BELTE PHAI THEI LO KHA...

Indopui pahnihna hun lai khan mite ṭanpuina atan UNO chu sorkar ṭangrualten an lo din a. An scheme hnuai-ah khawvela retheihna chhawmdawl te, hriselna lama hma lak te, ram hrang leh ram hrang intibuai kara rem thu sawi te chu an hmalakna a ni. 

Mite ṭanpui chu an hnathawh ber a nih avangin tun thlengin a la ding nghet reng a ni. Khawvela treasury lian ber US chuan miretheite tan kum tin dollar tluklehdingawn tam tak a sem chhuak ṭhin a, tun thlengin khawvela sorkar chak ber a la ni. 

India pawh hian a khua leh tuite ṭanpuiin an dinhmun aṭanga khai chhuah chu a hna pui ber a nih avangin khawvela democracy sorkar lian ber leh thang duang tak a lo ni ta. India sum bawm chu a pung deuh deuh zawk a ni. 

Kan pi leh pute hunah khan ‘Belte phai thei lo’ chu an lo nei daih tawh a. An ei tur dah ṭhat emaw bela an ei lai emaw pawh nise an bul ami ten ei tur an neih loh chuan ui lovin phal takin an pe chhuak a, a neituten an kham loh phah ngai lova, puar tawk takin an ei tlang ṭhin. Siamtu chuan mihringte hi min enthla reng a, mite tana kan inphal chuan chawp leh chilhin mal min sawm ṭhin. 

Liandova te unau pawhin mim fang khat an inphel hnu lawkah khan vanneihna an tawng baw ta a ni. 

Midangte tana insengso nasa chu an sum bawm a pung tual tual ṭhin. 

Hmanlai Mizote inṭhenawm-khawvenna a an nun phuar nghet tlattu chu nei ve lote hnenah an neih chhun phal taka an pek ṭhin te, a tul phawt chuan phut let nei lovin midangte pawh an pui ṭhin. An chawbel a phai phah chuang lo, a lo pung tual tual zawk ṭhin. Tunlaiin hripui leng avangin chhungkaw tam tak chu kan harsa ṭan ta mek a. Kan hnam nun timawitu kan inpuihtawn ṭhin dan a lo lang chhuak leh ta. 

Mitinte hian kan hnam nun hlu hi i chawi nung zel ang u. Saum leh chingal kan insuah tawnna te chu kan In ropui sak te hian min dal lo sela, ‘sem sem dam dam ei bil thi thi’ te kha a tak ramah i chan thar tir leh ang u. Cheng nuai tam tak ka kawl aiin cheng za leka mi ka ṭanpuina kha a hlu zawk daih asin. Miten i zar an lo zo ve chiah khan i hlutna a pung ṭhin. Mite ṭanpui hi kan dam chhunga kan thil tih theih sang ber leh hlu ber a ni. 

Hripui leng avangin harsatna tawk kan tam tial tial a, ṭanpuitute pawh an lo pen chhuak zel a, mite thil ṭha tihte chu lo thlir reng ila, nang leh kei hian chu chu kan ti ve dawn lawm ni? 

Hripui leng lakah kan him nan hotute thuchhuak ngaichang rengin awm ila, tihtur an tih apiang thuawih takin ti zel ila. Inah inkhung tam ila, kan nunna kan chhanhim dawn a ni.