Written by
Sanglura Sailo
Electric Veng, Aizawl

Mizo nun ze mawi

Kan Mizo nunze mawi tlawmngaihna kan tih ṭhin hian thil ṭha zawng zawng hi a funkhawm a tih theih ang. Khawvel heap pawhin Mizoten chhuan tur kan neih ve chhun a ni awm e.

He kan nun mawi tak hi chawi nung reng tur chuan a lungphum, a innghahna pawi­mawh tak a awm a ni. Hmanlai chuan mi tlawmngaite chu mi zawng zawngin an ngaisang a, an zah a, an theih ang tawkin an chawimawi a, Nopui an dawm tir ṭhin. Nopui dawm thei turin mi tam takin an bei hram hram ṭhin. Chutih rual chuan mi awm ṭha duh lote chu engah mah an ngai lo a, an endawng a, nupui pasal zawn thlengah an hnawng ṭhin a ni. Heti ang mi nih hi miten an hlau em em a ni.

Hengte hi tlawm­ngaihna vawng nung reng tura a lungphum innghahna pawimawh tak chu a ni. Tunlai chuan mi ṭhaten ngaihsan an hlawh vak lo a, mi ṭha lote an tlangnel ve thung a, an in kiltawih lo tial tial a ni.

Mi ṭhate chu ngai­sang ila, i chawimawi ang u. Hmanni deuh khan tlangval inhlawhfa, electrict-in a man ṭanpuitu nei lo chu nula Lalrinpuii, Ailawng khua chuan a buaipui a, damdawi inah an dah a, reiloteah a thi ta a. A ipteah chuan mobile phone a lo ak a, chuta ṭang chuan a chhungte a zawn chhuah sak a. An rawn kal ta a ni.

He thu hi kan hriatin a ropui kan ti a. He nula hi lengah kan sawm a, a hmel kan hmu thei a, kan lawm hle a ni. Hemi hnuah hian Laltlanchhuahi, Dawrpui Vengthar chuan mi dawra a inhlawh faknaah bus aṭanga an tih tlak palh cheng nuai khat (Rs.100000.00) chu a chhar a, a neitu a pe let leh vek a ni. He thu kan hriat hian a ropui kan ti a, Tlanchhuahi hi lengah kan sawm a, a lokal thei a, kan lawm hle a ni. Mi ṭha chawimawi tlak mi 47 te ina lengah kan sawm tawh a, he'ng mi ṭhate hi kan ngaisang a, chawimawiin awm se kan duh a. Kan duhna lan tir nan he thu hi ka ziak a ni.

Zoram mipuiten mi ṭhate kan ngaihsan theih nan keini pitar leh putar kum 86/ 87 engmah ti thei tawh lote duh dan, thiltih tlemte hian awmzia a nei vak lo ang. Zonet-ah te, LPS-ah te hian mi tlawmngai fak tlakte hmel hi rawn tilang ṭhin sela, an chanchin sawi zel bawk se, chu chuan awmzia a nei thui ang.

YMA te, MZP leh MSU te hian tun ai hian ṭan han la sela, mi ṭha chawimawi tlakte chu pho chhuakin kan theih tawpin chawimawi ṭhin ila, mi ṭha lo chu i hnawl ngam ang u. Corruption i do ang u ti mah ila, corrupt avanga hausate a ruk taka kan ngaihsan tho si chuan engtin nge kan do theih ang? Kan ngaihsan zawng hi thlak a ngai a ni.

Mizo nun ze mawi chawi nung zel tur chuan mi ṭha ngaisang ila, chawimawi ila, mi ṭha lo chu hnawl ngam ila, hei hi a lungphun innghahna pawimawh chu a ni e.

- Sanglura Sailo, Electric Veng, Aizawl