Inkhawm ṭantu leh Bible chhiar

Hman deuh tawhah khan kohhran leh thil tih nikhuaa 'Ṭantu' tih awmzia kan inhrilhfiah siak a, 'Ṭantu' tih ṭawngkam hi a dik lo tia sawi pawh a tam hle. 'Ṭantu' hian a ṭan tak tak lêm chuang lo, chuvang chuan he chanvo hming hi a dik tawk lo tia sawite a awm a nih kha.

'Ṭantu' tih hi a ṭawngkam bul awmzia aṭanga chhui a, hrilhfiah chuan tuna he chanvo changtute ti tura kan beisei dan nen chuan a inang lo viau mai. Amaherawhchu, ṭawngkam leh thumal hi a awmze bul aṭanga chhut vak a, 'chutiang lam chu a kâwk lo' tia sawi dawn chuan Mizo ṭawngah chauh ni loin, Sap ṭawng leh ṭawng dangah pawh a tam thei hle. Khawvel pumpuia kohhran hote thawhhona lam atana ṭawngkam hman 'Ecumenical' tih pawh a ṭawngkam awmze bul aṭanga phel darh chuan 'Ecumenical' tih hi tuna kan hmanna angah hian hman chi a ni lo, a awmzia a dang daih alawm tih theih a ni.

Ecumenical emaw Ecu­menism te pawh Greek ṭawng, a awmziaah chuan mihring chênna khawvel pum sawina a ni a, kohhranho thawhhona lam atana hman hi a dik lo a tih theih. Hetiang hi Sap ṭawngah pawh a tam hle, chuvang chuan tuna kan hmanna leh, tuna kan hmannaa kan kawhtirah hian lungawi mai a ṭha e. 'Hmeichhia' tih pawh kan phel sîn vak zel chuan put a chakawm loh mai a, 'Ral leh lam' kan tih pawhin, kan phel sîn a, awmzia neihtir viau kan tum chuan keimahni awmna lam tho sawina a ni daih thei. 'Ṭantu' chu inkhawm ṭantu, programme ṭantu tih lam ngawr ngawrah ngai loin, chanvo pawimawh tak pakhat sawina a ni e, tihah hian lungawi mai ila. Chuti a nih loh chuan kan ṭawng hi a hausa thei lo ang.

Thumal leh ṭawngkamte hi hun lo kal zelah a hmanna a tam tial tial a, a hmanna a zau tial tial a, awmze dang zawk leh zau zawk a nei ṭhin. Chutiang ni loa hmâna a nihna ang kawhtir phêt kan tum chuan ṭawng hian hma a sawn hlei thei lo ang.

Inkhawmnaa Bible chhiar

Kohhran tam berah hian inkhawm ṭantuah upa lam deuh tawh kan hmang fur hlawm. Kum lama upa tawh ṭantute hi chu an mit pawh a lo fiah tawh lo a, Bible an chhiar pawhin ngaihthlak nuam lo khawpa chhiar sual nasa an awm ṭhin. An mit ṭhat loh an chhuanlam fo a, mahse kei chuan an inpuahchah ṭhat tâwk loh vangah ka ngai fo.

Mizo Bible hi a ziak a lo sîn a, upa lam, mit ṭha tawh lote tan chuan chhiar a harsa tawhin, a tlar tlara chhiar kân mai pawh a awl viau tawh a ni thei, inpuahchahna ṭha zawk chu nei se, hetiang em em hi chu a ni lo thei. Ṭantu ṭhenkhat hi chuan an Bible châng chhiar tur hi a hmain an lo chhiar lawk hauh lo em ni aw tih theih tur khawpin an chhiar sual nasa fo.

Mit a ṭha lo a, zâna kawl­phetha êng hnuaiah hmuh fiah a harsa viau tawh a nih chuan a hmain lehkhaah te lian tak, chhiar theih ngei tura ziah chhuah mai hi a ṭha hle. Kutin emaw, khawl emawa zâna êng ṭhat vak lohnaah pawh chhiar theih ngei tura ziak chu Bible kara zeh a, chhiar mai chîn ni ta se, kan inkhawm pawh a zahawm phah sawt ang.

Ṭhenkhat chuan kan chhiar sual nasa lutuk a, Bible thu tum pawh hriat theih lêk loh te, a buk ṭhelha ṭhelh te, a ṭhen chu midangte tana nuih tiza thei hialte pawh a awm ṭhin. Hetianga chhiar sual nasat hian inkhawm boruak a tichhia a, mûk tak leh puithu taka inkhawm tumna boruak a tichhe daih thei a ni.

- Rochungnunga