PU BUANGA AWARD TOP FIVE

MAL, Jt. Hqtr. Lunglei-in a sem ṭhin Pu Buanga Award 2022 thlan turah Top Ten aṭangin Top Five thlan chhuah a ni leh tawh a. A thlangtute hian an uluk a, Top Three leh Topper thlan chhuah huphurhawm tak tawh tur a ni.

Zofate zinga ziak mi kan neih mi hlu tak takte hi an chhuanawm a, kum tam tak liam tawha a thuziakte hi vawiin hun thleng pawha la ngaihnawm leh hlu hi engemawzat a awm. Chung zingah chuan tuna kan hmuh theih china essay puitling ziak hmasa ber chu Kaphleia niin April 11, 1938 leh April 24, 1939 inkara a ziah zawh tak THLIRTU hi a ni.

He Essay hi I.A a zirlaia T.B natna avanga Calcutta-a a awmlaia a ziak niin Mizoram a hmuh dan te, hunpui inlet a thlir dante mai bakah mihring rilru leh awmdante chu thiam takin a ziak a, a ngaihnawm hle. A ni ang bawk hian Rev. Zairema hian ‘Ka pa, ka ei zo vek mai dawn e aw’ tih leh ‘Neuh neuh’ tihte chu kum 1941 vel khan alo ziak tawh bawk a, anni ang bawkin C. Ṭhuamluaia, Zikpuii Pa leh J. Malsawma (Thanpuii Pa) te pawh hian kum 1950 hmalamah khan Essay an lo ziak tawh bawk.

Heng ziaktu hmasate hi chuan mual min lo liam san tawh a. Anni hnung zui hian mi chhuanawm tak tak an rawn chhuak leh a, tuna PU BUANGA AWARD dawng tura Top Ten-a thlanchhuah zingah pawh hian an lang a, a ṭhente phei hi chu kum upa deuh tawh an ni. An zavai hian an chhuanawm a, zofate tan sulhnu ṭha tak tak min hnutchhiah a ni. A thente hi chu ziakmi tana chawimawina chi hrang hrang lo dawng tawhte an ni a, chutiang chawimawina dawng rih lote pawh an nep bik hauh lo.

Top Ten aṭangin Top Five heng a hnuai amite hi thlan chhuah an ni a, reiloteah an zing aṭangin Top Three thlang lehin chumi aṭang chuan Topper thlan chhuah leh tur a ni.

Tuna Top Five thlan chhuahte chu:

C. Chhuanvawra

Dr. Lalzuia Colney

J. Malsawma (Thanpuii Pa)

Prof. RL. Thanmawia

Lalrammawia Ngente

An chanchin tawi sawi zui ila:-

C. CHHUANVAWRA: Kum 1941-ah khan Leithum khuaah a piang a, unau pianpui sawm leh pakhat neiin amah hi upa ber a ni. A pa hi Mizo History ziaktu Hrangthiauva niin a pa hian amah ngei pawh ziak leh chhiar thiam hma tura a duh avangin school a kal hmain A Aw B chhiar leh ziah a zirtir thiam vek tawh a ni. Kum ruk (6) a nihin I Kor. 13: 1- 3 thu hi ṭha takin a chhiar thei tawh bawk. Pu C. Chhuanvawra hian a pa zirtirna vang pawh a ni ang a, lehkha a zirna kawngah a tluan mai bakah thu leh hla lamah pawh a tui hma hle bawk a. Kum 16 a nih hian khatih hunlaia Mizorama chanchinbu awmchhun tih mai tur – Tunlai Chanchinbuah khan Letter to Editor alo chhuah ngam daih tawh a ni. Hetih hunlai vel bawk hian Kristian Hla Thar Bu, hla 275 chuanna kha an awmna lai vela an sak thiam chin hla 230 vel chu a hla number zawng zawng leh a chang indawt a lo hre vek tawh a, mihring hming hawrawp hla tlar bula tlar thlain hla alo phuah thiam der tawh bawk.

Article tak hi chu kum 1975-a Meichher-a a ziak ‘Tute nge Mizo’ tih chu a ziak hmasak ber a ni a, a hnu lamah pawh ziak chho zelin Article 540 chuang a ziak tawh a ni. Lehkhabu 15 lai a ziak tawh bawk. Tuna PU BUANGA AWARD 2022 dawng tura thlan chhuah panga zinga a tel hi a phu hle.

LALZUIA COLNEY: Khuailui ral leh Turnipui avanga ṭhangtharte pawhin kan hmelhriat em em Lalzuia Colney hi kum 1937 khan Farkawn khuaah a lo piang a. Harsa tak chungin Middle School a zo a, High School pawh harsa tak chungin a zir leh a, kum 1977-ah B.A a zo a ni. Khawzawl High School-a zirtirtu hna a thawh lai hian MAL lama a ṭhiante chuan Aizawla awm turin Minister hnenah an lo sawi a, tichuan kum 1994 aṭangin Aizawla Govt. K.M High School-ah thawkin kum 2006-a a pension thlengin a thawk a ni.

Pu Zuia hian article 1000 vel a ziak tawh a, AIR-ah vawi 90 vel thu a sawi tawh. Writing competition-ah lawmman 28 lai a dawng tawh bawkin hengte avang hian civil mite hnena chawimawina sang India sorkarin a hlan ṭhin, Padma Shri pawh kum 2010 khan a dawng a ni. Thu leh hla avang bawk hian kum 2016-ah khan Jerusalem University chuan Doctor of Literature an lo hlan tawh bawk.

J. MALSAWMA: Thanpuia Pa tia hriat lar bawk hi January 18, 1927 ah lo piangin thiamna lamah M.A, LL.B a ni. Thu leh hlaa tuimi tak a nih bakah zirna kawngah pawh sulhnu engemaw zat a nei tawh. Kum 1958 – 1962 chhung­ah khan Pachhunga College, Aizawlah Lecturer a ni a, hetih chhung bawk hian Assam High Court-ah Advocate a ni bawk. Kum 1956 – 1962 chhung khan Mizo Student Association-ah President a ni. Kum 1964 – 1965 chhung khan CYMA President a ni tawh bawk. Heng bakah hian sorkarah leh khawtlang lamah pawh mawhphurhna leh chanvo a ngah a, mi fel tak a ni. Tin, thu leh hla lamah pawh sulhnu ṭha tak tak a nei bawkin article hi 300 vel ziak tawhin lehkhabu pali a ziak tawh. Kum 1993 ah Gospel Chanchin Ṭha Hmar Thimpuiah tih lehkhabu a ziak a, kum 1995-ah Vanglai tih lehkhabu a ziak a, Zozia tih lehkhabu pawh kum 2000-ah khan alo ziak tawh bawk.

Zo Nun tih pawh a ziak a, hei phei hi chu a lehkhabu ziah hmasak ber a ni nghe nghe. A article ziah – Kan Mizia tih phei chu vawiin thlenga chhiar hlawh a la niin kum 1960 January 15 daih tawha a ziak a ni. A Mizo ṭawng ziahte hi chhiar a nuamin a hahdam a, Mizo ṭawng thiam tak a nih avang hian a thuziak chhiar a nuam ṭhin hle.

PROF. R.L. THANMAWIA: A ni pawh hi thu leh hla lam hi a thang chhuahna ber a ni hial awm e. Kum 1954-ah khan Darlak khuaah lo piangin a pa chu Vanlalliana a ni. Mizoram University Mizo Department-ah Professor leh Head of Deptt hna chelh tawhin kuminah khan a pension. Mizo Poetry chungchanga Doctorate Degree nei/ dawng hmasa ber a ni a, hla 100 chuang a phuah tawh. Lehkhabu 28 a ziak tawh a, article 400 chuang a ziak tawh bawk. Thu leh hlaah sulhnu tam tak a neih avang hian kum 2012 khan India sorkar chuan chawimawina sang, Padma Shri a hlan.

Prof. R.L. Thanmawia lehkhabu ziah tawh ṭhenkhat chu: Ka thi pek che kha (1987), Hla thu hrilhfiahna (1988), Zofate Rohlu (1992), Zinkawng Raptlak Zawhtute (1994), Chuailo (1997), Zanlai Thlifim (2016), Mizo Folktales (2017) leh a dangte...

LALRAMMAWIA NGENTE: June 21, 1968-ah khan Vairengte khuaah a piang a, ṭhangthar zingah chuan thu leh hla ti phuisuitu ber zinga mi a ni. Tunah hian Associate Professor niin Govt. Johnson College, Aizawlah a thawk mek a, a lehkhabu ziak RINTEI ZUNLENG tih phei chu kum 2019 khan Book of the Year atana thlan a ni. Lehkhabu 28 a ziak tawh a, chanchinbu pawh a lo enkawl tawh ṭhin a ni.

Pu Ramtea hi mi inngaitlawm tak, a kianga awm hahdam em em a ni. Amah hi mi nghet cherh chawrh niin fel fai taka thil ti ṭhin mi niin sulhnu pawr nei ngai lo kan tih ang chi hi a ni. Tlangval sual pawh a nei lo ang tih tur hi a ni ve. Luangmualah a nupui HC. Lalthasangi leh a fate pathum nen an cheng mek a, thu leh hla lama chawlh nei ngai lo mi a ni. Lehkhabu ti chhuak turte hian vawi tam tak an lehkhabu hi an edit tir tawh a, Mizo ṭawng uluk mi a ni a, ṭhangtharte tana hmahruaitu rintlak tak a ni.

- Mahmuaka Chhakchhuak