Hnathawh ṭhulh zawng bawk maw

Mizoramah kawng­pui a chhia a, a chhiat dan hi a namai lo tak bawk a, MNF party chuan kawngpui chhiat avangin total bandh huaihawt an tum a ni awm a, ka ngaih­dan a ni ve miah lo.

Kawngpui chhia hi mipuiin kan ning takzet a nih chuan, kawngpui chhe tak min chhawp saktu political party-te hi nakkum maia inthlan­na lo awm turah hian kan paih daih thei. Chutih hunah chuan mipuiin kawng chhia kan duh lohna vote hmangin kan lantir tawh dawn a ni.

MNF hian an hun­laia kawngpui ṭhat bik lohzia leh kawng tam taka Congress pawh an tluk lohzia lam ngaihtuah lova, hnathawktute hna tiṭhuanawm tur zawnga total bandh an tintuah hi chu sut leh vek se kan ti hle a ni. A chhan chu MNF-in bandh an siam vang hian kawngpui a ṭha dawn lova, mipui nawlpuiin ni khat hna an thawk dawn lo tihna a ni a, mi hausa chinin tuar lovin mirethei bawk hi a tuartu an ni dawn a ni.

Total bandh hrim hrim hi kan ti ri ve ta sek a, hei hi Vai rimnam thil a ni. Lim hal tih te, bandh tihte hi Vai politics hri chhia a ni. Thil serious tawpkhawkah lo chuan hetiang hi rawt mai mai tur a ni lova, mipui mimirin kan hmuh vek kawngpui chhia avanga bandh hi huaihawt tur chu ni se MNF ni loin YMA zawk turah ka ngai a, politics-a hamṭhatna lo zawnna chi a ni hauh lo.

Mipuiin kawng chhia hi an hmu a, an tuar a, an ning a ni. Hei hi MNF-in Congress beihna leh anmahni MNF chu siam ṭha thei anga inlantira lo bandh an tum a nih chuan an ti dik hauh lo ang. Anni hi kum 10 chhung ro an rel chhunga kawngpui siam ṭha em em chuang lo tho kha an ni a, chuvangin inthlan awm tur hre renga boruak lo siamna tur a ni lo.

Political party chuan total bandh a huaihawt dawn a nih chuan a tih awm deuh leh a chhan ṭha leh tling zawk an dap thiam tur a ni. Tun hnaia an sawi Zo Carbon-a sum chingpente hi total bandh neihna chhan tling a ni zawk a, kawngpui chhia hi chu political issue lam a ni lo.

Congress sorkar hnuaia kawngpui chhia hi mipuiin an nin chuan inthlanah an ngaihdan an tilang mai dawn a, tuna mahni party ham­-ṭhatna hui tuma mi kawng chhia advan­tage-a laka total bandh lo neih hi retheite harsatna belhchhahtu, sumdawng hausa tana er tur awm lova ‘chawlh’ sor­kar hnathawk tan ‘ziaka tel lo chawlh nuamsa’ Congress tan ‘hahdamna ni’ vel mai mai a ni dawn si.

- David L Sailo