DI.../ emawa lam theih ve ve a ni.
Chuvangin, thumal lam danah hian lam dan dik tualleng (common standard) a awm rual hian lam dan dik tho, chi hrang hrang (variety) hi a tam thei hle tih hriat a ṭha awm e. Hetiang hre tur erawh chuan pianpui ṭawnga hmangte lam dan ngun taka ngaithlain leh standard English dictionary-a lam dan an ziah te rawn tel chunga zir erawh a ngai ṭhin.
Chutianga kan tih peih phawt chuan lam dan dik leh dik lo emaw, dik zawk tih chungchanga inhnialna tam tak hi chu a bo thei ngei ang.
- R.Lalnunkunga