Kawngpui chhe lutuk hi a vei awm

Mizoram chu NE state-ah khaw kar kawng chhe bik em em lo leh state dang ai pawhin kan kawng hi a ṭha zawk mah niin kan hruaitute'n an sawi ṭhin a, a dikna chin pawh a awm. Mahse tunlai kawngpui chhe lutuk hi chu a vei awm ta hle mai.

Ruahtui a tla nasa tih chu kan hre vek a, chuti chung chuan kan kawngpui hi engtin tin emaw siamṭhat theih dan chu a awm ngeiin a rinawm. Ngaihthah lutuk vanga chhe nasa ta ni pawhin a lang a, a bikin a enkawltu department hian ṭan an lak a ngai hle ni pawhin a lang.

Khaw kar kawng chhia hi chu ruahin a hawrh nasat vang a ni deuh ber a, repair zung zung a har avangin hriatthiamna thui tak mipui pawhin kan nei. Mahse, khuar chhe lutuk han hnawh khah maia tlema ziaawm deuh chuan a siam theih nia lang, mahse a khuar ang anga en liam mai a tam hle. Sumo driver te, taxi driver-te leh a khaw huapa hnatlan ngai tlat mai ṭhin hi chu a beidawn thlak lam deuh chu a ni.

Zokhaw kawng chhia chu sawi loh, Aizawl khawpui chhung kawng khuar chhe lutuk hi a veiawm takzet a ni. Bawngkawn leh Zema­bawk inkar ti em ema rei a chhe ringawt maite hi enge maw a awmzia ni dawn ni. A siamtu tur contractor thlan fel vek tawh si, khaw ṭhat lai hun liam ta zawng zawng pawha thui tak siam theih, siam loha furin a nan tak vanga a veng neitute'n road block hial an siamte kha thil zahthlak tak a ni.

Kawng chhia leh thildangah hian a sorkar mekte kan puh fo laiin a changtu department mawh­phurhna a lian hle tih kan hriat a ṭha. A changtu minister-te tel loa engmah tih theih loh ang maia a awm hi a dik lo viau. MNF sorkar lai khan a changtu minister khan pawisa awm lo chungin kawng sial tam tak a nei a, tun thlengin mipuiin kan chhawr hle.

Tun sorkarah pawh Vaivakawn-ah hmun hnihah kawngpui pengṭhuam an siamte hi an fak awm khawp mai. Chutiang bawkin Upper Republic pengṭhuam, Pi Pangi peng an han siamte hi lawmawm hle.

Bible House buil­ding a tlusawp ti tih a, hun rei tak lirthei ke pali nei a kaltlang thei lo. Chhim lam pan tur ke pali nei bus leh motor te chu Tuikhuahtlangah a chho ṭhin a, he kawng hi tunah chuan namen loin a chhe ve leh tawh a, kal harsa khawp a ni ta. Chutiang bawkin hmun tam takah kal har khawpin kawng chhia hi a tam ta hle.

SIPMIU kawngpui laihchhiat mawlh mai hi min tibuaitu pakhat chu a ni. Khatla kawn aṭanga office pawi­mawh em em, New Secre­tariat complex kawng chhuk thlengin a chhe rei ta lutuk. He kawng ngat phei hi chu mi pawimawh zawng zawng pisa kaina kawng a ni tih hi SIPMIU contractor hian a hre lo emaw ni le! Tiang em ema rei chhia hi chu ngaihthah lutuk vang a ni tih a chiang a, a rang lama siamṭhat chi a ni. Sorkar hian mipui thinrim hun nghak kher ṭhin lo teh se.

- Lalkhirhvela