‘A VUR KUM’ - PART I

Sum leh pai harsatna hi MNF sorkar hnuaiah hian thu thar a ni lo. Thu thar zawk chu ni 10-20 velah ‘Sorkar hnathawkten hlawh an la ve thei tawh dawn e’ tih zawk hi a ni fo.

Sept 9, 2022 khan Hnam Run a thu a sawinaah Revenue Minister Pu Ruatkima chuan, ‘Sorkar hnathawk hlawh pawh a hun takah release a ni leh mai dawn’ a ti a. Mizoram Sum leh pai enkawltu ber, Finance Minister pawh a ngawih reng laia Minister phur fal zualte’n sorkar hnathawk hlawh lak hun tur an lo puang fo mai hi sorkarin kalphung mumal a neih lohzia lanna chiang tak a ni phawt mai.

Pu Ruatkima’n ‘a hun tak’ a tih hi sorkar hna­thawkte tan a tlai mah mah; bank loan latu, thla tira Bank lamin an account aṭanga loan rulhna an lo ‘cut’ sak zat zat ṭhin sorkar hnathawkte tan phei chuan Pu Ruatkima’n ‘a hun tak’ a tih hi tlai tak a ni.

Sept 9,2022 a Hnam Runa a thusawinaah hian Pu Ruatkima hian, “Kum nga dang, a vur kum hi Pathianin min la pe leh in ka ring a ni,” a ti. MNF sorkar kalphung hi mipuite tan chuan ‘a vur kum’ tih a har ve ngawt ang.

Sorkar hnathawk hlawh puksak, tun hmaa hlawh an lak hun ṭhin pangngai aia tlai daiha hlawh lak ve ṭawk, GP Fund tang te chu lo dah ṭha ta ila. August 26 thleng khan Health Care bill tang pawh cheng vbch 77 chuang a lo tling khawm leh der tawh; damlo bill lak theih loh avanga damdawiin ṭha zawka inenkawl chhunzawm thei ta lo chhungkaw sang chuang an awm asin.

Mipuiin rinna an neih tawh loh em avangin Health Care a inziak lut pawh, a hma kuma chhung­kaw nuai chuang ni ṭhin kha, April, 2022 – March 31, 2023 ah chuan chhungkaw 38,505 ah a tla duai duai mai a nia. MNF sorkar hian Health care a inziak lut zawng zawng 72.01 % hi an damlo bill a batsak mek. Heng hi RTI Document awm thlap a ni.

- Dr.Lallianchhunga