MIZORAM CHIEF MINISTER HNENA JAL SHAKTI MINISTER THUPEK KHA!

Heti zâwng hian bulṭan daih teh ang. Pathian thuawih hi kan ti teh fova; a thuawihna nun tak takah chuan dawt sawi a awm lo a, mipui bum tumna thinlung bawlhhlawh a awm tur a ni lo bawk ang. Tuin emaw dawt a sawi ka ti lo a, Pathian thuawih te awmdan tur sawifiahna mai a ni. Thildang chu sawi duah lo ang, kei aiin in hre thui zawk.  

Kumin (2020) February 25 a Assembly House Session a Union Jal Shakti Minis­ter Shekhawat-a'n sum tam tham tak a pek tur thu CM Zoramthanga’n a sawi kha kan la hre reng ang chu maw? "Jal Shakti Minister Shekhawat-a pawh khan mimal takin min rawn phone a, 'Hei in project kha ka hmu a, tam deuh ka rawn pe dawn che u a ni,' a ti a. Vawiinah hian ka sawi duh loh chu, a rawn sawi amount kha a tam lutuk a, ka ringhlel a, chuvangin, amount-a ka chian loh chuan ka sawi ngam bik lo. Tin, a dang pawh a awm ṭeuh mai," a ti a nih kha! Amount sawi ngam loh khawpa tam sum hi engzat tak ni ang maw tih mipuiin kan hre dawn tawh lo emaw kan tih hnuah Pu Sekhawat-a ngei chuan thup theih rual lohin a rawn puang ta dum dum mai a ni. 

June 23, 2020 a Press Information Bureau (PIB) thuchhuak tarlan dan chuan Pu Shekhawat chuan Mizoram Chief Minister hnenah lehkha thawnin Mizorama Jal Jeevan Mission (JJM) kalpui dan muang lutuk chu a ngaimawh thu a hrilh a. Chak zawka hma la turin a chah hial a; engmah a zep lo. Nikum, 2019-2020 tana Mizoram tana cheng vaibelchhe 68.05 dah aṭangin cheng vaibelchhe 37.41 chauh MNF sorkarin a hmang a, hman lohin cheng vaibelchhe 30.78 a awm thu te Pu Sekhawat-a chuan a sawi a. 

Kumin, 2020-21 tan Mizoram chan tur chu kum 2020-21 chhung atan cheng vaibelchhe 79.30 a tihsan a ni a, pawisa hman ban (opening balance) cheng vaibelchhe 30.78 nen kum 2020-21 atan Mizoram hian cheng vaibelchhe 110.08 a nei dawn a; state matching share nen chuan Mizoram hian JJM hmalakna atan hian kum 2020-21 chhung atan cheng vaibelchhe 122.30 a nei a ni tih thlengin Pu Sekhawata chuan a sawi ta phiar phiar mai a ni. CM Zoramthanga tan sawi leh tur a va vang dawn em? 

Thingtlang khaw In tina tap connection hmanga tui pek na tur (Functional Household Tap Connections-FHTC) project JJM hi December, 2022 ral hmaa 100% zawh tur a ni a. Pu Sekhawat-a’n kan State CM hnena a thupek hi a khauh khawp mai,  "State sorkar hian hun tiam chhunga tipuitling turin hma a la tur a ni," a ti bawl mai. Mizoram CM chu JJM atana ruahmanna leh a kalpui dan tur sawi duna video confe­rencing hmanga kawm a tum thu Pu Sekhawat-a hian a sawilang nghe nghe. 

Pu Sekhawat-a thusawi hi kan Chief Minister tan hian lawm tur nge lawm loh tur tih hriat a har ngawtin ka ring. House meuha ‘amount tam lutuk rinhlelh vanga amount zat sawi ngam loh’ kha sawi ngam loh khawpa tam a lo ni leh si lo va; sawi ngam loh khawpa tam amount awm thu Assembly House Session a sawi hmasa ber a nihna erawh chhinchhiah ve hrim hrim a phu e. Pu Sekhawat-a sum sanction pawh a chanve bawr vel chauh an lo la hmanga a; thingtlang khua-ah tap connection nei lo kan la tam nen, heti ringawt hi chu a hnam ang pawhin a mualpho thlak deuh lo maw? 

A hminga ‘Pathian leh kan ram tan’ ti a India sorkar laipui pawh kum 20 zet lo do ve tawh, sorkar thar lakluhna pawh a Kristian thei ang bera kalpuitu state khat Chief Minister ve meuh chu pathian dang betu Pu Sekhawat-a te’n ‘Hna i thawk tha lo ve. Pawisa ka pek sa che pawh i hmang zo thei lo va, hnathawh dan tur kawhhmuh tur chein video conferencing i nei dun ang hmiang’ a rawn ti a ni ber a. A hnam ang leh Kristian kan nihna ang zawng hian a zahthlak ka ti ngawih ngawih. Pu Sekhawat-a chu milem pathian (kan tih) betu, Pu Zoramthanga erawh Pathian Nung betu a ni. 

Hnathawk ṭha tawk lo anga Pathian nung betu Pu Zoramthanga rawn hrilhtu chu Pu Sekhawat-a, milem pathian betu a ni thung. Kan tu leh fate hian heti zawng hian an chhinchhiah ang tih a hlauhawm viau a ni. 

A tawp ber atan chuan kan ram damna tur leh sakhaw himna tur te, intodelh lo ata intodelh kan lo nih theih dan tur te, COVID-19 hrileng avangin kan economy tlahniam deuh mahse recover vat dan tur hi sorkar hian duangin, thil ni thei lo leh chiang lo hi sawi mai mai tawh lovin, a tak rama chêng chunga mipuite min kaihhruai hi a hun tawh tak zet a ni. 

Hmanlai Politics boruakah kan awm tawh lova, mahni hmasialna dah ṭhain, ram leh hnam vei tak tak a, a neitu thinlung pu thar turin kan sorkar hrawn mek hi kei, mi chhe daikil kara mi hian ka'n fuih thar ve duh a ni.