Buaipuitham - Ui Ek!
Ui ek pherh!: Mizo naupang infiamna pakhat, ‘ui ek pherh ui ek pherh, hnangtawm zinga ui ek pherh’, tiha a ṭul loh huna ‘pherh’ rawn ti an awm zauh khan infiamna
aṭanga hnawhchhuah emaw hremna emaw tihtur bat belhchhahna a nih ṭhin kha. A tak ngeia ui ek han rah pherh phei chu ngeiawm tak a ni. Mahni ui ek chu kan thian mai thei, mahse mi ui ek han then fo hi a tlawmngaihthlak ṭhin.
Kan khawsak a changkang a, ui ṭha leh dangdai tak tak ram dang aṭangin kan chah lut zel a. Taima leh duat tak maia ui enkawl an awm laiin mi ṭhenkhat chuan ui manto tak an lei a, a enkawl lamah erawh ṭhahnem an ngai zo leh si lova. Ui enkawl ṭhat loh na na na chu zun leh ekna hmun bik an neih loh vangin, mi in kawt leh luhka velah te e-in, ṭhenawm khawveng leh midangte tan hnawksak leh tenawm a chang fo. Ui kan vulh chuan hmangaih leh duat taka kan enkawl hi kan mawhphurhna a ni.
Ui ek!: Ui ek kher lo, ek hrim hrim hian natna hrik an pai ngei ngei ṭhin. Kawngpui emaw pawna ui i kaihchhuahin an zun leh ek thiarna hmun bik i neih tir thei lo a nih pawn an ek hlauha thiarfaina lehkha emaw sarang emaw keng ṭhin ang che. Ui fing leh chhuanawm tak kai mah la, an ek i thenfai sak ngai loh chuan changkan hmel fein in mawl pi/ putu a ni mai.
Kaih chhuah ngei tur: Ui ngaina tak an awm laiin, ui hlau leh ngaina hauh lo an awm bawk. Ui hi ran an nih tlat avangin fing taka vulh pawh ni se, inthunun theih loh chin an nei hlauh thei. An zuam em em zawhte leh ransa dang tawng thut thei an ni a, tin ui hlau em em midang lawm tuma zuan mai pawh an tum thei. Chutiang huna i thunun theih ngei a ṭul vangin a kaihna rinawm tak nen i kaih a ngai.
I ui an nih angin i thuhnuaia awm, i thunun a ni tih hriatnana kaih ngei hi a thain a him. I duh ang ni lova an duh anga an tlankawi emaw an zui ṭhat duh loh che khan an thuhnuaiah i awm hlauh zawk a ni.
Hriselna: Ui hian rilru hlimna min pe a, khawhar min hnemtu leh hunawla infiampui atan an ṭangkai hle. Kan chenpui an nih vangin, kan taksa hriselna kawng tam zawk hi kan ui vulh nen a inlaichin bawk. Ui neitu fai tak leh ui bal a inmil hauh lo.
Kan ui hriselna kawngah ran doctor-te a ṭul anga rawn ṭhin ni se. Doctor chawh ni lem lova ran an nih vang damdawi hmang mai kan la awm ṭhin a, a zira zir ngeite thiamna hi i hmang ṭangkai zawk zel ang u.
- Dr. Mahminga Sailo, Waggin’ Tails, Bawngkawn