ZORAMIN KHUALṬHA KAN THLENG E

Tun ṭum kan Union Minister of State Sadhvi Niranjan Jyoti lo zin zet chu ava ropui danglam em! Lengpui Airport alo thleng local TV aṭanga kan lo hmuh ang ngawt a ni hauh lo. Hmaichhanah chanchinbu mite leh official-ten an kawmna thu kan lo hmuh leh hriat aṭang hian, hmeichhe fel tak, zuam sual hlauhawm tak niin a lang. Khawi lam aṭanga lo chhuak tak ni maw, ti he haw chungin a kam chhuak hi hmangaihna aw ni te pawhin a hriat theih alawm le.

Central sawrkar lamin kan retheih leh harsatna te min hriatpui a, theih tawpa min dawm kan tuma hma min lakpui lai a, an beisei anga kan ṭhan chak theih loh chhan a rawn auchhuah aṭang te, keini mipuite mawh ni lo a, kan hruaitute leh hotute mawh leh an vuaicha vang a ni tih min han hriattir aṭang te hian, mipuite hi kan auchhuah a ngai ta a ni mai lo maw?

Mirethei zawk In leh lo mahni a din hleithei lo mi 15674 te tana PMAY hnuaia ṭanpuina pek tawh, kum 2023 a zawh tura tih In 5800 (40%) chauh hmalak tawh tih han hriat phei hi chuan, a mualpho thlak mang e aw, a tih rum rum theih. Amah Minister ngeiin mirethei leh harsate dinhmun a hmuh, ṭanpui nghal theih mai a ni rih si lo, tuna sunction hi hmanna zawh fel a nih veleh kan rawn pe leh zel ang che u, an tih te hi, a ropuiin a ngaihnawm khawp mai.

Kan ram hi fapa tlanbo chanchin te leh fapa duat sual te pawh kan ang deuh. An ṭhatna tura thilpek leh zilhna, nawmchenna lama hmang ral zel mai ang te pawh min tehkhin tir ta.

Central Minister leh mi pawimawh tak takin min rawn tlawh fo a, S.N. Jyoti tluka min rawn belchiang hi an awm awm lo. Hetiang ang mite thurawn hi pawmin zawm ila, keimahni lamin kan tih ve tur sawma pakhat te hi tlak zung zung ila. Kan harsat deuh dawn chuan, kan Minister te leh MLA hlawh te hi ti tlem deuh ngam ve se. Board tina Minister of State rank tluk deuh thaw a Vice Chairman leh Adviser kan neih zozai te hi ti tlemin, kan motor car man tam tak taka lei te hi lei lo ila. Chhuanlam tur awm hauh lo turin hna thawk tha turin hnathawktu (contractor) te hnen aṭanga ‘1 / 3 percent came to me’ tih sawi ṭhin ang te hi awm tawh lo bawk se.

Kan ram zimte, thlai chitin ṭhat duh em emna te hi 'land reform' system-in ruahmanna fel takin hma han la ila. Central aṭanga sum lokal te hian tun aia rang leh mumal deuh zawkin kut hnathawktu te leh miretheite hnen hi rualkhai deuhin thleng tawh se la chuan, Zoram hi ava nuam dawn em!

Congress sawrkarah Rajiv Gandhi, Prime Minister a ni a, kan Chief Minister Pu Lalthanhawla nen unau ang maia inngaina in Mizoram hmun tam tak motor-in a zin dun a, thingtlang thlawhhma (lo) ah fanghma tuai te inphelin, dawhkan khatah chaw te an kil a. Hetih hunlai hi Mizoten kan ram tan thil ṭha Central a kan thlen hun ṭha a ni. Rajiv Gandhi hian Zoram tan i duh duh dil rawh tiin Pu Hawla hi a hrilh, ti te a sawi a awm nghe nghe. Mahse, a sawi ta lem lo nge, Rajiv Gandhi-a pawh a awm ta lo mai nen, Pu Hawla pawh term hnih lai a hun chhung hian Zoram tan hriatreng tur sulhnu ṭha a nei lem lo a ni mai thei.

Brig. T.Sailo-a’n Six Basic Needs a tih zinga mi - Bairabi Hydel Project (Tuikhuah) bul ṭan leh Aizawl khawpui tawt lutuk tur hmu lawkin, khawpui zauh nan Luangmual, Chawlhhmun, Tanhril, Sakawrtuichhun thlenga ruahman leh Govt. Complex te din a. Building tam fe sak tawh a chhunzawm duh tak loh pawizia te hi ṭhangthar ten an hre dawn chauh.

Hengte chu kalphung pangngai a nia lawm ti mai loin, tun ṭuma kan Minister lo zin nu te reuh hian mipui hriatah min lepse hneh bawk a, thingtlang kilkhawra kan bukna hman dan dik lo thlengin a hria a. FCI Godown paruk kan neih kan chhuan viau chu state tinah awm se min la tihpui ta deuh deuh zawk lehnghal. Kan thlai leh thei thar dahṭhatna tur cold storage kan mamawh em em tih min hmuhpui in, kan dil hauh loha min ngaihtuah pui a inhuam te hi a lawmawm khawp mai.

Kum khat zet kan la nei alawm, hawh u, tei khawmuang loin, a thu min sawipui ang te hian hma la ila. Cheng nuai thum sem tura kan intiam lamin a lo hria a, i sem vat teh ang u.

Chuti lo chu sem hman lo hian, kalphung thara min hruai tumtute hian min thawh khalhin, an policy hmanni lawka an tlangzarh lah kha a ṭhain, mirethei hnen thleng phak tur a tam hmel viau lehnghal. Kan tlai palh ang e.

- Lalhmangaiha Soilo Holy Cross Bakery